CAKZET LE RALTHAZET IN UM AW

By: Pastor Caleb Laltinhrem
Hi thu ngan dingin I sawmtu 
CYA (Chin Youth Association) parah ka lungawi.

“Cakzet le Ral‘thazet in um aw, ziangahtile hi mipawl co dingah an pu le pe dingah sesam in ka tiamtami ram zem aw. Cakin ngamzet awla; Ka siahhlawh Moses in a lo simmi dan zulhin fimkhur ten thlun aw; na fehnak kipih hlawhtling dingah vawrhlam le kehlam ah pial hlah. Na ka ihsin hi danbu feh hlo hlahseh, asinan a sungih thu zaten fimkhur ten sunzan ngaihtuah aw; culawngah na fehnak kipah na ‘thangso dingih cule na hlawhtling ding. ‘Cakzet le ral‘thazet in um aw; thinphang hlah, na thin khal nau fawn hlah! tiah thu Ka lo pe a si lo maw?’ Ziangahtile na fehnak kipah LALPA na Pathian in A lo umpi,” Joshua 1:6-9

Joshua Cabu: Angantu cu amah Joshua a si, 1400-1370 BC hrawngih nganmi, Pathian tiamkammi ram an lakdan thuanthu simfiangnak cabu maktara a si.

Joshua Cu: Egypt ram ih piangsuakmi Egypt ihsin Canaan an pan laiah Moses bawmtu a rak si, Moses thih hnu Israel hruaitu thar a si.

Joshua ih hmin takngai cu Hoshea (Num. 13:8; Deut. 32:44); “rundamnak” timi a khihhmuh. Nelrawn ramcar an um laiah Moses in Yehoshua ti’n a thleng sak, a sullam cu “Yahweh cu rundamnak” (Yahweh is Salvation) (Num. 13:16). Joshua cu thuthang‘tha simtu, zawlnei kamsang le pastor a sive lo. Israel ralkap burpi hruaitu pakhat a rak si. A hna‘tuan a hlawhtlinnak, ral a nehnak, ralkap lam ih thil a ti thei ziapawl cu Pathian hnen lawngin rami an si, cuih Pathian cu kan luatnak (our salvation) a si.

Joshua ih Cahnak le Ral?hatnak: Joshua hi micak le ral‘thazet a si hrimhrim ding. Asinan mumal nei lopi’n cak le ral‘tha cu a si lo. Ziangruangah a cak ih a ral‘tha timi thungai thlakte’n tui‘tum cu kan zir tlang pei.

1.  Zumnak le Rinnak: Ziangha a zum? Pathian ‘tawngkam. A pu le pi san laiih Pathian tiamkammi ‘tawngkam cu a siatbal thei loih a hmun ding timi a zum hnget. Zumnak tel loin ral‘that le cah a theih taktak lo. A cangsuak tengteng ding, zaanmang vekmen a si lo ding timi zum ngam phawt cun midang ngam lomi na ngam ding, midang cahlonak ah na cak ding, cak ti cu nehtu asilole hlawhtling tikhalin kan sim thei. Thutak, thudik a thei, a theihmi cu zumnak thawn a hawl/tuan/hmang suak. A cahnak le ralthatnak ih hrampi cu a zumnak a si. A ralthat hlanah a theihmi thu cu a dikih thutak a si timi a thei fiang. A thei ih a zummipawl cu;

Pathian tiamkammi: “Joshua hnenah, ‘Moses hnenih ka sim zo vekin nan palmi leiram cu nanmah Ka miphun ka lo pe zo a si,” 1:3. Bungkhat a fate pakhat ihsin kan zoh tikah Joshua in thutak ziangtin a thei ti kan hmu thei. Cuih a theihmi cu theihnak menin a cemral ter lo, zumnak in a theihmi thutak cu cangsuak koin a tuahsuak. Joshua in a zumnak cu a theihmi Pathian tawngkam parah a thum tawpih cucu a cahnak le ralthatnak hrampi a si.

