Hotu Pawl Tisual Tambikmi 10

HOTU PAWL TISUAL TAMBIKMI 10

(The Top Ten Mistakes Leaders Make)

Thuhmaihruai

Hotu zovek khalin thil an ti sual theh, a tam le a mal, a tum le a te lawng a bang aw lo. Mifim pawlin an tisualmi ihsin an zir ih thleng aw tahratin thiltha tampi an tuahsuak, an homi pawl hrangah thiltha tampi an tanta theu. Mi aa pawlin an thiltisualmi khal an pawm duh lo ih an thil tisualmi ihsin zir dah lo, an thihcilh ih an homi pawl parah siatnak tampi an thlenter, thasohnak tampi an kham theu. Leiltun milai, hotu zapi ten thil an tisual theu vekin hotu fim pawl cu anmah ih an tisual hlanah midang tuahsualmi ihsin an zirih fimkhur in anmai tuahsual pang dingmi an hrial thei theu. 

Curuangah a hnuailamah hotu pawlin an tuahsual tambikmi pahra pawl ihsin zir uhsi. Kan tuahsual rero mi asi ahcun zir ih thleng aw uhsi. Kan tuahsual ve dah lo asile tuahsualve lo dingin fimkhur uhsi. In hotu pawlin an tuahsual ve mi asi ahcun an zir awk theinak dingin bawm uhsi. Cuticun midang tuahsualmi ihsin zir tahratin kanmai hmaika ah a thleng theimi hrial tahratin kan hrang thatnak lamzin cu ngil zetin zawh thei cio dingin a hnuailam yar;angmi midang in an tuahsual theumi ihsin zir uhsi.

1. TLUNLAM IHSIN UKBETNAK (THE TOP-DOWN ATTITUDE)

Tlunlam ihsin hotu pawlih ukbet awknak hi milai suahpi mizia ihsin siseh kiangkap ihsin kan zirmi ihsin hotu pawlin an nunpimi asi. Asinan santharsan ahcun siahhlawh lungput nei hotu, a niambik dinhmunah phahniam aw tahratin hruaitu lungput neitu pawl hi a hlawhtlingbik an sisawn.

Tlunlam ihsin ukbettu hotu pawlin an thuneihnak cu diklo zetin an hmangsual theu. Tuanvo le canpual zem awknak an thuneihnak an hmang sual theu. Mipi le an hnuailam hnatuantu pawl ruahnak le dinhmun pawl an ngai pawimawh lo. Thuthluknak tuah tikah thuneihnak hmangin siseh thahrum hmangin siseh anmai duhzawngin ziangkim an fehter ringring. Anmai pulpak duhnak sawn cu thupibikah an ret ringringih an kutsung ihsin thuneihnak midang kutah a thleng dingmi an duhlo, an kaihhnget thei zatzat kaihhnget an tum ringring.

Tlunlam ihsin ukbet awknak hi leitlun miphun tintian in khuahlan ihsin an rak hmanmi uk awknak asi theh. Hotu pawl hrangah a awlsam bik khal asi. Milai suahpi mizia duhzawngin kaihhruai awknak khal asi. Asinan tlunlam ihsin ukbet awknak hin milai mizia siatvatnak pawl a langter theu. Tlunlam ihsin ukbet awknak cun hnatuantu pawl fimnak, theihnak, thiamnak, le duhnak pawl tla zalen zetin hmang suak theilo dingin an nambet theu asi.

Asile, tlunlam ukbet awknak vek siloin ziangtuah a tul? Hnatuan thaten a tuantu pawl lawm, laksawng pek, cawisan, canpualtha sangka onsak thiam a thupi. A harhdammi mibur si ding a thupi zet. Hnatuantu, hnatuanpi le mipi pawl thawn tikcu hmang tam, nuam zetin hnatuannak hmunah rualran zetin nun tlangnak, canpual tha hawlin zirnak le thansohnak sangka pi on thiam, cuticun a thangso thei ding pawl hrangah sangka onsakin senpi vangtlang, pawlkom le mibur thatnak cu bulpak tha timi hmaiah retin thansohnak hawlthiam ding a thupi.

Curualrualin hrial dingmi pawl tla a um. Dunglam thuanthu thalo pawl hmangin thanaunak, hnatuan caan khuahkhirh zetin ret awknak, milai nunnak le pehtlaihnak hnakin hnatuan thupisawnah retnak, nunphung le tuahkelte vek rori in ziangkim tuah tum ringringnak, le san nei lo dan le dun tumtah tuansuahnak daltu pawl, mahlemah zoh niam awknak, midang ukbet duhnak lungput, thansohnak daltu hnatuandan pawl, hrialthiam ding a thupi. Bawi Zisu in zohthim ding in tantami zoh asile midang ukbettu siloin siahhlawh hruaitu lungput le hnatuandan in kaihruai ding asi sawn.

