Chin Pawlpi Le Chin Kumthar Thuanthu Tawi

CHIN PAWLPI LE CHIN KUMTHAR THUANTHU TAWI

Akaikhawmtu : Fung Dun

Thuhmahruai

America ramah kum 1950 hrawng in Laimi upa pawl an rak thleng thok zo nan a thleng hmaisa pawl hi zirnak lamih thleng an rak si vekin pumpak mi malte lawng  an rak si. Cuihnu kum 1970 hnu lam in hnatuan ding ih thleng na, unau sungkhat kawhnak ih thleng na, ti’n innsang in an rak thleng thok ve.1990 tiang ah cun inn sang siar theih an si lai. Aburbur ih mi senpi thlennak ngaingai  cu kum 2000 hrawng in a si. 1998 ih sin 2001 tiang Guam lamih sin siseh, 2000 ih hnu lamin India le Malaysia lam in siseh, tulai santiluan vekin US ah mi burpi ih thlen a si ih tu ah cun zatei theihawk ding hman a har zet thlang.

Laimi cu sungkhat unau, rualpi le miphun duhdawtu kan si vekin hmaisa ih rak thleng pawl khal in 1986 kum lamih sin Dawngpui puai tuah in Battle Creek, Frederick, Davenport, le Chigaco lamah  an rak hmangtlang theu. Cuvek thotho in hmun dang ih um unau pawl khalin 1994 thokin FANGER puai tin Atlanta ah zuamawknak pawl thawn nuam zetin an rak hmangtlang  theu ve.

Chin Pawlpi hramttohnak le Lailun Foundation

2002 cun Laimi tawkfangzet US kan thleng zo ruangah hmun dangdang ah um hman sehla pehzomawknak kan neih a ttul ti kan thinlungah a suak cio. Ton khawmawk kan neih nakah pawlkom neih ding thu kan lung a kim cio. Cumi laifang ah Lailun Foundation ih huaihawtnak in Atlanta khualipi ah Falam Calai Seminar(Chin Calai Seminar) tuah a si ih hmuntin ih sin sawmmi siseh, sawm ban lo mi siseh, Falam le calai duhdawtnak thinlung thawn kan suak cio. Himi Chin Calai Seminar tuah sung July 05, 2002 zanah mipi tongkhawmaw in Pu William Ngoon Lyan tei inn ah thurel nak neih a si. Himi zanah Chin Pawlpi din suak ding lungkim cio a sinan Chin Calai Seminar ih kaitu lawng cun USA um Chinmi kan huap thei lo ding ti ruahnak ruangah kawmiti dinsuak loin Tawlreltu ding kawmiti (Tungzing Kawmiti-Organizing Committee) tin din suah sawn a si.

( Chin Pawlpi (USA) hi Lailun Foundation huaihawt nakih tuahmi Chin Calai Seminar 2002  July 05 ni  Atlanta, GA ih hramttoh thawkmi pawlpi a si. Ahmin khalah Chin Community of USA si ding in lung a kim a si.)

Himi Chin Pawlpi cangsuak dingah tawlreltu ding Tungzing Kawmiti ih hrilmi upa pawl cu: (1) Dr. David Lai Sum (Convenor), (2) Pu Fung Dun (Co-convenor), (3) Pu Sui Ling, (4) Pu Hrang Thawng, (5) Pu Tin Ko, (6) Pu Lal Nei Mang, le (7) Salai Van Tuah Piang pawl hril an si.

Chin Kumthar Puai (Chin New Year Festival)

A hmaisabik Chin Kumthar Puai (Chin New Year Festival) cu Battle Creek, MI  ah 2002 November 28 – 30 (Thanksgiving week) ah tuah hmaisabik a si. Atlanta ih mipi tonkhawmnak sungihsin Chin Pawlpi cangsuak thei dingah Falam milesa tam nak bik Battle Creek in Chin Kumthar Puai inntek tuanvo in laksak uhla mipi tonawk khawmnakah hi Pawlpi khal kan din suak ding tiih dilnak  vekin kum 2002 Thanksgiving can senden in hmaisabik Chin Kumthar puai cu Battle Creek, MI ah tuah a si.