Pathian tawngkam kan hrangih remruat khawkhan laireldanpawl ziangti’n kan thei fiang thei ding. Bible zohzirnak in. Pathian tawngkam le tiamkammipawl theih na duhih, cuih A tawngkam le tiamkammipawl cu ziangtin kan nunram ah hlawknak le rahsuah a um thei ding ti theih na duh asile thinlung thlarau takin Bible hliakhlainak nei aw. Pathian tawngkampawl na thei fiang, na zumih na fehpi ngam taktak asi ahcun zianghman tihphan ding a um nawn lo. Na cak in na ral a tha ringring ding. Na cak in na ral a tha lo asile na theihmi thu cu na theihfeng taktak lo ruangah a si theiih na zummi ziang a si ti khal na fiang lo tinak a si. Theihfeng lomi parah thumawk a theih lo, hngatawk a theihlo. Thuhlolak na theiih thuhlolak na zum, na theihmi cu thuhlolak, na zummi cu thuhlolak tinak. Rom. 8:32, “A Fapa malneihsun hman zuah lo le uilote’n in Petu Lalpan thildang kan tulsammi a lakin in pe loin a um ding maw.” Amen. Pathian thu hi kan thei neknek vek a bang nan, kan nun ram in a tep ban lo hi Satan hnatuan pakhat a si. Kan zum taktak lawngah kan nitin nuntu khawsaknak hrangah mangbang vansang in kan um lo ding. Na thinhar, na mangbang, na thinphang asile Pathian na rinsanman a um maw si. Um lo, na rinsan taktak lo tinak.

Tuisun ah ziang na thei? Zo hnenin, asilole, ziangtin na thei? Cuih na theihmi thuhla cu thutak/thudik/thutha a si ti ziangti’n na thei thei ding? Na theih fellomi cu na zum thei taktak pei maw? Ziangahtile zumnak cu theihfelnak in a ra (Rom. 10:17). Na theihfeng lomi cu ziangti’n ka zum na tithei nawn ding? Bible in zumnak lo cun Pathian lungawiter a theih lo a ti fawn (Heb. 11:6). Kan zum kan ti cu theihfeng lo ahcun Pathianin in pawmsak lo. Kan theihfeng lomi kan zum kan ti theu ruangah kan nitin nunram khualtlawnnak zalam tluanah Jesui hmel kan pu lo, a lang lo. Tuahtuannak um lo zumnak cu zumnak thi a si (James 2:26).

Pathianin thuphan a per lo: Lalpa Pathian cu milai a si lo ruangah thuphan a per thei lo. Thudik lawng a simsuak (Num. 23:19). Joshua ih theihmi le a zummi cu “Pathian in thuphan a per lo, Pathian in i bum lo ding,” tihi a si. Israelpawl lakmi Canaan ram cu an ta a si lanta ding titu cu Lalpa a si. Lalpa’n Joshua hnenih a tiamkammi cu ‘Moses hnenih A rak um bangin amah Joshua hnen khalih um ve ding hi’ a si. Hitin A sim, “Na Pathian cu na fehnak hmun tinkim ah a lo umpi camcin ding.” Joshua hrangah a va hnangam thlak zik ve. Joshua ih a theihmi pakhat cu, Danpeksalnak 31:6 hi a si, “Cak uhla tha tho uh, tih lo uhla, phang hlah uh, ziangahtile LALPA na Pathian in A lo fehpi; A lo tulhsan lo ding, A lo thlauthla fawn lo ding.”

Zumnak cu tiamkammi parah a thum aw fawn. Hrekkhatin thu tiamkam an tuah, asinan, ziangtlukin a cangsuak ding ti a fiang dahlo. Rinsan le zumtlak a si pei maw? Rinsantlak le zumtlak a si le silo hawlsuahnak ding cu zo (who) in thu tiamkamnak a tuah timi hi a si. Leitlun khawmual tinkip ih acozah kumpi kan zoh asile hrilawknak um tinte’n thutiamkamnak in mipi thinlung lak thei cuhawk a si. Thilcangsuak thei lo dingmi an tiamkammi el-theih loin kan hmu thluh. Hrekkhat cu tuansuakmi um ko nan a tamsawn cu tuan suak thei lomi an si. Rinsan ih zum a theihnak dingah zo (who) in cuih tiamkamnak cu a tuah timi kan hawlih theihfeng a tul. Joshua cun a hnenih tawngkam thawn tiamkamnak Tuahtu cu Zo A Si timi a rak thei fiang. Thuphanper thei lo Pathian a si zia a thei fiang. Rinsantlak le zumtlak a sizia khal a hmufiang. A tawng le sim vekin a cangsuak ringring tikhal a thei.