Thungaithlakin ruatkhawm dingah a thupi zetmi tla cu a tawizawngin sim asile, zapi  rualran ten telkim theinak, hotu in ukbet si loin ruahnak duhdan burkhawm dingin kaihhruai awknak, democracy vekin a tamsawn lungkim tlang thei mi, pawlkom din tikah tlunlam lubik ih ukbet awknak si loin ruantlang ten tuantlangdan pawlkom ruangzingdan, le siahhlawh lungput thawn rian awk tawnnak le tumtah tuansuah tlangnak pawl tla hi thungai thlakin santhar minung pawlin kan ruatih a takramah kan nunpi thei ding a thupi zetmi asi.

Curuangah Bible sung thutlangpi thawn mil awin kan sim bet ding. Thuneihnak hmangsualin midang ukbet loin siahhlawh lungput sawn neih ding (John 13); alotheihlo in nekcep awknak in hnatuan fial awknak si loin mi zokhalin zalen zetin mai thiamzawng hnatuan tuan thei dingin duhhril theinak sangka on sakin anmai sinak Pathian in a sersiam vek cekci in hahdam zetin hnatuan theinak lamzin onsak ding (Eph 4); midang tulmi le duhnak ngaihthah loin midang in an hrangah an ngai pawimawh mi le an tulmi ngaihsak hlehle in tuantlangnak ( Phi.2); tlunlam ihsin ukbet awknak siloin rualran ten hnatuan tlang lungput nei sawn in ( I Pet. 5:1-4); midang in an tuan thei mi ah a tulmi thuneihnak kaihbet sak loin tuanvo an neihmi zalen zetin tuansuak thei dingin a tulmi thuneihnak peksuak ding ( I The. 5:11-14); bulpak duhnak, mai tanghai le mai duhzawng hawl si loin midang tungdingtu le thansohter tumtahnak le duhnak lungput nunpi sawn ding ( Col. 3:12,13) asi.

Hotu pakhat mipi in a dung an thlunnak san pa nga pawl tla cu:

5. Sinak. Lotheihlo in an tlun tengteng a tul.

4. Pehtlaih awknak ruangah. Lotheihlo ruangah si loin mipi pawlin anmai duhhrilnak liolio in an pehtlaih awknak ruangah hruaitu dung an thlun.

3.Tuanrah: Pawlkom hrangah hnatuan rahsuah ruangah mipi pawlin hruaitu dung an thlun.

2. Thansohter an si: Bulpak hlawknak, thathnemnak an ngahmi ruangah hruaitu dung an thlun.

1. Upatnak: Upatnak tlakmi hruaitu cu upatnaknak pe in mipi in a dung an thlun.

Hotu pawlin ukbet awknakin kaihhruai awknak hi an tisualmi tumbik lakah a pakhatnak asi.

2. MILAI HNAKIN HNATUAN THUPITTER SAWNNAK (PUTTING PAPER-WORK BEFORE PEOPLE)

Milai hnakin hnatuan thupi sawnah ret hi hotu pawlin an tisualmi tumpi pakhat asi. Hotu pakhat in hnatuan maw minung thupisawnah a ret ti ah ziangtin kan theithei ti asile a lungputah a lang theu asi. Hotu pakhat in mipi, bulpak le mibur in siseh an tulssammi an theihter tikah siseh pawlkom awknak neih duh tikah siseh ‘in hnaihnok’, ‘mahte um ka duh,’ ‘ka hnatuan a tamtuk’, ‘ka manlo’ tvp in mipi pawl harsatnak le tulsammi a ngaihthah, a ngai pawimawh lo tikah siseh mipi pawl tulsammi tuansuah hnakin hnatuanrah kha hlawhtlinak sawnah thupi sawnah tikcu a hmang tikah thiltumpi a tisual asi.

Ziangruangah milai hnakin hnatuan thupisawnah an ret theu ti asile an khawruah lungput diklo ruangah tla a rak si thei. Hnatuanrah cu milai hnakin siseh milai pehtlaihnak hnakin siseh thupisawnah retnak, thilri mithmuh theih cu mithmuhtheih lo hnakin thupisawnah ruahnak, ziang kan si timi hnakin ziang kan tuah timi tuannak in cuai thlai aw in milai man neihternak, milai pehtlaih awknak tha hnakin a tikcu ah ziangkim hnatuan theh ding thupi sawnah retnak pawl ruangah a rak si theu. Cutin hotu pakhat in mipi pawl tulsammi le duhmi pawl cu pehtlaih awknak tha nei in thiltha tuahnak canpualtha lak hna thiam loin hnaihnoktu vekin a ruat tikah thil tumpi a tisual asi.

