PA Hnenih Cakuat

‎"PA hnenih cakuat" 

Mai Van Kil Sung @ Aprilis Sung

Falam Christian Fellowship, Singapore (FCFS) hohanak thawn "PA" sunlawihnak ih tawlrelmi "Pa hnenih cakuat" ngan zuamawknak ah Zuamṭha (Consolation) Lawmman ngahtu ih cakuat.

June 17, 2012

Ka duhdawt zet mi ka pa,

Ka duhdawt zet mi le ka ngai zet mi ka pa, thlarau, thinlung, taksa ah damnak na rak hmu ti ka thei ih a hmaisabik ah Pathian hmin ka thangṭhat. Kei tla Pathian zarah ka dam nasa. Ka lo ngai tuk, ka pa!

Ei le in tla kha na thlahdah pang maw? Minung kan si sungah cun harhdamnak hi a sunglawibik mi laksawng a si. Ka nu teh kha a dam ṭha maw? Ka ngai tuk! Thla in camsak ti ka thei ih ka lung a awiin ka hna a ngam tuk. Kei tla nan hrangah thlacam ka bang dah lo sokhaw.


A thianghlim zet mi zing khawvang ah a mawibik le a thlumbik mi awkam neitu ka nu in in kaitho. A sangbik mi le zianghman ih tahṭhim theihlomi duhdawtnak neitu ka pa in thlawsuah in run pe. Ka pa, na duhdawtnak cu na fale kan hrangah a luangliam. Pathain ih in pekmi thilri le sumsaw, kan neih ṭilva le thingtheipawl khal in rak tep hai e, ka pa, na ṭhatnak. Minung par lawngah si loin Pathian sersiam ramsapawl par khalah duhdawt zangfahnak na nei ti ka thei. Pangpar le thingthei kilkhawi hna na thiam ih inhnenpawl ih mitkemza khalin na nung dah fawn lo. Ka pa, fale hrangah cawntlak nun neitu patling na si. Ka feh hlante ih ka nu thawn ka lu parih thla in cam, thlawsuah in rak pekmi in, thin beidawngnak ka tawn can ah thli bangin in semhlohsaksal ṭheu. Thil ziangkim ka tawnmi in ka pa, nangmah le na thusimmi lawnglawng in mangtersal ṭheu. Ziangahtile ka hrangih thil ziangkim in rak timtuahsakcia ruangah a si. Ka pa, ka lung a awi tuk!

Ka pa, ka lung a awi tuk ti ka nawlhsal ding. Hivek dinhmun tiang in thlentu le harsatnak ka tawn can ah thazang in pe ringringtu cu ka pa nangmah hi na si. Harnak ziangvek khal hriallote’n na fale kan hrangah zawnzaiin hna na rak ṭuan. Insang hrang na ruah ruangah khawsik, khawsa le a sur a bek lakah hna na rak ṭuan. Ka pa, na duhdawtnak cu hi ka cafung le ka cahnah parih ngan menin a daih lo. Thinsautei’ hna na ṭuanzia le na mi duhdawt thiamziapawl tla ka mit roriin ka hmu. Zan ihhmuh khawp lo le bang emem ih hna na ṭuan can ah na fale kannih in aa tak le zianghman theithiam loin kan duhduh kan rak lo dil ṭheu. Cui can hmanah kawk le thinheng sianglote’n in rak kilkhawi ih Pathian hnenih thla in rak camsak ṭheu kha ka mitthlam ah a lang ringring. Ka pa, ka lo ngai tuk aw!

Ka pa, ka dam sung hmuahhmuah hmanih ka sam thei lo ding mi duhdawtnak in rak pe. Mi ka daw ding ti na phan ruangah nangmah sawn ningzahnak na rak tuar. Tlawng ṭhate’n ka kai theinak dingah na dang duh hman ei ngam loin, “Na tlawng hrang,” in rak ti ringring kha, ka pa, ka ruatsal ih ka rak aa tuk ti lo cu sim ding dang a um lo. Ka sim thei umsun cu, "In ngaithiam aw," timi ṭongkam khatte hi a si. Ziangvek harsatnak ka tawn can hmanah, ka pa, na thlacamnak aw le thazang in peknak awkampawl cu ka hrangah sii ṭhabik le ka thazang tlungtertu an si ringring. Can hnihkhat mitthli tla beidawng le harsatnak phunzakip in in bawm ka ti lai can khalah, ka pa, na awkam le in kenmi Baibal cate le in sim ringring mi, “Ziangvek dinhmun na thlen khalah thla cam ringring aw,” in timite hin, "Ka tuahsuak ding, ka tumtahmi ka hlensuak ding," ti ka thinlung kha a tharthawhsal ṭheu ih thinlung thar le ruahnak thar thawn in cawm vivo.

“Miharsa le nu le pa nei lo mifarahpawl zangfah hna le duhdawt hna thiam uh,” tiih in cahmi ka thlun ruangah ka lamzin ah Pathian in thlawsuahnak thawn sangka in awnsak vivo. Mifarah zawnzai sungih suak kan si vekin thil mankhungkhung mi pek thei mi zianghman kan nei lo. Kan pek thei umsun cu "Duhdawtnak" lawng timi in sim ringring ruangah mikip hnenih duhdawtnak pek thei hi ka tumtahmi le ka zuam rero mi a si.