Kan hrangah Lalpan ziangvek thu tiamkamnak in neih sak ti hman kan thei lo ahcun Amah rinsan dan le zumdan ding lamzin a um lo. Theih lomi zum a theih lo. Curuangah kan thin a har, kan vansang tiriltawk nun thluhnak a si. Khristian nunram cu nunpi lamlam, a rim hman a nam in kan nam ban hrih lo khi a rak si. Kan hla aw tuk lai.

Pathian tawngkam siar le theiih zumhngettupawl cu mihualvantha taktak an si (Rev. 1:3; 22:7; Prov. 8:34). An theihmi zumih nunpi ngamtu le Amah Pathian ah beunak hawltu cu mihualvantha an si (Sam. 2:12). Asile, khui tawk, khui ram ah beunak kan hawl. Beunak le zalennak kan hawldan hi Pathian duhzawng a si maw si lo. Pathian in thuphan a sim thei lo. A lo tiammi parah na taksa thinlung thlarau zate’n sungbung thluh awla, cuti’n a ram le felnak hawl hmaisa awla, thildang cu a lo pe vivo ding, a lo thlahthlam lo ding, a lo fehsan lo ding, dunglet a lo tun lo ding (Matt. 6:33). Thuphanter thei lo Pathian na rinsan lo, na zum ngam taktak lo asile na leiram nun cu na theihawk lo laiah leilung sungah a ziamral rero khi a si. Hlimnak na hawl ding nan na hmu lo ding. Relhnak le beunak na hmu suak dah lo ding. Na cak in na ral a tha dah lo ding.

2. Hruaitu Ding (v.6): Hruaitu cu tihhrut le phungphai thlu lo tiangtiang in mi-nunnem niakno asile hlawhtlinnak a hlawhsam thei. Ralthat hi sual le hngal a si cuang lo. Mipi hnawksak celcel, phunzai hmang, dokalh hmang, beidawng mai, tihhrut, zumnak nei lo mipipawl hruaitu a si ding ruangah cakzet le ralthazetih a um a tul. Hruaitu sinak ih harbik miangmo caan, ‘mipi tamsawn duhdanih feh theih lo caan’ khalah cakzet le ralthazet ih thudik tan ngam, thutak vekten mipi hruai thei a tul. Pathian hin hipawl a theihcia ruangah “Tihphannak nei lo dingin cakzet le ralthazetin um aw, na palmi leiram zate’n na ta a si ding, na hnenah KA um in KA feh ding” ti’n Joshua cu thazang a  peknak a si.

Kan liangparih thumawmi thuthawn pehparawin Pathian aw lawng kan ngai le A mithmai lawng kan zoh tul caan a thlen tikah cakzet le ralthazet ih kan um lo ahcun dungtawlh vivonak a si pang thei, hlawhtlin theilonak a si thei. Joshua bangin kan tuanmi parah cakzet le ralthazet in kan um thei a thupi. Amah Lalpai’ duhdan sawn kan hawl-ih kan nunpi asile khawvel hmaiah mualpho ningzak si hman nung-na Lalpai’ mit-muril ah a sunglawitukmi fanu fapa kan si. Halleluiah, Amen. Zo ih thlah/hmanmi ka si? Zo ka si? Ziang ka tuah/tuan? Zo hrangah ka tuah/tuan tipawl kan theihfeng lawngah cakzet le ralthazet in kan hnatuan sunzawm thei ding.

