Pinlong lungkimnak Ca

                                                                                                                                                                                                                            Dated,1947, 12,Feb,Pinlong

                                                                                                                                                                  PINLONG LUNGKIM TLANG NAK CA, 1947.

                        Mirang kumpi aiawh Kawlram uktu ih " Khawnbawl khawnsil" ( Executive Council ) sungtel hrek khat le Saohpas pawl zate hleiah Shanram kulh ,Kachin tlangtluan ram le Chin tlangtluan ram pawl ihsin palai pawl kai mi Pinlong khawpi ih tuah mi tonawk khawmnak (meeting ) ah-
                       
                       Kawlram "Lehlang acuzah " ( Interim Burmese Government ) thawn hmakhatten komawk nak ihsin Shanram,Kachinram le Chinram pawl cun zamrang deuhin Zalennak (freedom) kan ngah ding tin meeting kaitu pawlin kan zum ruangah meeting kaitu zaten elawknak um lo in a tang lam vekin kan thurual tlang asi.

                       1." Tlangparmi ttangrual khawnsil" ( Supreme Council Of United Hill Peoples ) aiawh palai pawlih lungkimpi nak thawn tlangparmi aiawh tu ding pakhat cu Mirang Governor in a hril pei ih, ramriram pawl( Frontier Area ) ih thu le hla ttuan rel tu dingin Mirang Governor ih " Thuronpa "( Counsellor) ah ret a si pei. 

                       2. Hi thuronpa ( counsellor ) hi Mirang Governor ih Khawnbawl Khawnsil ah kutkaih Department neilo ( portfolio ),Khawnsil sungtel ah tuah asi pei ih,ralkhamnak lam (  defence) le  ramleng thuhla ( External affair  ) pawlah daan le upadi vekin Khawnbawl Khawnsil ih thu hnuaiah a thlen bangin ramriram ( frontier area ) pawlih thu le hla pawl khal cu Khawnbawl Khawnsil ih thu hnuaiah thlen ter an si ve pei. Cu ti zawngin ramriram pawl thuronpa ( the Counsellor for Frontier Area ) cu thu neihnak pek asi pei.

                      3.Cui thuronpa cu a mah thawn miphun a bangawk lomi thurontu dang ( Deputy Counsellor ) pa (2) in an bawm pei.Cui thurontu dang pa (2) pawl cu an mah le cio thawn a sengmi hmunram pawlih thu le hla ttuanrel ding an sinan, a hmaisa thuronpa cun a dang ramriram pawlih thu le hla pawl a ttuanrel ding asi. An pathum ten daan le upadi vekin mahle ttuanvo ciar laak in ttuan tlang ter an si pei.

                      4. Thuronpa hi Khawnbawl Khawnsilah sungtel upa le ramriram pawlih palai umsun si in a tel dingnan,a mah bawmtu palai pa (2) pawl cun ramriram pawlih thu le hla ttawlrel canah  Khawnbawl Khawnsil ah kai ve theinak khuan pek an si pei.

                      5. A tlunih lungkim tlangmi vekin Mirang kumpi aiawh ih Khawnbawl Khawnsil cu karh le tum ter a si ding nain ,ramriram pawlih ramsung ukawknak cu ziang vek khalin siseh pakhatkhat sungral dingin cui Khawnsil cun a tuah lo pei.Ramriram pawl hrangah ramsung ukawk nakah mahte thuneihnak zatek kim ( Full percent) nei seh timi thu cu kan lungkim tlang a si.

                      6.A komawk zo mi Kawlram sungah Kachin ramkulh pakhat a hranten ramri tuah ih dinh ding timi thubuai cu rampi Parliament ih relcat ding a sinan,cutivekih ramkulh hrante pakhat ret a ttha ticu kan lungkim tlang a si.Cui tumtahnak hlensuak dingih karbak pakhatnak cu 1935 Kawlram Act upadi,part 2 rampawl vekin Myitkyina le Bahmo district pawl ukawknak thu ah ramriram thuronpa le a bawmtu pa (2) kha ron le relpi an si pei.

                       7. Ramriram ( Frontier Area ) pawlih ramnu,rampa ( citizens) pawl cu Demoracy ram pawlah " hramttoh " (basic) ti ih an pommi " Covo " (rights) a zaten co theinak neih ter an si pei.

                       8. Hi Agreement ih kan lungkim tlangmi thu le hla pawl cun Shan ramkulh ah tu ih pek cia zo mi sumpai lam thawn a sengaw mi mahte thuneihnak cu a siat ter lo pei.

                       9. Hi Agreement ih kan lungkim tlang mi thu le hla pawl cun Kawlram " Siah " (revenues) sumpai sung ihsin Kachin tlangtluan ram pawl le Chin tlangtlaun ram pawlih an ngah ding zat sumpai bomnak cu a siat ter lo pei.Kawlram le Shanramkulh ih sumpai lam programme vekin Kachin tlangtluan le Chin tlangtluan pawlah hman ve a theih ding maw ,ding lo ti cu Mirang Governor ih Khawnbawl Khawnsilin ramriram thuronpa le a bawm tu thuron pa (2) pawl thawn an cek fel pei.

Theih ding: Hi thu Chinca ih hun lehlin taktak hi thil ol asi lo,a  sawh duhmi pawl a sawh ngah lo pang ding ti phan a um zet ruangah ,Mirang ca thawn zoh cih uh tii kan lo sawm duh asi.

