Falam Mino in Leadership Kan Ṭul!

Falam mi hi mipum kan mal ruah in pawlkawm a tam, pawlkawm kan tam ruahin Social Development le Management kai le ṭhehsuak kan mal tuk fawn. Ziangkhalle pawlkawm a tam cu a sual lo nan ka sim duhmi sawn cu in funkhawm theitu pawlkawm kan nei theilomi hi a pawi tukmi cu a si. Cumi ih rahsuah cu Falam mino lakah “leadership” a um ngaingai thei lo. Leadership a um lo tikah kan kaihruai aw thei lo ih kan tha a cak thei ngaingai lo. Ṭhimnakah Mizopawl cun YMA, Hakha cun CYO tivek an nei ih khimi hmangin tampi an cangvai thei ih an tha tla a cak, ziangahtile an lakah Leadership a um. Cucun a funkhawm hai.

Kan nih Falam ahcun, ṭhimnakah Falam khawsungah “Falam Mino Pawlkom” a um ko nan Falam khawsung lawng a huap. Tahan lamah FPTP pawl an cangvai thei phah nan an nih le phunsang tlawng kaipawl lawng a huap lala. Yangon ih Falam Pawlpi Mino khal Yangon umpawl deuh lawng a si fawn. An lakah network a um lo ih a pakpak ten an um thluh. Hlanih CCYI kha tluangten feh sehla ruahsannak a um hmel nan tu cu a thawmvang kan thei nawn fawn lo. GYFO hi tufang Falam mino ih kan neihsun pawlkawm ih cak deuh bik an si. An nih le an mah GYFO ten an feh ih Falam mino zaten in huap ngaingai lo, ta neih in kan nei thei lo. Cubetah GYFO in FYC maw puai pakhatkhat asiloe activities a neih tikah palai ih sawm hleice deuh a nei fawn. Cutikah FYC le GYFO khal anmah EC ta ah a neih aw cio men. Ziang a va si hmanah GYFO cu ramsung ih hrambunawmi a si lo.

Falam mino hmuahhmuah in huap theitu, mai ta neih ih kan neih cio thei dingmi pawlkom kan ṭul. Falam mino zate lakah network asilole leadership a um a ṭul. Ahleice in Falam khaw sungih Falam Minopawl, Tahan ih Minopawl le Yangon ih minopawl (a cang thei le ramleng tiang) hi hmin bangawmi, tumtah bangawmi le hnaṭuan bangawmi “Pawlkom” kan neih a ṭul. Cumi um sehla cumi sungah Falam mino zaten kan burkhawm aw thei ding, kan funkhawm aw thei ding. Cule kan tha a hung thar sal dingih kan cak sal ding. Kan lakah network a um a ṭulih Leadership tla a um a ṭul. Mi dangpi veve bangih thil pakhat khat, puai pakhat khat tuah ding khalle theihpi awlo le ngaihsak aw lo vekih um cun hma kan sawt dah lo ding. 

Himi network lole leadership kan neih thei ahcun cozah khalin kan Chin(Falam) ah an duhduh in an cangvai ngam lo ding, kan khua kan ramah kan mai duhnak le lungkimpinak telloin thil an ti ngam lo ding, an ti asi khalle awkhat suahin ring zet le huham nei zetin kan au thei ding. Tu kan umdan cu hmaisa ah Falam ih Purang an sak tum laiih kan ti thei um sun cu Online in zuk kan tuah ih “No more Pagodas in Falam” ti kha kan profile ah kan tar, cule pawlkom pahnih khatte in a pakpak teten duhlonak ca kan lang ter. A ṭha lo tinak siloin cucun ziangtin saw hmual pinzet a neih thei ding?

 Himi network lole Leadership kan neih hlan sung cu kan mipi (ahleicein mino) ziangtik hmanah kan hoha thluh thei lo ding. Ziangtlukin Minopawl hi Ram le Miphun hrangah kan tharthawh ih kan tundinawk sal a tul ticu hruaitu na si dah ahcun na fiang tuk ding. Hitluk Lai mino tamnak Yangon khawlipi ah Falam Pawlpi Mino hminin Meeting an nei ih mi 11 lawng kan suak, Tahan le Falam khalah Ram le Miphun hrangah meeting ko hai awla bulpak ih nasatei na sawm ciamco lo ahcun minung hitluk bak an suak lo ding. Himi in a sim duhmi cu kan pumpi hrang malte tal a tel lo ahcun kan paih cio lo, tikcu kan pe thei nawn lo. Kan zee, kan ngui thluh a si ko. Himi ih a hram (source) kan zoh asile kan mah Falam mino lakah Leadership a um lo lawlaw ti cu a fiang. Falam mino lakah Network or Leadership ṭha te kan neih thei lohli lo ahcun next generation ahcun Falam a tlu, a bah kan ti kei, sirawknak thuanthu kha kan rel sal lala ding.