3. Danbu Thlunnak in Hlawhtlinnak (vv.7-8): Moses hnenih pekmi dan, Moses ih simmi dan cu Joshua hrangah cun nehnak asilole sunralnak a si thei. Simduhmicu; a theihmi dan cu a thlun lo asile a hlawhsam kei, a thlun asile a thangso kei a hlawhtling ding (vv. 7-8). Ziangtik hmanah Pathian in kan siatnak dingah dan in pe dah lo. Kan luatnak ding, kan thanso ih kan hlawhtlinnak ding lawngah dan in pe. Milaipawlin in pekmi dan kan thlun duhlo ruangah kan tumsuk, kan hlawhsam, a sukso ih kan vahvaihnak le kan hlohral reronak a si. Joshua cu a hlawhtlingmi hruaitu, a cakzet le ralthazetmi hruaitu si thei ding cun Pathian tawngkampawl a theih lawngmen ah tawpter loin a thlun ih a nunpi a tul. Curuangah Lalpan “Moses in a lo simmi danpawl zulhin fimkhurte’n thlunaw; na ka ihsin feh hlo hlahseh, fimkhurte’n sunzan ngaihtuah aw, culawngah na fehnak kipah na thangso dingih na hlawhtling ding,” a ti (vv. 7:8). Joshua in hrildingmi a nei, Pathian tawngkam vekten feh, asilole amai’ duhdan le mipi duhdan vekten feh, pakhat khat a hril a tul. Ziang na hril ve ding?

Tuisun zumtu Khristianpawl khalin a dikmi thansonak le hlawhtlinnak kan hawlih kan dawi asile Pathian thu thlunnun lawngin kan hmuin kan congah thei ding. Pathian dan lengpi’n na feh/nung ih na thanso na hlawhtling asikhalle Satan in Pathian hmel phentu dingih a hmanmi an si thei. A sukso kan vahtawihnak ah Pathian dan cu kan thinlung ah pai tahratin, kan tai ah tem hnget tahratin, kan kut le ke ah ret tahratin a thupek vekte’n kan khawsuak thei asile khuihmun kan um asikhalle kan tlasam ringring lo ding, harsatnak thim khawzing sungah kan um ringring lo ding. Lungawinak le hlawhtlinnak ni engmawi kan hrangah A hersuakter leh ding. Cuih hlawhtlinnak le lungawinak cu Amah Lalpai’ hnen ihsin rami a si ruangah zohmanih lawn a theih nawn lo, a hlo thei nawn lo, a cem thei nawn lo ding. Halleluiah, Amen. Tuarfainak le thinsaunak thawn hngak lawngte a tul theu.

Pathian ka thei, ka zum na timi cu ziangti’n na theiih zianghrangah na zum? Rumdamtu lawngah na zum maw? A lo Kilkhawitu, Sawmdawltu, Khaisangtu, Cawmtu, Kaihruaitu dingah na zum ve lo ding maw? “Ka Zum” na ti. Thaisun hrangah mangbang thinhar in na um asile na zummi ZO a si timi na theifiang taktak lo, cuih zumnak cu tuahtuannak um lomi asile zumnak thi a si. Zumlotu hnakin ?hathnemnak nei lo, a hminmen Khristian sa-tliah na si ti theiaw. Khristian taktak si thei dingin Pathian thu hawl aw.

Cutin Lalpai thupek kan thlunih kan nunpi ringring thei asile thlawsuah in pekmi Canaan ram cu kan ta a si rignring kei, ziangtinkim ah kan lamzin a tluang zuahzo ding (Dan. 5:32-33). Maw casiartu, Amah Lalpa lawng rinsan in a tawngkam ah ding sawnin leitlun hlawnthilri hawl uhsi. Pathian tawngkam thlun cu cahnak le ralthatnak a siih a cemnetnak ahcun hlawhtlinnak le nehnak sunglawi a si. Jesu in, “Ka fanu/fapa na ti tha” ti’n A lo lawm leh ding, cumi cu cuanin zumtupawl cu zumnak thawn feh ding kan si.