Bawi Zisu leitlun a um lai ah milai pehtlaihnak ziangtlukin a thupitter ti kan hmu thei. Zisu in a thei (John 10:14-15), a tham hai ( Matt. 15:30), a tham hai (Luke 4:40), a damter hai ( Matt. 15:30), an nun a thleng ( John 13:15-17), tvp in ziangtlukin milai thawn pehtlaihnak, milai tulsammi cu a ngai pawimawh timi a langter. Bawi Zisu leitlunah taksa in a um lai ah Jerusalam biak inn pi sungah lalnak le upatnak a lak lo, pawlkom sung upa sinak a hawl lo. Asinan milai nunnak a thleng, milai hnakin a thupitermi pawlkom hnatuan, dinhmun leleitlun thilleri zianghman a um lo.

Mipi thawn bulpak pehtlaih awknak hi midang nun ciahneh dingin siseh an nun thlengnak ding hrang khalah hmanrua asi. Curuangah hotu pakhat ih nitin nunah mipi hrang tikcu a pek, a ret ringring dinghi a thupi tuk mi asi.

Curuangah thunetnak ah bet duhmi cu cahnah parah hnatuan si loin mipi thawn pehtlaihnak hrangah tikcu caan tampi pek a thupi. Suncaw ei tlannak, lehtlangnak, titi thunuam reltlangnak, laitlang dinhmun asile nga sio le ramtawi, ruai kiltlang le tlaklo feh tlangnak in siseh nawm awknak in siseh tulsammi ruat tlang tawlrel tlang, riahsiat lungawi ttawm aw tawn in, hnatuan a tam thei bik in mipi in an tuan thei ding zatin an kutsungah retin nuntlang tuantlang in hotu ih a kaihhruai thiam dinghi a thupi tuk mi asi. Cuticun nuntlang tuantlang asi tikah hnatuan hnakin a thupisawn mi cu milai le milai pehtlaih awknak asi ih hotu in a kaihhruaimi minung pawl cu amah riantu ah ahmang si loin an nun tungdingtu ding sawnah anmah thawn an nungtlang, hna an tuan tlang, an zir tlang, milai nunnak an tuah pitling rero asi sawn.

3. LAWM AWKNAK UM LO (THE ABSENCE OF AFFIRMATION)

Milai zokhalin lawm hi an duh theh. Hnatuan hlawhman lawng a tawk lo ih hnatuantu pawlin an tuan that vekin lawm, lungawinak langter hi a thupi tuk mi asi. Hotu pawlin hnatuantu pawl hnatuan cu an tuan ding hrimhrim asi tiah ruat pang loin an taimaknak, zuamnak, le tuanrah parah lawm thiam khal a thupi ngaingai asi. Cui hleiah hnatuantu lakah thanau mi siseh thacakmi siseh ziangvek tiang lawm le bawm, sawmdawl an tul timi khal theihthiamsak a thupi tuk mi asi.

Cuti asi ruangah, hotu pawlin mipi le hnatuantu pawl parah lungput le tuahnak in langter dingmi a thupi zetmi a um ti a fiang. An thu, ruahnak, hmuhdan, le harsatnak tulsammi pawl ngaithlaksak (James 1:19), an tulmi an dinhmunah telpi ve in (Rome 12:15), riahsiatnakah hnem aw tawn in (II Kor. 1:3-4), phurrit sawng aw tawn sawn ding (Kal. 6:2), khat le khat thazang pe aw tawn (I The. 5:11) ding asi. Zungsung tohmun hnatuan hnakin mipi thawn pehtlainak tha nei in an tuansuahmi, taimaknak le zuamnak parah lungawi sopar ten lawm, fak, thazang pek hi hotu pawl hnatuan sawn asi. Hnatuantha a tuahtu pawl ih hnatuannak pawl cu thuplak men loin langhngan in lungawi le lawmtlak mi cu mipi hmaiah langternak in hnatuantu pawlin thazang an ngah sawn asi.