“Laimi cu relsiatawk le kan hmang, kan aa si,” tiih mah miphun hman duhdawt thiam lo ih ka rak phun rero can ah ka pa, in rak sim ringring mi, “Hmundang, ramdang nan thlen tikih a lo zohbiktu ding le a lo ruatbiktu ding cu anmah thotho sokhaw,” tiih in sim ṭheu mi kha, tu ih FCFS hruaitupawl le an mi duhdawt ngaihsak thiamzia ka hmuh vete’n, "Aw…, ka pai’ in sim ṭheu mi kha," ti'n ka pa, na thusimmi ka vun theisuaksal. Kan calai kilkhawidan ihsin thawk na theihtawkte ih in rak zirhmi in tuni tiang kan calai le nunphungpawl zahpi lo ih duhdawt cawimawi hna le kilkhawi hna in thiamter. Ka pa, ka hrangah na man a khung tuk aw!

“ Kan ram a ṭha lo tuk tiin phun rero hlah. Ram hrangah tuahsuak thei mi ka nei maw ti hawlin tuahsuak tum sawn aw,” in rak timi kha in sim laiah cu zianghman lo si hmang ka rak ti. Asinan, miphun dang le ram dang hnenih ka thlen tikah ka pa, na thusimpawl ka thinlung ah an suaksal. Ramdang ih inn ṭhaṭha le thil mankhungkhung aiin sung kimteih kan rak tlanlennak Lairam ih na runinnte kha ka ngaibik mi a rak si tho tho.

“Kan kawhhran ih um cu a nuam lo tuk tiih na phun rero hnakin, kan kawhhran taksa, thlarau lam ah ziangti’n kan ṭhangso thei ding ti ruat sawn aw. Pathian hnaṭuan cu a sunglawibik mi hnaṭuan a si,” in rak ti ṭheu ruangah tuni tiang Pathian hnaṭuan hi ka hrilmi hnaṭuan a si. “Kan pastor-pawl le Pathian hnaṭuantupawl hi thlacamnak in simaw, nan bawm theidandanin bawm uh,” tiih in sim ringring ruangah khuihmun ka thlen ah siseh, keimah hnakih bawi upapawl le Pathian hnaṭuantupawl sunlawih-upat ka thiam vivo. Ka lung a awi tuk, ka pa, fimnak phunkim in rak zirhtu nangmah na si. Cun, “Tikcucan hman na thiam lo le na siraw leh ding,” tiih ka tlawngkai laiih in rak simmi cu hmun dang, ram dang ka thlen tiangin tikcu a thupitzia le a can hmanteih hmandanpawl ka cing lanta. Ka pa, mi vekin phunsang kaiin dikari sangsang ngah lo hmanla, ka hrangah fimnak mankhungbik neitu le in zirhsuak theitu cu nangmah na si thotho. Ka lung a awi tuk, ka pa!

Thla in camsak ti thei cingin ka lo ngensal ding, ka pa. Ka nu na duat thaimzia le na falepawl in kilkhawinak ka hmu vivo ih nangmah vek insang mawi din theitu Salai ka ṭul. “Pathian in tuah theilomi a nei lo,” tiih in rak sim ṭheu kha Pathian hnenah thlacamnak thawn in rak hlansaksal ka beisei. Ka lo duh tuk, ka pa! Ka pa, thil ziangkim hi in rak simcia ṭheu nan na fa kei theithiam loin can tampi ka rak liamter zo, "In ngaithiam aw." Tu ah cun thla in camsaknak awthlamte ngaiin le in kenmi na thlawsuah ṭongkamte thinlung ah khumin ka neihsun thazang suah phah thawn hna ka ṭuan lai. Ka pa, ka lo ngai tuk!

Ka sentet lai ihsin in pawm in cawitu ka pa, leilung ih um kan si vekin umtlang ringring thei loin ṭhenaw hmannung, thinlung hmunkhatte’n Pathian hnenah thla kan camtlang ding maw, ka pa. Lungawi can lawng si loin harsat mangbang can khalah ka kiangnaibik ih in dinpi ringringtu ka pa, ka lungawinak thu ka lo hlan nawn lehsal. Aa tak le thiam lo takih ka rak tuahmi sualnak hmuahhmuah khal cingkenglote’n in ngaithiam ti ka thei ih ka lung a awiin ka hna a ngam sinsin. Ka pa, ka hrangah na sung tuk e! Na thusimmi thlun theitu le na lamzin sialsaknak parih fehsuak theitu, na hrangih fanu sunglawi si thei dingin ka zuam vivo. Tawnsalnak can ṭha kan ngahsal theinak dingah Pathian hnenah ka hlan.

Harsat can ih a tuar hna thiamtu le lungawi can khalih cintawktei’ nundan thiamtu, ziangkim ah duhdawt ngaidamnak thawi’ nungtu na si peh vivo theinak dingah Pathian hminin thlawsuah ka lo pe duh hrih. Ka pa, hi ka mitthli thawi’ ka nganmi ka lungawinak le ka lo ngainak cate hin, ka pa, na thinlung sungah ka lo duhdawtzia theiin na aipuang ve ding ti zumnak ka nei. Ka pa, ka lo ngai tuk ti, hi ka cakuatte in na kutnem ka lo kai. Tawnsal hlan tiang mang ṭha.

Duhdawtnak thawn hi ca a lo kuattu,

Na fanu Sungte,
Singapore — with Aprilis Sung.