4. Pathian Umpizia theihfeng nun (v.9b): “Cak uhla tha tho uh, tih lo uhla, phang hlahuh, ziangahtile Lalpa na Pathian in A lo fehpi, A lo tulhsan lo dingih, A lo thlauthla fawn lo ding,” Dan. 31:6. Joshua in Lalpa’n i/in umpi timi a thei fiang thlepthlep. Rinhelhnak mithnawmtia khal a nei lo. Hiti’n Israel mipipawl hnenah Joshua in thazang a pe hngehnge, “tih lo uhla; phang hlahuh, raltha uhla ngam ko uh, nan domi ral zate parah LALPA IN A lo tuahsak ding,” Joshua 10:25. Joshua in Moses ih tawngkam Danpeksalnak 7:19 ih Pathian in Israelpawl A kilhim zia le miphun dangpawl kut sung ihsin A ban thacak le A human maksak thawn A rak luatter thu a ruat ringring. Ka fehnak le ka palnak kip ah, a sur a sa lakah siseh, a tlum a alnak ah siseh Lalpa’n I umpi a si ti a thei fiang. Pathian umpi cencilhnak thuthawn pehparawin rinhelhnak a nei lo. Za ah za Amah Lalpa ah a thumaw. A zumnak cu Amah Lalpa ah a ret. Cucu cakzet le ralthazet in mipi a hruaisuak theinak le tiamciami Canaan ram a lak theinak a si. Milai cahnak le ralkap hriamnam parah a thumaw lo, ralkap thazang ah a thumaw fawn lo, Lalpa ah a thumaw sawn. Amah Lalpa a rinsan hlenhlen ruangah Lalpa daite’n a to men thei lo, a phuangsuak aw.

Tuisun zumtupawl nunram ah ziangruangah Lalpa a phuangsuak aw thei lo, Pathian kutcak a lang lo kan ti asile hna le thluak lawngin Pathian kan thei, kan bia, thinlung ah Pathian A LAL taktak lo, kaa lawngin kan duhdaw, kan zum, thinlung muril takin kan duh lo, kan zum lo ruangah a si. Hrekkhat zumtupawl cu Pathian ih umpi cencilhnak hi kan rinsan in kan zum taktak lo, Pathian ih ban thacak rinsan loin kanmai’ thluak le duhdan sawnah kan thumaw thluh. Ka har asikhalle Ahmin ruangah a pawi lo kan ti thei taktak lo. Ahmin ruangih tuarnak hla mawimawi cu vei sawm sahra tawlphawng zik le dang pit zik thluh koin kan sak cio, kan thusim thiampawlin in simin in zirh rero ko nan, a bakin kan sak, a bakin kan sim. Leiba na kuan a tul. Culole Lalpa’n A lo cawh leh ding. Ziangtheilo mipi cu um hrihseh, Pathian duhzet le rinsanzet vek le thlaraumi zet vekih kan thusim thiampawlin an simmi an phatsan, an zumnak an fehsan, an renmi Pathian an tlansan, sumlesaw dawiin hmun nuam ram nuam lam an pan murmo rero hmuh tikah Pathianmi taktak hrangah ninghang loin um a theih lo. Harsatnak phen ah lungawinak le Pathian thlawsuah a um tiah in zirhtu le in simtupawl atu ah khuiram an thleng thluh. Ruat aw fel ta loin Pathian hnatuan hi mualphonak men a si. Pathian hnatuan cu phurnak men le pumcawmnak menih tuantu cun rei an daih dah lo ding. Jeremiah cu a khua le ram le mipi ngainatnak ruangih a tah ruangro bangin tap ve thei kan um lo hi thlaraulam ah kan niam zia a lang.

Pathian thawn harsatnak tuar tlang cu Satan thawn sui innpi sungih bawi tuan tlang hnakin a tha deuh. Pathian thawn harsatnak tuar cu Ahmin sunlawinak, Aram kauhnak, Athu ah thansonak, Amah lawng rinsannak, milai cahnak ah hngatawklonak, Pathian hnen ihsin rami thlawsuah thianghlim le sunglawiconak an si. Aw a va nuam zik em, cuih nun cu. Pathianmi le zumtu taktak cun Pathian thawn Amah Pathian hrangah harsatnak tuar cu tuartlak hmanah an ruat awk lo laiah, tulai Khristian tamzet le Pathian hna ka tuan tiawpawl nun ram zohtikah Pathian hrangih harsatnak tuar cu zahthlak, ningzakza, duhumlo, mivansia, sualman, nunman nei lo ah kan ruataw thluh. Lalpa, na hmaiah kan sualnak hi a tumtuk zo. In ngaithiam hramaw. Paul cun, Jesui ruangah harsatnak tuar cu tuartlakah a ruataw lo, a tuar ngah cu Amah Jesui zangfah lainat ngilneihnak ruang sawnah a si a ti.