4. MI CUNGCUANG PAWL DOKLAHNAK (NO ROOM FOR MAVERICKS)

Thleng awknak thlen theitu pawl hrangah sangka kharsak hi hotu in an tuahsual mi pakhat asi. Pawlkom tampi in an dinhmun kel ihsin hmailam pan thei dingin siseh harsatnak lak ihsin kilhim awknak hrangah siseh an lakah mi thangso rero, thleng awknak thlen thei tu ding bulpak nun danglam neitu pawl an hmu thiam lo theu. Culawng hman siloin hotu pawlin anmah hnakin a fimsawn le thei sawn tiah an ruahmi cu an dokalh, lamzin an phihsak ih thangso thei loin an donkham sawn theu asi. An huphurh. Cutin pawlkom tampi cun mi cungcuang, thleng awknak thlen theitu lamzin an phhihsak theu sawn asi. Ziangtin an sim theu ti asile, thleng awk nak cu a cang thei lo ding, kan tidan tuahdan asi lo, kan tuah zo nan kan hlawhtling lo, cuvek thleng awknak tuansuak dingin tikcu le sumpai a cem, kan tlinlo tiah a awlsam sawn mi an duhsawn theu. Cuihleiah hotu pawlin mi cungcuang pawl hmuhnak le theihnak vek an hmu in an theih ve lo tikah lamzin an phihsak theu. Ziangtin cuvek na sim thei, ziangtin kan tuah mi cu a dik lo tiah in sim ngam, ziang thuneihnak na nei, na theihlo ruangah asi, tvp in tihtarh awknak, huat awknak, thleidan awknak thawn hotu pawlin mi cungcuang, lamzinthar le thleng awknak thlensuah theitu ding pawl cu sangka an kharsak ih lamzin an phihsak sawn theu asi.

Thuanthu sungah micungcuang hleice kan hmuhthei mi hrekkhat pawl tla cu Dungthluntu Paul, Martin Luther, William Carrey, Lee Colson, Martin Luther King Jr., le Steve Job pawl tla hi an si. Hi pawlin anmai san cio ah thleng awknak, thilthar, lamzin hmailam fehnak an rak hmuh thawk tikah an umnak kel, pawlkom, mibur pawlin an rak co hlang lo ih an rak dokalh sawn theu asi.

Ziangtin mi cungcuang hleihluat pawl kan thei thei dingih an hrangah sangka kaupi ong in lamzin hmuhtu ah kan canter thei ding? Mi cungcuang hleihluat pawl cun anmai ruahnak hnakin pawlkom, mibur, mipi hrang thatnak thupisawnah an ruat; a tufang an umnak dinhmunah thleng awknak, danglamnak an langter, an thlenter; mipi pawl theih dingin an hmuhmi le theihmi an ausuahpi, midang an ciahneh ih thilthar, lamzinthar, rahtha an suahpi theu asi.

Curuangah mi cuangcuang, mi danglam hleice pawl cu hotu le mipi pawlin an hmuhmi le theihmi a takin mipi hrangah an hman tangkai theinak dingah sangka on sak; anmai hmuhmi le theihmi a takin tuansuak thei dingin tuanvo pek; an ruahnak thatha cu ngaisak in an thu ngai in thanglian, pitling thei dingin cantha pek;  anmai duhdan in an hmuhmi le theihmi tuansuak thei dingin zalennak pek, a tulmi bungrua le dinhmun pek; cutin an hmuhmi le theihmi pitling le hlawhtling zetin an tuansuak theinak ding hrangah bawmbawinak tiang pekin cantha peksawn ding asi.

Pawlkom le mibur lakah mi cungcuang hleice pawl cu anmah le hmuhnak theihnak vek cio in hnatuan tha an tuahsuak theinak ding hrangah hotu le mipi in lamzin sangka on sakin an tulmi dinhmun, hmanrua, cantha pawl pek sawn dingmi asi. Pawlkom, mibur, society ah thleng awknak a tulmi thleng aw thei dingin a thupi le tulmi dinhmunah a tuah theitu retnak lawngin a cang thei mi asi. Curuangah pawlkom, mibur le society tinah zo in ziangvek hmuhnak le theihnak thawn pawlkom le mipi cu hmailamah ziangvek tiang a fehpi thei ding timi zoh in mi cungcuang pawl dinhmun dik le a tulmi ah ret thiam hi thansohnak hrangah a thupi tuk mi asi.

5. UKBETNAK IN THUTHLUKNAK (DICTATORSHIP IN DECISION MAKING)

Thuthluknak tuah tikah dictatorship, ukbet awknak hi hotu in an tuahhsualmi tumbik pakhat asi. Dictators pawl cun bulpak milai man, bulpak ruahnak le duhdan pawl an palzutih hnatuantu pawl si loin hotu dinhmun sang kaitu in, midang ruahnak le duhdan rawn loin, thuthluknak an tuah tikah thil tumpi an tisual asi. Dictator pawl cun anmai duhdan in thuthluknak fehter dingin an thuneihnak cu diklo zetin, midang bulpak ruahnak le duhdan pawl palzutin thuthluknak an tuah theu. Midang ukbetnak, thuhluknak kaihbetnak pawl hi an tuahtheumi, tuahsualmi pakhat asi. Bible in a zirhmi thuthluknak le kaihhruainak cu ukbet awknak siloin (I Pet. 5:1-3,5), zohthimtlak nun sawn in, midang ruahnak ngai pawimawh in thutluknak tuah tikah  langternak in asi sawn.

