Itthat Theilo Zaan

Itthat Thei Lo Zan

Ting HLei Thang

Tui zan cu aw! Ziang ka ti saw? Ka va itthat har lawmam ve. Sun ah Coffe ka inn maw si? Ai ka inn fawn lo. Laphettuk teh ka ei maw si? Ei fawn lo. Ziangka cang si pei? Thinharnak, thil tuahsualmi ka nei maw si? Tuisun ah khacun itthat thei lo ding khawp ih thiltisualmi ka neih lai le ka thei fawn lo. Asilole Ka Nu Le Pa, ka Unau, ka sung le pawl ka ngaituk si pei maw? Ka ngai ve ko e, asinan itthat thei lo ding khawp cun hitawk ka um nak tla a rei thlang fawn a si thei lo. Zuuntuar ruangih itthat thei lo le si fawn lo. Thaisun le tlawngkai ding a si fawn, zinglam nahzi pathum a ti thlang fawn. Cazirnak ih sing le a ttha fawn lo ka itthat lohli lo cun cazirnak ah ka sing tengteng ding ticu thei na cing in itthat lam cu ka pan thei cuang lo.

Aw! Ziangah saw hiti maimai ih ihthah thei lo cu a ngah lo ding, a ruang(reason) umlo ih itthat thei lo cu a cangthei lo ti’n itthah cu ka vun tum mengmang nan a ngaihnak a um lo. Ihthah thei nak hi lungte sar ih sar ci le a rak si lo. Cutin umngaihnak thei lo’n 123 sal a ttha an ti kha ti’n ka vun sal hnik ding ka ti. 123 cu ka vun sal ve, “100 tiang hrawng siarle theih lo sungah a itthat aw mai anti” 200 ka siarsuak verver, ka bengvar deuhdeuh. Ka numbert siarmi maw ka sirher saw tamsawn ding ti hman ka thei lo. “Nuamtetei thawthawt ih ziangruat lo ih mai thawthawtmi lawng ruat le itthat a awl an ti”, ka tuah ve fawn, ka fim deuhdeuh in ka thei aw.

Hla tla ngai sehla ka ti ih hla tthattha BJ, Menrihai, Kurbungbel, Kunrirak hla pawl Mai Farmenpar, Parcinmawi, Lalrinpui hla pawl ka ngai zinglam nahzi pathum, pali kimnak men, itthahnak cun I pan cuang lo ih itthahnak ih thlansan zomi vek ah ka cang deuhdeuh, ka ningthlang, hla khal ka ngai paih nawn lo, ka itthat thei cuang fawn lo. Mithli Biazai Groups, Capoh hnihsuak Groups le Nonawn Calai Titi Groups pawl tal ah ca vun siar keng ka ti,  cuizan ngelcel cu a tlaithlang ih si pei maw? Cathar pakhat hman a um lo. Online ih biak ding rualpi le pakhat hman um lo, ph biak ding tile midang hrang ah zinglam ihthat thawt lai a si fawn. Pawimawh um vek ah an ruat ding ti phangah ka bia ngam fawn lo. Ihthat thei lo ih ttha antimi hmuahhmuah ka tuah ttheh, itthatnak thawn kan hla aw deuhdeuh vek in ka thei aw men.

Ka bei a dawng, ka talbuai, sir ka her, caan in le I rak hngak ve lo, khuacu a vang zik taktak. Aw! A va har tak em. Ka rualpi pawl ka zoh le a hngawk durdo men. Khua ih kan inn siate sung ih ka nui kiang ih thawtak ih ka itthat lai kha ka vun mang curco. Cucun hitin thu ka ruat. Lairam ih pengtleitli  kan inn siate sungah hmuah thaw duahdo in ka itthat sikhawah hitawk ttaihinn pi le sufa sungah ziangah ka itthath thei lo? Ei-in lamle sinfen lam ah le cuti’ thinharnak ding a umtuk fawn lo. Ziangbik saw si ke? A va mak ve! Ihthat thei lo nak hiteh khuitawk ih ra saw a si ke? Ihthat thei lo hi zawi tuahmi saw a si ke? Ihthat thei le thei lo teh ziangahha kan um ke? Tipawl thu tampi ka ruah hnuh ah, aw! Zankhat ihthah nak khal hi Lalpa Pathian ta a rak si ti fiangten ka thei suak ih zankhat itthah thei a man hlatzia cu zawi sim lo’n ka fiang nasa.

Cuihlanah ihhmuh thawi tei ihthah thei nak hi keimai lam ah a rak um ah ka rak ruat ringring cuh. Thil ka ti tthat can le ka lungawi I piang itthat thei mai ding ah ka rak ruat aw cuh. Asilo zankhat ihhmuh thawtei itthat thei dingah Lalpa Pathian in harsatnak, mualphonak, ningzahnak, riahsiatnak, mitthlitlaknak lak ihsin in runsuak hnuah thawten in rak ihthah ter a rak si sawn.

Ka zau ih ka itthat; Cule himte in ka tthang sal, Ziangah tile Lalpa Pathian in I kilveng (Saam 3:5). Thawtak ih in itthah ter lawng a si lo himdamten Amah lala in in kai tho sal. Amen, a va sunglawi em.   Cucun tui thawtuk ih ka ei mi rawl pawl ih manhlatzia khal ka fiang sinsin ih tui thawtak ih ka eimi rawl pawl hi nikhat nini ah tuizan ih ka itthah thei lo bang in a thawtnak thei mumal nawn lo in ka ei leh ding ti I fiang ter ih Lungawithu sim lam ah ka nun cu a phar. Ihthah thawtnak hi innttha le ihkhun ttha lam a rak si lo e. Rawlei thawtnak khal hi a rawl lam ah a rak si lo, Lalpa Pathian hnen sawn ah ti cu ka fiang vuarvi.

Tuihlanah damnak, ihhmuhthawtnak,rawlei thawtnak, hnagnamnak, ka feh thei, ka to thei, ka suahvah thei pawl hi Pathian thlawsuah ah ka rak ruah dah nahe. Keimai ta asilole a rak umcia ah ka ruat men cuteh. Keimah te cun zankhat te hman itthat ko in ka tuah aw thei lo ih, rawi eikhat hman ka thaw ko in ka rak tuah aw thei lo a si hi tin ka nun in Lalpa Pathian cu a thangthat ngaingai. Pathian in ka theih lo in thlawsuah I rak pe tamtuk ih ka hna a rak ngam tuk ih a mah khal ka rak mangngaih lo lehlam sawn.  Pathian in a lak ih thlawsuah in rak pekmi pawl ka rak theithiam lo sawn a sisi.

Aw! tuizan ka ihthah thei lo mangbang ih ka thuruahmi pawl cu aw! Man a va nei lawmam ve. Pathian in a thlawsuah siar thiam dingah harnak nasatak phunkim le mithlithlak nak thawn a zangfahnak I siar ter thei tuk nan, a zangfahnak maksakcun zankhat itthah thei lo nak te lawng in a zangfahnak, thlawsuah hmuifu I siar ter sawn cu kan nun in Lalpa Pathian thangthat lo thei a rak si lo.  Hikhal hi tuarnak phen ih thlawsuahnak phunkhat cu a rak sisi tin ka nun in Lalpa Pathian cu a thangthat.  Amen.