Cui si thokin kumtin te Falam milesa tam nak hmun Frederick (DC Area), Atlanta (GA) le Battle Creek (MI) ah a sangsang ih tuah vivo a si. Ahmaisabik kumthum sung 2002, 2003, le 2004 cu Thanksgiving day weekend senden in tuah a si. Kum 2005 ihsin Labor Day senden in tuah thok a si ih August cem zawng/September zarh hmaisabik ah tuah asi theu. Himi Labor day weekend tikcu le can hi nehhnu khalah a remcangbik le puai tuah nak ih kan hman vivo dingah ruah mi a si. 2009 ihsin Indianapolis (IN) Chin pawlpi khalin inntek tuanvo la thok in hmunthar ah Chin Kumthar puai tuahbet a si ih inntek la thei State panga kan nei zo.

Chin Pawlpi (USA) dinsuahnak

Himi Chin pawlpi (USA) dinsuah hlanah hmin ngaingai thawn rak din mi cu Battle Creek le National Capital Area pawl lawng tha ten a rak um. Himi pa hnih hlan ah cun a thleng hmaisa pawl Pu Sai Ling Thang, Pu Lalawng, Pu Thawnghmung, Pu Hrangthawng, Pu Sang Lyen te pawl le Pu Kawl Lian , Pu Jacob Lian, Pu Van Lian Kio le a dangdang ih rak tuah mi cu a um hnuaihni zo nan peh zom nak ngaingai kumtin a um nawn lo tluk asi. Curuang khal ah tui Chin Pawlpi hi laimi kan zatei’ cihsih awk thei nak dingah din a ttul kan ti nak asi. Kan upa pawl an rak neih cia mi a tthat zia an hmuh ruangah an mah ih tha pek nak le tel pi nak in din suah thei a si.

Chin Pawlpi (USA) cu Battle Creek ah din suah a si. 

Chin Pawlpi (USA) hi 2002 Thanksgiving zungpih senden in November 29-30 Battle Creek ih Chin Kumthar puai tuahnak ih sin din suah mi a si.

 A thawh keh nak ngaingai cu tlunlam ih sim zo bangin Lailun Foundation ih huaihawt nak ihsin July 5-6, 2002 Atlanta khualipi ih tuah mi Chin Calai Seminar ah Falam milesa kan tongaw khawm ih Chinmi hi tampi US ah kan um zo nan sihcih awknak le pehtlaih awk nak ngai ngai kan nei hrih lo ruangah pawlkom kan tul ti zapi lungkim cio a si ih kan calai le nunphung kilkhawi dingah siseh, siat-that tontikah siseh, pakhat le pakhat theihthiam awkih duhdawt sinsin thei nak dingah tin pawlpi rak din tum a si.    

 Asinan hi ttum hi LAILUN FOUNDATION ih meeting kawh mi a si ruangah mi senpi zapi a huap thluh deuh lo pang ding tiah Kawmiti ngaingai din lo in Organizing Committee (Tungzing Kawmiti) a rak din aw sawn. Himi a thawhkeh thurel nakah Pu Hrang Thawng khal a tel ve ruangah Battle Creek um Chin unau pawlin thanksgiving ah puaipi tuah in in sawm uh la kan din suak pei tiah mizapi khal in kan duh thusam kan langter ih kan ngen ta. Himi dilnak parah Battle Creek ih tuanvo neitu pawl le misenpi ih lungkim nak vekin 2002 November Thanksgiving zarh sungah Battle Creek nulepa pawl in inntek tuanvo an la ih cumi Thanksgiving/Chin Kumthar puai tuahnak ih sin hmaisabik hril awk nak thawn tumtah cia vekin Chin Pawlpi (USA) cu din suah a si.