Khuahlan pawlkom dindan, tlunlam lubik, dinhmun sangbik ihsin siangpahrang vekin ukbet awknak hi thleng tul zomi asi. Santhar minung, le dinhmun thawn a kaih aw bikmi pawlkom cu rualran zetin pehtlaih awknak, hnatuan tlangnak, khat le khat upat awknak in duhtlangmi tuantlangnak hi asi sawn. Hotu pawl cu siahhlawh lungput thawn niam te ihsin senpi thatnak tuahsuak dingin kaihhruai thiamnak hi santhar kaihhruai awknak hrangah a tulsawmmi asi.

Santharsan ahcun tlunlam lukaitu in ziangkim thuthluknak tuah theh, ukbet awk san si nawn lo. Hnatuantu pawlin zalen zetin an thazang le fimnak thiamnak suah in an tuansuah theinak dingin hotu pawlin sangka ongin canpual tha le thuneihnak an zemsuah thiam a thupi tuk fawn. Cuihleiah thuthluknak tuah tikah hnatuantu pawlih hmuhdan, duhdan, fimnak le theihnak pawl rawn hmaisa in thuthluknak tuah thiam khal a tul fawn. Hnatuantu pawlin ziangruangah ziang an tuan ti ah an fiang zet a thupi. Cutin hotu pawlin lamtang biknei loin rualran zetin pehtlaihnak tha ten a tuahthat ringring dingmi asi. Hotu pawlin hnatuantu pawl thusim duhmi ngaisak in hnatuantu pawl khalin hotu pawl thusuak ngai pawimawh in khat le khat hnatuan tlang vekin tuan tlang tikah hlawknak tambik a suak sawn asi. Cun khatlamah hotu pawl thu duh loin luhlul, dan bahpal pawl khal an sinak vek cekci in an parah thuthen ngam ding kha hotu pawl tuanvo asive lala. Curuangah a cangtheihnak poh ah thuthluknak cu hnatuantu pawl kutah retin anmai duhdan thiamnak le fimnak thawn kaih aw in a thabik tuansuak thei dingin zalennak khal pek cih ding asi.

Dictatorpawl cun ziangtin an tuah ti asile, thuthluknak hi anmai kutsungah an ret theh, anmai duhdan le hlawknak dingin ziangkim thuthluknak an tuah theu, fimnak le thutak cu anmai kutsung lawngah um dingah an ruat,  thuthluknak cu lubik tuanvo neitu pakhatkhat kutsungah an ret, cutin hnatuantu pawl cu tlunlam ihsin ukbetnakin an hnatuan cu tuanter an si theu.

Cutin siloin santhar, siahhlawh lungput nei hotupawl cun ukbet awknak siloin hnatuantu pawlin a thabik an fimnak thiamnak le phurnak duhnak suah in an tuansuah theinak dingah bawmbawitu, bawmtu, kaihruaitu, lamzin hmuhtu dinhmunah an ding sawn asi. Thuthluknak cu a cang thei tawkin hnatuantu pawl kutsungah an ap, an hnatuannakah bawmbawi tulmi ah an bawmbawi, fimnak le thutak cu zapi hrangah asi tiah ruatin an zem darh ih a tulmi an bawm, midang thansohtertu sawn an si, mipi pawl cu tuansuah duhmi tuansuaktu an si tiah an ruat, hnatuantu pawlin ziangtin tuansuak asi ding tiah thutluknak an tuahter. Cutin hnatuantu pawlin mai tabul vekin an mai hna cio an tuan tikah a thabik, a cakbik, rah tambik, hlawhtlingbik an si ringring. Cutin hotu cu ukbettu si loin hnatuantu pawlin rualran le zalen zetmi senpi vangtlang, mipi duhtlangmi an tuansuak theinak dingah lamzin onsaktu, khihhmuhtu, kaihhruaitu asi sawn.

6. HNATUAN LE THUNEIHNAK ZEM DIK LO (DIRTY DELEGATION)

Hotu pawlin an tuahsual mi lakah tuanvo le thuneihnak zemsuah diklo, thiamlonak hi an tisualmi tumpi pakhat asi. Tlunlam lukaitu in kaihbet, ukbet, ziangkim kaihthehnak in hlawhtlinnak tampi lamzin a kham sawn asi. D.L. Moody in “Keimah in mi pahra hnatuan tuan theh hnakin hnatuan pahra tuantu ding mi pahra ka hawlsuak sawn ding” tiah a ti vekin hnatuantu pawlin an tuan dingmi tuansuak thei dingin hotu in a tulmi tuanvo le thuneihnak pawl kha peksuah thiam ding asi.

