Ca Kan Ngan Tikah
Salai Mazawn
2004 in ca ti țiatto in ka rak ngan ve. Christian Palai ah Pathian thu,Thufim Cahram tawi tete ka rak ngan hnelhno. Upa hrekkhat le rualpi tete’n in rak fak zet. 2007 ah Rihli, Buannel, Falam Pawlpi Groups Mail ah ca ka ngan thawk ve. Cahram a phunphun le ‘Fala Tlangval Theihțtulmi’ le ‘Innsang Neih Hlan Ih Theihțtulmi’ tivek ka ngan uar zet. Mitampi in fak, in lawm, reply, comment tam thei ve zet. Ka theih lo mi tampi khal in ka cangan mi an siar celcel ih lungawi thu in sim. Cahram ngan ding tla in rak fial rero. Ka rualpipawl le i theitupawl in lungawi thu in sim ih thazang in pe na sa.
Minung cu huatu zahra duhtu zahra tin kan pipu țawng țhim ih an rak hmanmi hi a rak dik tuk. Ca ka ngan tinten in rak fak ding lawnglawng ka rak ruat. Ka thinlung a no kan ti ding maw? Reply, comment um celcel ringring sehla ka duh, um ringring ding khal in ka thinlungah a cam țheu ih tu le tu mail ka zoh leuhleuh.
Vei khat cafang pakhat nganmi menah ka thin a na zet, ka ciai. Ka thin a heng. Ka cangan mi ah reply le comment um lo le ka ca siartu um lo ah ka ruat ih cangan ka peihnak a reh sualso țheu. Tikcu a rung rei cun ka canganmi ah mipi an buai supso. Na cangan cuti khati sawlseltu le fakseltu an tam deuhdeuh. Thazang petu um nawn lo. Bei a dawng nguarngo thlang.
Kum a rung reirei ih ka lung a fim nguahngo vivo. Culai ah kan Chin-mi lakih relsiat țawng tam bik ding a simi, a siatnak lawnglawng an hawlmi, a ca nganmi țha ti si an dokalh ringring țheu mi ( Pu ……..) ka vung mang ih a țawngkampawl ihsin thazang ka ngah zet sal.
* Ziangrualah ka canganmi ihsin dokalhnak le fakselnak ka tuar thei lo ih reply, comment an mal le ka beidawng ih ka tha a nau sualso?
1. Mipi siar tlak ding in ca ka rak ngan maltuk ti ka fiang aw.
2. Fak le lawm lawnglawng ka rak duh.
3. Ka thinlung a rak no tuk.
4. Ka ca nganmi mipi in ziangtluk in an rak siar ti ka rak fiang lo.
5. Huatsuaknak ca si lo, ca țha le thu țha ka nganmi ih dokalhtu an um le ka ca a nung ti ka fiang lo.
6. Keimah ah ralțhatnak a um lo ti ka fiang.
7. Lar ka rak duh deuh hmang.
Cangantu Pakhat Si Ding Cun
Cangantu pakhat si ding cun mah le mah rinsakawknak (confident) neih a țul. Kan canganmi fiang lo hrangah fumfe zetih simfiang thei a țul. Kan canganmi khal a țha tawk pam, mipi siar tlak a si kan ti thei a țul. (Puarthaunak lam si lo in) Cangantu in kan lungput hi kau zetin awng ding kan si. Thinlung le ruahnak thiangzetin fim kelkiten mitmeng in khua cuan thiam uh si. Mi țawngkam tenau men khi buaipi tuk lo a ttha. Cuvek buaipi ciamco tupawl cu cangantu pakhat sinak lungput a neih loh thlak men. Ca pakhat kan ngan ding tikah ‘zo ka si’ ti kan theihawk a țul. Cahram pakhat si maw, mipi siar dingih ca pakhat khat na ngan tikah na theih lo in kan kiangkap ah mipi in in thlir ringring. Mipi duhdawtnak thawn cangan kan ngan tikah hmual a nei duh zet.
1. Tuar theinak nei a țul.
2. Sualnak um lo, mi relsiatnak men cu itthat san men ding.
3. Sualnak um lo, kan canganmi buaipitu an tam le siartu an tam ti thei ringring ding.
4. Fak le lawm lawnglawng beisei lo ding. Cuvekih canganpawl cu fak le lawm an hmu lo can ah cangan an peih nawn lo mei.
5. Reply, Comment –tu an um lo khal le ca siartu an tampi ti thei ringring ding.
6. Mai canganmi le mai nun khal theiawk a țha.
7. Cangantu pakhat si ding cun kiang le kap, tikcu can thlir dan thiam a ttha/țul. Tawngpaw ngan ih ngan hi san a tlai lem lo.
8. Ca pakhat kan nganmi hi mi tampi in an siar ti theihhngilh lo a țha.
9. Ca pitling ngan thei ding cun ca siar tam ih mi idea lak thiam a țul. Kan ngan duhmi, kan thinlung ih irhsuak mi thuhlawmpi mipi thinlung sungih deng ngah fukfi ding cun ca tampi siar men lawng tawk lo, mi in ca an ngan tikah ziangtin idea an hmang, mi idea lak khawm ih mai idea thawn țawnkhawm phawm rupri thiam a țul.
10. Cangantu pakhat si ding cun beidawngnak ih neih thei lo mi kan si a țul. (Beidawng lo ding tinak si cu)
11. Fakselnak le sawiselnak kan thleidan thiam a thupi zet.
12. Kan canganmi fakseltu an tam le lungawi ding. Tthaten an rak siar tinak a si.
13. Mipi lungput ziangvek ti mawi tawk theihthiam a țul. Mipi ttulmi theihthiam a țha.
*Lang rumro ih mi phawm lawk mei hi siartu hrangah cillem a har duh zet.
0 comments:
Post a Comment