5. Thinphang le Thinnau In A Um Lo (v. 9a): A hnawksakzetmi mipi, mai’ duhdan le ruahdan lawngih nung le tawng luplo mipi lakah le ral tampi do ding ummi karlakah Joshua in Pathian ?awngkam a theihmi cu a zum hngetih Amah Lalpa a rinsan ruangah thinphang le thinnau in a rak um lo. Mipipawl sawn thinpit le thinnau lo dingin a zirhin thazang a pe (Joshua 10:25). Minung ciocio, ziangruangah Joshua cu thinphang le thinnau loin a um thei? Amah Umpitu ZO a si timi a theifiangih Amah ah ruahsannak a neih ruangah a si. Israel Pathian in I fehpiin I umpi ringring ding timi a theifiang. Thinphang le thinnau ih kan um asile Lalpa kan rinsan lo tinak a si tikhal a theifiang. Pathian in ral cu I do sak thluh ding, mipi khal I hruai suak sak ding timi a zum hnget. Lalpa tel locun zianghman lomen ka siih Lalpa thawn ka feh ahcun Amah in ka lamzin I hruai kei I kilkhawi ding ti a theifiang ih za ah za a zum.

Cangantu hi thinphan le thinnau tivek a nei ve lo. A san a um. Amah le amah hnakin, milai zovek hnakin tlinglo cingten a renmi Pathian cu ZO a si timi a theihfeng ve ruangah a si. Pathian hrangah harsatnak tuartlak hmanah a ruataw loih, a tlakmi cu thih le hell-ram thlen men. Pathian hrangah harsatnak a tuar lo hi thlaraulam ah a cah theilonak a si ti theifiangawin Lalpai’ hrangah retheih zawnzaihnak tuar cu a hreh hrimhrim lo. A tuanmi thuthawn pehpar awin ningzak le thanau tivek khalin a um dah lo. A tuldan danin a sur a sa lakah hna a tuan hrumhro mai. A har a nuam, a thlum a al ti loin a cemnet tiang rinumte’n a hrangih rak thi Jesui’ hrangah nung thei ringring dingin ni tin zan tin thla a cam, a nun a hlan aw ringring. Relsiatnak karlakah, dodalnak karlakah, harsatnak karlakah, thlaksam caan khalah Amah Jesui’ hmel lawng zohin a cemnet tiang tuan suak/tlang thei dingin thazang a pe aw ringring. Bible a zohzirin a hliakhlai ringring. Cutin Kristianpawl tlanzuamnak lamzinpi parah a sur a sa ti loin, a har a nuam ti loin a tlan hnelhno thei hi nunman a neihbiknak in a thei aw sawn. Halleluiah, Amen. Mai’ nun ram ih um lo, midang nun lawnglawng zohih thusim khalhi veihnih khat cu a nin um men in a thei. Asancu mai’ nun ramih um lomi thusim khi thawk le khat hrangah cun a tha vek a bangnan rei a daihin a nung taktak lo. Rawngbawlnak sungah harsatnak a tuarmipawl cu a nunram tuammawitu ah cangsuak sawn dingin a zuam. Keh vawrh zoh loin Jesui hmel lawng zohin a nun a sersiam aw rero. Thaisun hrangah a thin a har lo. Tuartlak hmanah a ruataw loih tuar tulmi cu Pathian hnenah lungawithu sim phahin tuar suak teno thei dingin thlaza a cam. Cakzet le ralthazet in Pathian hna a tuan.  A renmi Pathian cu ZO a si timi a nun muril in a tep ih a thawtzia a tep taktak. Pathian hnatuan lo rawl thawthaw ei thei hnakin Pathian hnatuannak ah cencerh rin khal thaw le tlai sawnin a theiaw. Amen. Nun di a riam hlunhlo. Khawvel hi seherh tlakah a ruat lo. Vancungram thlen tikah a lu parih um dingmi suilukhum lawng cuanin at hlawh tiangin thudik a sim, thutak a phuang suak.