Ziangruangah hotu pawlin tuanvo an zemsuak thiam lo theu ti asile thuneihnak an hloh an phang, hnatuan thitha in tuansuak asi lo pang ding an phang, anmah hnakin hnatuan thasawn in a tuantuantu an um ding an phang, a tulmi tikcu caan an pek thiam lo theu, midang parah hngat awk ding an tih, hruaitu hnatuan tuansuak ding dan an thiam lo ih tuanvo zemsuah dan an theih lo ruangah le pawlkom tlakniam ding an phan ruangah asi theu. Ziangthu ruang khalah tuanvo le la tulmi thuneihnak zemsuah thiamlo, dik lo hi hotu pawlin an tisualmi tumbik pakhat asi.

Tuanvozem tikah dawtli a thupi zetmi a um: tuanvo peknak, thuneihnak peknak, mawhphurhnak, le a pehparmi pawlih nemhnget le theihpinak tla asi.

Hotu pawlin an tisual theu mi cu hnatuantu pawl dinhmun theihsak lonak, tuanvo pek suah dingmi peksuak thiam lo, hnatuantu pawl thawn a tulmi pehtlaihnak nei lo, thuthluknak tuah tikah a tulmi kalkaan, palzut tahratin a teltu ding pawl telh loin hrilbikmi, thleidan nei in mai duhzawng in thuthluknak tuah theumi tla asi.

Cutin siloin santhar hruaitu, siahhlawh lungput nei in a ziktluak mi hlawhtlinnak neitu hotu pawl cun hnatuantu pawl hnenah tuanvo zemsuah tikah hotu tha pawl cun a tuantu pawl hnenah a tulmi tuanvo an zemih a tulmi thuneihnak khal an pekcih, hnatuantu pawl lakah an bawm theimimi an bawm ih an tulmi hmanrua, bungrua pawl an peksuak cih sawn theu asi. Cuihlei ah hotu fim pawl cu tuanvo an pek tikah hnatuantu pawl cu rinsannak thawn tuanvo le a tulmi thuneihnak an peksuak, hahdam zetin hnatuantu pawl zuamnak, fimnak, thiamnak le pekawknakah an hngat aw, thinsauten an hngak, cutin tuanvo zemsuah nak in cak sinsin in thiam sinsin in hnatuantu pawlin thiltha tampi zalen zetin an tuansuah theinak ding hrangah bawmtutha an si.  

Tuanvo zemsuah tikah mipi lak ihsin a tlingtlakbik hril, rinsannak langter, tuanvo fiangzetin sim theih, a tulmi thuneihnak pek, ziangtin tuah ding timi anmai fimnak le thiamnak in tuah dingin zalennak pek, mawhpurhnak an neihmi fianter, an tuanrahmi parah a tulmi upatnak, sunloihnak le lawmnak langter in zalen zetin thiltisual pang ding khalin sangka kau zetin onsak ding asi.

7. THU THEIHTERNAK TLASAM (COMMUNICATION CHAOS)

Thu hla theihternak tlamtlinglo hi hruaitu tampi in an tisualmi tumbik lakah pakhat asi ve. Ukbet awknak, thuneihnak le thuhla thuhbet, ukbet awknak in kaihhruai awknak pawlkom sungah a tulmi, hnatuantu le senpi pawl theihtulmi pawl an thuhbet, an kaihbet tikah hnatuantu le mipi anhai mangbang in an tuah ih thansoh ding a kham. Hruaitu tlamtlinglo, thuneihnak duhtuk le midang huphurhnak neitu pawlin an tisual theu mi cu thuhla mipi in an theih tikah anmah ih sinak taktak a lang pang ding, pawlkom sungmuril thu midangin an thei pang ding, hnatuandan tlamtlinglo pawl mi in theih ding an phang, tvp phanmi an nei ringring theu. Santharsan pawlkom, mibur cangvaihnakah langhngan zetin pawlkom sung, senpi vangtlang thawn a pehparmi thu pawl cu thu hla neitu mipi, hnatuantu hnenah fiangzetin theihter ding le pawlkom le mipi thawn a pehparmi ziangkim tuahnakah langhngan zetin tuah dingmi santhar milai thuanthu, milai pehtlaih awknak in a phutmi asi. Cun khaktlamah “an thei pam ding” ti tahratin sim theih tulmi le thuthan tulmi pawl ngai pawimawh loin umsan men ruangah thutheitu ding pawlin a tikcu ah thu hla kimcang thei loin an um tikah thansohnak a dal ih thiltha tampi a siatsuah theu asi. Curuangah fiangfai zetin, thuhla kimcang, a tikcu teah a theihtu ding hnenah pek, sim, than ringring ding hi hotu pawlin hrial theihlo mi tuanvo asi.

