Mi kaihhrem sualpit timi cu a tuahtu hrangah sualnak
mak tara, cozah ih huat zetmi, Pathian khalih a huatmi a si betah a tuartu
hrang khalah vanduainak mak tara le nun duhumlo tak a si. Hmanseh hrekkhat cu
kum kimlo ih sualpit an siih, hrekkhat cu upa kumkim ih tuar khal tampi an um.
Mi kaihhrem ih sualpitnak hi an zingzoi tikah mai theihthiammi sung ihsin an
tam sawn ti a si. Mipa suaksual le mi ṭhalo ruangih cang a si bangin kan mah
lamih umdan thiamlo tuk ruangih cang pang khal a um thei. Ziang a si hmanah kan
ralrin thiam theinak dingah a sangsang ten a hnuailamah kan tarlang ding.
1. Na zummi le rinsantlakmi thaw lawngih suahvah tum
aw.
Ziangvek cozah ṭha le sia ih uknak hnuaiih na um
hmanah nunau hrangah zaanih leng suahvah cu thei tawk hrial a ṭha. Lo theih lo
ih zaan suahvah ṭul a si hmanah rualpi sawm aw. Na duhzetmi thawi tong aw
dingih nan thiamawk zo a si hmanah zaanpi tivek ahcun rualpi na hruai a ṭha. Hnaṭuan
ruang le Over Time ṭuan ruangih zaan tlun ṭul a siih tikcu rei ding a si ahcun
tuan deuh ih tikcu thleng dingin dil a ṭul, asilole hmuaktu na neih a ṭha.
2. Mawinak hnakin taksa himnak thuamhnaw uar aw.
Taksa mawi ter zettu thuamhnaw tivek hnakin taksa
himnak hrang ṭha thuamhnaw a thupi. Ṭhimnakah sikat tawite tivek hnak cun
bawngpi sau tivek. Mi kaihhrem sualpit hmangpawlih thinlungah, an sualpit tummi
cu, (1) hahio um, iit um a si maw (2) midang umlonak hmundai deuh a si maw (3)
kaihhrem sualpit dingah a thuamhnaw phelh a awl kem (4) samsau asile a sam kaih
sak tahratin hrinhroh a theih kem (5) I hun lehrul thei kem, I hun sual thei
kem tipawl an ruat tlangpi. Kawlrammi hrangah hnikaih hi kan hman tlangpi cu
asinan bawngbi hi taksa humhimnak ah a ṭha deuh ding tiah zumnak a um.
3. Na nellomi mipa ih ei-in pekmi cohlang hlah
Hrekkhat cun zaan ih suahvah le night-club feh tivek
hi mibang le tulai dan ah kan ruat, ahleice in khawpi lamah. A sual ciamconak a
um lo tla a si thei. Kan duhmi le kan paihmi cu kham-awk theih a si lo. Asinan
kan duhmi le kan paihmi in kan nun pumhlum hrangih ṭihnung le harsatnak pe thei
a si thlang maw timi cu thluak ih ruah a ṭul. Khuitawk thlen khalih zovek thaw
khalih ei thei hluahhlo, in thei hluahhlo tivek cu ṭih a nung, cuvekpawl hrial
dingin ka lo forh duh.
4. Zu le rittheihmi thil hrial aw
Himi zawn khalah nunau tampi cun kan ti thei lo
lala, kan Chin falapawl tiangin. Night-club fehtu nunau tam sawn cu zu asilole
beer an in tlangpi. Cu lawngah laam a nuam, san kan man tiih rak titu an um bet
lai. Nunau hrangah rittheih thil cu a cang theitawk hrial dingah ka lo
forhfial.
5. Mai taksa kilkhawi daan, misual daan zir a ṭha,
asilole tlan aw
Ramdang tlawng tampi ahcun an high-school lai ihsin
Karate maw khavek lam lehnak pakhatkhat kha tlawngca vekin an zir tel ṭheu.
Kawlram ah cuvek a um lo tikah zir a ṭha, tampi thiam a ṭul lo, a hramthok nak
malte humhimnak hrangah. Cun mi kaihhrem hmangpawl an um tikah an derdainak le
cahlonak zawn ziang a si ti theih tum aw. Cawn karlak, mit tivekpawl hi minung
kan zatei kan derdainak le sual kan awlnak bik a si. Kei zianghman ka thiam lo,
ningzah le ka nei si tin daitei ummen cu a fuh tuk lo, asilobik tlansuahnak tal
na ngaihtuah a ṭul. Na kiangkap rat ding le, lo naihniam nak tikcu khal pek lo
ding a si, cucu hlankhan ih humhimawknak a si.
6. Na hmuhmi thilri thawn sual aw
Mi kaihhrem hmangpawl kha na hmuhhmuh thilri thawi
na sual mai a ṭul, theih dingmi cu kha pawl kha zangfah an ṭul lo. Na kut an lo
kaih tang thluh tikah, na lu, na ka pawl thawi a rem naknak ih sual le keu a ṭul.
Na ke le kut a remcang a si ahcun an karlak, an mit tivek bat ih sual a ṭha. Na
kutah phone, rawlkhainak, thawng le thilripawl kha na humhimnak ralthuam ṭha
bik an si.
7. Samsau na si ahcun na sam kha faltente le fek ten
tom aw
Nunaupawl cu an samih kaih cun an tal thei lo, an
cang thei lo. Nunau tamsawn cu an sam ih dirh ahcun an cahnak kaih tarh sak vek
a si. Curuangah sam tan kher cu a si lo, felfaiten fektei tom asile mi kaihhrem
hmangpawlin an duhduh in mi an ti lok thei lo.
Source: Cosmopolitan, Shwemom
0 comments:
Post a Comment