Casiartu zumtu, na ni tin nuntu khawsaknak thuthawn pehparawin mangbang vansang in na um caan ah ziang na tuah? Na zumnak khuitawkah na ret? Na ruahsannak cu khuitawkah a um? America, Australia, Canada, Malaysia tivek ah maw a um? A lo runsuak theitu cu himi rampawl maw an si. Pathian thinhengnak a simi sualnak cu America ramah atu hi nikhat hnu nikhat a pung vivo ti kan thei. Nunau le nunau, mipa le mipa umtlang, hi sualnak hi Sadom le Kaw-maw-ra minungpawl sualnak a rak si. Pathianin a fih lawlaw. Na tumtahmi ram na thlen tikah thin nuam hlenhlen in na um thei cuang maw? Ka thi thei nawn lo ding ti’n maw na ruat awk? Ka harsa lo ding tin maw na ruat hrih? A lo hnemtu cu Lalpa si sawn sehla a va duh um so. Lalpa na rinsan taktak ahcun khuiram khalah um hmanla na thinphang in na tha nau hrimhrim lo ding. Na neihmi parah na thin diriam ten Amah Lalpai hnenah lungawithu na sim thei ding. Zovek ramih um khal na daw lo kei na ngai sang cuang lo ding. Cuih nun cu Paul ih nun thup a si, “Nun har tei’ nun ziangvek a si ti ka thei, neih tamih nun teh ziangvek a si ti khal ka thei; ziangtikah le ziangvek dinhmunah siseh, puar le rilrawngih umdan siseh, nei zet le hlawhsam zetih umdan thuthup khal siseh, ka zir thiam thlang,” Filippi 4:12. Paulin ziangkim ah nan lungkim in nan lungawi ringring seh a ti.

Na thinphan le na thanau kha thildang zianghman a si lo, na neihmi parah na lungkim tawklo, na lungawi tawklo, thildang phu tuk laiin na theiaw ih a si. Na hnakih neinung, thiamsang na zoh ruangah. Na hnakih misiatha zoh awla, Lalpai’ hnenah lungawithu simnak ding lawngin na khat ding.

Thutlangkawm: Cakzet le ralthazet ih na um theinak dingah Pathian in na hrangah ziangvek tawngkam A tawngih tiamkamnak A lo tuahsak timi na theih a tul. Pathian ih rinum zia le Amai’ caan teih cangvai a si zia khal na theihfeng ih na hrang khalah a tlai dah lo, Amai’ caan teah A lang leh ding timi na zumih na hngak thiam a tul. Thuphanper ve dah lo Pathian asikhal na zum a tul. A lo fialmi ziang a si timi na theih feng a tul. A lo fialmi cu el-aw hlah, Amah rinsannak thawn tuan mai aw, Amah in a lo tuansuak sak thluh ding. A thu thlunnun neih ding a thupibik. A thu na thlun phawt cun Moses hnen le Joshua hnenih A rak um, A rak feh vekin na hnen khalah A um in A feh ve ding. Na ral A lo do sak ding. A duhzawng thei dingin Bible Ca Thianghlim siar ringring aw. Lalpai’ tawngkam ngai in hawl ringring aw. Pathian in Bible hmang loin tuisan ah thu A sim nawn lo. Bible hmang loin A lo sim ve nawn lo ding. A lo simmi cu thlun in nunpi taktak fawnaw. Pathian ih Umpinak cu zumhngetawla na ruahsannak zate’n Amai’ hnenah hlan aw. Cutin na tuah asile na cak kei na ral a tha ding. Thinphang le thinhar in na um lo ding. Thaisun hrangah na buai lo ding. Thaisun neitu le tuahtu Lalpa na neih cun tawktuk zoin na thei kei na hna a ngam hiahhiah ding. Cuti’n Cakzet le Ralthazet in na um ringring thei ding. Amen.