8. PAWLKOM NUNPHUNG THEIHLONAK (MISSING THE CLUES OF CORRPORATE CULTURE)

Pawlkom kawmiti thuthluknak lenglamah pawlkom nunphung in thu tampi a fehthater in a fehsual ter thei asi. Pawlkom nunphung cu a cakzetmi milai pehtlaih awknak hmanrua pakhat asi. Hotu pawlin an ruat pawimawh theu lo, an thei lo theu, pawlkom nunphung thilti theinak le cangvaihdan pawl an theihfiang lonak ruangah an tisual theu asi. Pawlkom nunphung cu mibur lakah hna tuan suahdan ngaihthah men lo dingmi asi. Cuhnakin santhar milai nuntu khawsak a thleng awk rero vekin pawlkom nunphung khal sanman dingin le mipi duhnak tlanpi theidingin a thleng aw rero mi nunphung nei thei dingin kaihhrem le tuahthat thiam a thupi ngaingai.

Milai in pehtlaihnak le pawlkom sungah man kan neihtermi duhzawng, a thaw a nuam timi, nunphung le hnatuandan pawl siseh zumnak, nuncan ziaza, dik le dik lo tiah ruahmi pawl siseh fiang zetin hotu cun a theih ih a kenkawh thiam a thupizet fawn.

Rick Warren ih pastor tuannak kawhhran Saddleback kawhhran cun a hnuailam vekin pawlkom nunphung ruangzingdan an nei. Pehtlaih awknak an thupitter, rualpi tha sinak le nel awknak, a danglam le a hngetmi tumtahnak Pathian hmaika cen in nun, a thuthangtha simsuah, le midang zirhsawng, le Pathian duhdawtnak langter, society ah hliamhma tuar harsa pawl bawmbawi, kawhhran lairelnakah kawhhran deacon pawlih lairelnak, milai nun piting nei dingin midang nun tundinnak, kawhhran thuken pawl cu veng (community) ah simsuahnak, san a manmi nunphung, a thang rero mi pawlkom siding, tvp hi an pawlkom nunphung, thuken vekin hnget zetin an neihmi asi.

Pawlkom nunphung fiangfai zetin theih le hman thiam tikah hotu, hnatuantu, mipi le pawlkom hrangah tampi thathnemnak a nei asi. Milai pehtlaihnak ah Khrih palai si ringring in, ziangkim tuahnak, zumnak thuken, nunphung ah siseh mipi zirhsawng theih asi. Cuihlei ah pawlkom sung sihcih awknak umtuzia, pawlkom ih man neihtermi, thupitter mi, mipi lakah kalhki awknak, engtai awknak pawl theifiangin hotu hnatuan thansohnak, hotu pawl mizia khal mawhpurhnak la in hnatuandan, ziangvek dinhmunah zovek milai an um tikah a tambik thathnemnak an suahpi, tha zetin hnatuan zirh awknak, fumfe zetin hnatuan hrilnak, thuthluknak felfai awlaiten tuah theinak, tvp pawlkom hlawhtlinnak thu ah a thupizetmi pawl an si.

Pawlkom sungah mipi pawl cu pawlkom nunphungah rualran zetin an pawhtlang aw maw timi thu tla theih tha zet asi. Zumnak thuken le man neihtermi, thupitermi, duhzawng le paihzawng, tvp danglamnak pwl fiangzetin theih tikah thuthluknak hrang tampi a bawm thei asi..

A tawpnakah, pawlkom nunphung in fiangzetin mipi a theihter le ciahneh dingmi pawl tla cu zumnak thuken, man neihtermi, thupitermi, sunmang thansohter, danglamnak lawm thiam, hnatuandan le thurin thuhrampi pawl tleidan thiamin an thupidan vekten anmah le hmun ah remthiam a thupi zet fawn.