Chin Pawlpi din theinak lungthu pathum

Tlun lam ih kan sim zo vekin Chin Pawlpi dinsuahnak cu Lailun Foundation ih huaihawt nakih tuahmi Chin Calai Seminar, a tuah nak hmun Atlanta khualipi  le a dinsuak nak ngaingai Battle Creek pawl hi an si. Atlanta upa pakhat in “Chin Pawlpi thawhkeh nak Attlanta” a ti vekin, Lailun Foundation upa pakhat khal in “Chin Pawlpi thawhkehnak Lailun Foundation” a ti ve. Cuvek thotho in a dinsuak nak hmun cu Battle Creek a si ruangah ‘Chin Pawlpi suahkeh nak Battle Creek “ ti khal a theih tho tho. Curuangah Chin Pawlpi (USA) din suak tu hi Lailun Foundation, Atlanta, le Battle Creek an pathum ih komkhawmawknak le Chin mi pi pawlih din suah mi a si.

Hmaisabik Chin Pawlpi hruaitu pawl:

Hmaisabik Chin Pawlpi hruai awkdan hi Hotu ah President ti um lo in Board of Secretaries tin feh a si ih General Secretary (Sungtuankim) hi Hotu lukaibik a si.

Board of Secretaries hruaitu upa hril suakmi pawl cu:

1)      General Secretary -  Pu Defence Lalawng

2)      Assistant General Secretary - Pu Hre Mang

3)      Cultural Secretary - Pu Edward Thawnghmung

4)      Finance Secretary - Pu Dr. Biak Hlei Mang

5)      Social and Humanitarian Secretary -  Pu Thang Bur

6)      Education and Literature Secretary - Pu Dr. David Lai Sum

Chin Pawlpi in a thokpek ih a rak TUMTAHMI pawl tla cu:

1.     Fimthiamnak le nuncan khawsak nakah Chin thanso nak ding.

            (To enhance the Chin in Education and Social Welfare)

       2.  Chin Calai le Nunphung kilkhawi ih nunter ding

             (To create a greater awareness of the Chin Literature and Culture)

3.     Pawlpi sungih siat le that ton tikah theihawk ih bomawk ding

             (To help and award the loss and achievement of its member)

4.     Chin pakhat le khat theihthiamawk nak le duhdawt nak karh sinsin ding.

            (To create an intimacy and more friendship among the Chins).

5.     Thlarau thazang hrangih thanso thei nak ding

            (To uplift the spiritual nourishment of the Chins).

Himi pawl hi pawlkom din pekih a rak tumtah mi a si. Tu ah cun hi hnak ih kau sawn in bet vivo a si.

Chin Pawlpi (USA) ih tuanvo nei kaihruaitu pawl

Hmaisabik Chin Pawlpi hruai awkdan hi Board of Secretaries tin feh a si ih hotu ah President ti um lo in Hotu lu bik cu General Secretary a si. 2005 kum hnu lawngah President ret sal a si ih Chin Pawlpi Hotu lubik cu President a si thlang. Hi hruai awkdan hi upa lak hman ah a thei fiang lo an um ruangah theih fiang ding ih ngan mi a si. Chin Pawlpi hruaitu pawl lakin hotu bik le sungtuan hmin lawngtuitum ah ngan an si.

Chin Pawlpi Hotu pawl (Hotu le Sungtuankim)

1.      Pu Defence Lalawng -        General Secretary  (2002-2004) 

Hmaisabik Sungtuankim hmin in Hotu tuan hmaisabik tu a si.

  Pu Hre Mang              Asstant General Secretary  (2002-2004)

2.      Pu Sang Lyen             General Secretary (2004 – 2005)

  Pu Jacob Lian             Assistant General Secretary (2004-2005)

3.     Pu Sang Lyen              President  (2005 – 2008) Hotu

  Pu Jacob Lian             General Secretary (2005 – 2008)               

(2005 ih si thok in Chin Pawlpi Hotu hi President a si. Pu Sang Lyen hi General Secretary ih sin President a si cih ih Pu Jacob Lian cu General Secretary a si ve))

4.      Fung Dun                             President (2008 –    (Hotu)

Pu Hre Mang               General Secretary (2008 – 2009) (Sungtuankim)

             Pu Van Tuah Piang              General Secretary (2009-              (Sungtuankim)

Chin Pawlpi EC upa pawl

1.     Pu Fung Dun                                   Hotu

2.     Pu Winston Hrangthawng              Hotusang

3.     Pu Van Tuah Piang                        Sungtuankim

4.     Pu Tin Ko                               Sungtuankim bawmtu