Note, Kawlpawl kan va kop mi hi kan pupa pawlin an va dil ciamco le an va tlon ciamco ruangih kom kan si lo,an mah Kawlpawlin kom dingin thutiam a phunphun pekin an sawm rero ruangah sawn a si tihi kan thei cio pei uh,tu ah " kan vakom nak he,kan mai mawh asisi kan tuar poh kei cu " tivek phunih ttong tu politician kan mi sungah an um ih hi bang pawlin U Aung San ih thurel mi cabupi an suah mi khi siar haiseh a ttha,cu tawkah U Aung San in tlangparmi pawl ziang tluk a leem ih ziang vek thutiam pawl apek timi an hmu ding.Cuvek le cuvekih a leem cing hmanin kan pupa mpawlin thutiamnak ca an va tuah thei lai,an tawk pam ka ti,kan pupa pawlin Kawlpawl hi zaa ah zaa in an zum lo ruangah hi vek thutiam an tuah nak asi ko ding,thutiam tuah timi a hnu ih a ra suak thei mi buainak pawl tuah tthat nak dingah asi.

       A tlunih lungkim nak ca kha zoh uh la Kawl acuzah in an thlun maw thlun lo ticu kan hmu mai ding,curuangah ngui men le to men thei kan si lo ,kan covo le kan right pawl cu au pi a ttul kan ti rero nak asi ,cun Agreement  sungah kum khua kom aw ding tinak khal a um lo,komhnu suahsal a ngah lo tinak khal a um lo, zalennak ol deuh ih ngah thei ding zum ruangah kom timen asi, hica sungah Union Country dinh tlang ding timi khal a um lo,curuangah kan ttih ruangah asi ,tu hmanah Independence Declaration tuah thei dinhmun ah a si kan din.

       Curuangah harh thlang uhsi,Kawlpawlih bumnak thang sungah lut tum nawn hlah uhsi, tu tidai khur lai ih tu ti dai thiang in tum a ngah lo ,kan hngah a ttul titu politician kan mi sungah an um ,kum 60 lenglo kan hngak hnu ah tidai thiang forkhat in dingah kum ziat kan hngak bet lai ding,kan miphun,kan biaknak,kan nunphung pawl an cimral ttheh zik thlang hmanah kan hngak hrih lai ding maw ,cuvek cu Kawl pawl ih bumnak ttong kam asi,kum khat ih ttheh theimi kum hra an ttuh tum ,kum hra ih thlen theimi lamzin kum za feh pi in tummi asi.Kawlpawl hi Democracy thawn a worthy lo mi miphun an si, rak zoh hman uh Kawlram ah kum zaa ziat hman liam hai seh Democracy diktakin an feh thei dah lo ding,Democracy taktakih kan feh ding a si ahcun Kawlral kap acuzah kha court ih dinter teng teng a ttul, cumi locun a fair theilo,cucu an duh ding maw ? duh hlah ee ,maimai ah ,curuangah Kawlram ah Democracy sun mang cu thlilakah a hlo dingmi vaivut vek asi.

    Kan nih Chinram cun Kawlpawl tello in kan mah ten kan ding thei ko,khua hlanah kum zaruk lenglo  cu ti vekih feh cia zo mi kan si,an ni ih bom kan ttul lo, kum 60 lenglo Kawlpawl thawn kan kom ih khui fangcang dip khat hman a lakin in pek lamlam lo kha, kan Chinram mau ttam a tlung lai hmanah Kawl acuzah in fang cang dip khat hman an pek lo kha, cu na cingin Kawl pawl hnen ihsin bomnak kan hngak lai ding maw ? hngak lo ee, ICC ah kan feh ding ,cutawkah kan hlawh tling le ve ten Independence Declaration kan tuah ding asi kha,nan tha nau hlah uh kan lamah Pathian a um ti kha thei cio uh ,zoi huat thu kan rello,zoi thilri hman kan fir lo,Pathian pekmi kan covo kan lak tummi men asi ,kan dik in kan hmaan a si kha.

    Kha le Pinlong Lungkim tlangnak ca cu nan hmai ah kan ca rori ih siar thei dingin kan lo thlen asi cu ,hikhal hi Pathian thlawsuah asi,kum hizat sung mengmang Pinlong lungkimnak ca hmudah lo kan tampi ,mipi hmuh ding khalin zohman in an tuah dah lo,Kawl acuzah tla cun mipi hmuh ding a ttih in a ttih mi asi ,Kawlpawl thawn nziangruangah kan kom timi khal thei cuca lo kan tam,ziangruangah harsa zetin kan um tikhal thei cuca lo kan tam,tu lawngah asi kan hmasi (scar ) kan hmuh lai,tu lawngah si kan hnuk  kan hmuh lai ,ICNM parah lungawi ding kan si. 

ICNM hi popular duh ruangih politic stunct kan tuah mi asilo, kan ram kan duhdawt taktak,kan mi le sa kan duhdawt taktak ruangih tuah mi asi,himi lo khalin kan ramsungah politic stunct tuah thei nak ding tampi a um ko ,asinan himi lamzin lo cun kan Independence thei fawn  lo ding .ICNM ih kan tumtah micu Chinram Independence laak hi asi, cumi dingah Pinlong Agreement kha base ah hmangin ICC ah Kawlram acuzah kha  lu kan va pu ding cu asi. 

   Hi Pinlong lungkimnak cakha nan kiangkap ummi kan mi le sa pawl hnenah rak zem sin cio uh si.

 Lungawi,
Pu Jimmy Thawng.