H1N1 Flu Ihsin Ziangtin Kan Him Ding?

H1N1 Flu nat a suah rero lai ah mi tampi cun humhimawk thei daan lamzin an hawl cio. Hmanseh hivek nat hi kham thluh verver theinak lamzin cu an hmu thei hrih lo, asinan himi nat kham thei dingah kan taksa ih cahnak le thazang cahter daan lamzin cu a um.

Ziangvekpawl Kan Hrial Ding

Ahleice in tuvek tikcu ahcun zinkapih rawlpawl kha theitawp hrial ding.

Nga-kuang tivek rei-ret-theih ih tuahmi rawlpawl kha damlo caan ahcun hrial ding.

H1N1 nat ruangih khuhkhuh, damlo, raibur kiang ihsin 1m hla ah um ding.

Kaa, mit, le hnar kha a cang theitawk thamlo zuam ding.

Mi-pawm, mi-hnam, cibai tivek kha theitawk hrial ding.

Ziangvekpawl Kan Tuah Ding

Vitamin D Ummi Tirawlpawl Ei Aw

Milai taksa ah Vitamin D a tam asile hivek tlangrai nat a dem ngaingai. India ih Nat-hrik Sawnawktheihpawl Zingzawitu Pawlkom ih Dr. Sanjay Gandhi ih hmuhsuahmi vek asile Vitamin D ummi ei tam asile H1N1 nathrik ngah a har deuh tin a sim. Cupawl lakah Paa hi Vitamin D tamzet telmi a si. Cun Salmon Nga, Saldin Nga le Arti-mupawl tal hi Vitamin D tel tamzetmipawl an si.

Nisa Ai Aw

Nisa ai hin H1N1 ngah theinak a mal ter. Sibawipawlin ni khatah minutes 20 hrawng, zarhkhat ah ni 3 hrawng ni-ainak hin H1N1 ngah lo dingin mi a bawm tin an sim. Kan taksa kha ni in a tlet ngah tikah Vitamin D tha a suah ter thei.

Thazang Ummi Rawlpawl

Kan thazang a cak asile H1N1 nat lut ding a har deuh. Vitamin A, B, le C in kan thazang cak dingin tampi in bawm thei. Buh-sen, Nicia kan (sun flower seed), sa le nga pawl tla thazang ummi an si. Khasuan rang le thing khalah Antioxidants timi tha a tel ruangah kan taksa a thiangter hleiah thazang tampi mi a pe.

Ka-huh (mask) hman ding.

Na raibur, khuhkhuh asile pavua hupaw in felfai le thianghlim tei um ding.

Mibur umnak kha a cang theitawk hrial ding.

Kut khawlh leuhleuh ding. Kut khawlh a remcang lo asile tidai ṭullomi Alcohol ummi kutkholhnak thawn kholh ding a si.

Bulpak thianhlimnak kha theitawk ngaihsak ding.

Khamawknak sii (vaccinated) dawt ding.

Probiotics

Kan taksa hrangah cawhnawi le cawhnawi-uih (Ding-chi) pawl tla hi a thupi zetmi an si. Hivek a ṭhami bacteria pawl hin kan pum sungih rawlpawl kha a ṭha ter. Kan pumsungah acid pawl a suah ih kan thazang a cak ter hleiah a ṭihnungmi bacteria pawl tla a kham thei fawn.

Na Damlo Asile

Na nat pang asile tidai tampin ei aw, thazang ummi thing-theitipawl tampin in aw. Tidai tla hi hivek tlangrai khamnak dingah a thupi zetmi a si.  Cu hnuah thing-theirah, hanghnah hangrahpawl tla tampin ei aw. Hivekin kan taksam tampi a cak ter. Damlo veten a naibik siikhan ah feh lohli ih tuamhlawmawk lohli ding a si.

Ref: The Health Site, myfoodmyanmar, online