9. AIAWHTU THA HRINGSUAK LO HLAWHTLINAK (SUCCESS WITHOUT SUCESSORS)

Hotu pawl hi an hnatuan kaihmi dinhmunah um rei lo lam hnakin an um dingzat hnakih rei um, hnatuan dinhmun an kaihrei tuk ruangah buainak an suahtermi a tam sawn. An um dingzat hnakih rei hnatuan dinhmun kaitu pawlin an tuahthatmi hnakin an siatsuahmi, lole thansohnak an donkhammi a tamsawn ringring” tiah Lyle Schller in a sim. Finzel in a sim vekin hotu tha cun hnatuan dinhmun a kaihthawk ihsin a suahsan tikah amai aiawhtu ding a timtuah cia theu asi. Cutin hahdam zetin aiawhtu hnenah tuanvo hlankai in hlawhhlinnak hi hlawhtlinnak taktak a si. Cutin hotutha cun hnatuan dinhmun a thawk pek te ihsin amai aiawhtu ding hotu tha a zirh, a kaihruai in a tungding sawn theu asi. Culailakah hotu mi tampi in an tisual theumi cu anmai aiawh theitu ding hotu tha an tungding lo, an zirh lo, an kaihruai lo ih anmah in hnatuan dinhmun an tuan nawnlo tikah an hnatuan dinhmun pehzawm theitu thitha um nawn loin tlaksiatnak asilo hmanah dungtawlhnakin an pawlkom dung a thlun theu.

10. HMAILAM HRANG TIMTUAHCIANAK UM LO (FAILURE TO FOCUS ON THE FUTURE)

 “Dunglam thu parah a porh aw rerotu cu a tufangah porh awknak ding neilotu asi” tiah an sim theu. Cuvek thiamthiam in hmailam hrangah timtuahnak neilo pawlkom cu thlaksiat dingin timtuahcia mivek asi fawn. Hotu pawlin an tisualmi tumbik lakah pakhat cu hmailam hrang timtuahcianak neih lo hi asi. Hmailam hrangah timtuah cia thei dingin pawlkom pakhat, mibur umkhawm cu a zir rero mi an si a tul. “Thleng awknak lawng hi a hmun mi asi” tiah sim asivekin thleng awknak hrangah nitin a thleng aw velo, timtuah ve lo tu hotu le pawlkom cu dungdawlh rero mi thawn a bangrep asi.

Hmailam hrang timtuah cia thei dingin dunglam thu ihsin zirmi, a tufang dinhmun, le hmailamah a thleng thei dingmi thu pawl, sung le leng, kiangkap thu hlapawl zir, theih, le cu pawl hrangah timtuah cia a tul. Cutin timtuah cia thei dingin alotheihloin theih tulmi a um fawn. A tufang pawlkom cahnak, cahlonak, sunmang tumtah, thupittermi, tanta dingmi le bet dingmi, thupibikah retmi, man neihtermi, thansohnak dawnkhamtu, sunglam lenglam pawlkom thansohnak thawn a pehparmi thuhla pawl, canpual tha le siatsuahtu, tvp cipciar zetin thei cia tahratin timtuah cia tikah a tha bikin thansohnak hrang timlam cia theih asi. Cuvekin timtuah cia thei dingin catbang loin a zir reromi pawlkom si ding a thupi mi asi.

Leitlun milai thuanthu, milai mizia pawl khal a thleng awk rero vekin pawlkom tumtah, sunmang, tuanreldan, hmuisel, le pawlkom ruangzing pawl khal catbang loin a theng aw rero mi santhar thawn kaih aw in remtul rem, tharthawh tulmi tharthawh in timtuahcia ringring thei a thupi. A thleng aw rero mi santhar milai thuanthu thawn kaih aw in tumtahnak ruangzing thiam a thupi. Santhar thawn a mil aw mi tumtahnak cu cipciar zetin a fiang le felmi, hlawhtlinnak tah theihmi, tuansuak theihmi, santhar thawn a kaih aw mi le ziangkim hliakhlai theihmi tumtahmi khal asi a thupi fawn.

Santhar hruaitu cun dunglam thuanthu parah siseh atufang dinhmun parah siseh hngat aw in porh aw rero loin a ra lai dingmi san thuanthu ah hngat aw in ziangkim timtuah cia diamdi in pawlkom tumtah, ruangzingin milai hnatuantu le hotu, mibur le senpi vangtlang, sunglam lenglam, hmanrua le canpualtha pawl ruahhman cia diamdi ding asi sawn.

Na hruaimi mibur pawlkom lakah tisualmi na nei maw? A lo hruaitu hotu pawlin tisual mi an nei maw? Midang tisual mi le mai tisualmi par ihsin a zir dah lo tu cun thil a tisual rero lai ding asi. Na tisual mi ihsin siseh midang tisualmi ihsin siseh na zir ahcun ruahsan ding tampi na nei ih midang in nangmai nun ihsin ruahsan ding an nei asi. Zir aw.

Cabu sirhsan:Finzel, Hans (2007) TheTop Ten Mistakes Leaders Make. ISBN: 978-0781445499