Cimih Theih Lo Bible

CIMIH THEIH LO BIBLE

Timothy Sui Lian Mang

A.D 303 ah Rom siangpahrang Diocletion in Bible cimihter tumnak maksak, leitlun pumpi ih theih dah lo mi cu a tuah. Kut ih ngan mi Bible an hmuh mi pohpoh cu siatralter thluh a si ih, Bible sung thu ngan mi hmuh mi pohpoh khal urkang theh a si. Ngankhumsin mi neitu mi thawng tampi le an sungkuapawl cu thah an si. Kum hnih sung rori cutivekin rapthlak zetin Bible cimit dingin tan an lak hnuah Bible an urkangnak vaap ihsin nehnak thuam sangzet an phun.

Cui thuam ah cun, “Extincto Nominee Christianorum” (Extinct is the name of Christian) “ Cemral hi Khristianpawlih hmin cu a si”) tiih ngan a si.  Asinan kum 20 hnuah, Bible cu cimihter le thifel zoih an ruah hnuah Rom siangpahrang Constantine in thudik reltu, diklo thei lo ah ruatin “Bible” cu siangpahrang tokham ah a toter lehsal. Bible a duh thu a phuan tikah nazi 24 sungah bu 50 cu an thuhnak hmun ihsin an lasuak cio ih siangpahrang hnenah an run pe. Siangpahrang Diocletin in a cimiter rori ah a ruataw nan a rak si lo lawlaw.

Turkey ram ih Amerika Sizung ih um Amerikan mi midam lo pakhat cu Bible an rak pe, cu cu a Bible neih a vei khatnak a si. Sizung ihsin a rualpipawl hnenah a Bible cu a keng. Mosolman pa, amah cu zirhtu saya a si, in a Bible cu a lawn ih a thlek thluh. A thlek mi cu kawthler ah a darhsarh theh. Bible neitu tlangval cun zinghman ti lole tawng lo ten a um men.

Eicawp zuartu pakhat a ra ih, a dawr ih thil funnak dingah Bible cahnah phek tlek mi tete cu a sar ih, a hmang. Rei lote sungah cui khaw pumpi ah Bible phek tlek mi tete cu a khat theh. A dawr ih thil leitupawl in, dawr kilpa ca phek in pek ding teh na nei maw ti in an sutbet vivo. Ni rei lote sungah Bible siar duh taktak tupawl hnenah Bible pumpi cu zemsuah a si tariai. Neta lamah cui khua ih thleng Bible zuartupa cun mak a ti tuk lawmmam. A thlen leveten mi 100 in Bible lei an duh thu an sim lohli ih, Bible zuartupa cun mak a ti tuk lawmmam.

Gregorio Rodriguez, Mexico mi, Amerikan Bible Society hnuaiih Bible zuar hnatuantu in kha vek phun deuh thil cang mi a rel ve. Neuvo Leon State ih khaw pakhat ah feh in nu pakhat hnenah Bible a zawrh. Thla li hnuah cui khua cu Rodriguez cun a tlawngsal ih, ramhuai bepawlih kawknak ruangah cu nu cun a Bible cu a tih. Cutin a Bible cu a thlek thluh ih, hnawm hlawnnak bawm ah a hlawn. Rodriguez in cuih thu a theih tikah thinna zetin a feh vivo. Tlangval pakhat a tawng ih, cui tlangval cun Rodriguez hnenah caw thau le caw tawl pasarih, Faraw an ti mi pa pakhat in mang a neih mi thu ngannak cabu na nei maw tiah a sut. Cui tlangval cun cui thuanthu hmaisa lam kha kawtthler ih ca phek a sar mi ihsin a siar ngah thu le a dang siarbet vivo a duh thu a sim. Rodriguez cun Bible cu a zohter ih, Pathian thu a sizia a sim. Cule bu khat a leiter. An biakawk laiih midang ra pawl khalin Bible cu an lei ve. Nu pakhat in Bible siatralter tum ih, Bible a thlek mi hmangin Bible cu a karhzai sawn riangri.

Bible cu Pathian tawngkam a si ruangah siathloral thei a si lo. Pathian siathloralter a theih lo vekin, Bible khal siatralter theih a si lo. Bu khat hloral aiah bu thawng tampi a suaksawn. Atu leitlun ah Bible hi kumtin million tam tuk a suak ringring. 1456 kum in Bible hmaisabik Gutenberg Bible an ti mi a suah ihsin atu tiang Bible hi leitlun ih zuar khawng bik mi a si. Atu ah tla hi cun Bible thupiih ruahnak hi zum um lo tiangin a karhzai sinsin.

Bible sunlawinak le ropitnak cu kum thawng tampi sung hlohralter tumnak a pahtlangdan le doawknak in thil a siatsuahdanpawl, can dangdang ih minung tluksiatdanpawl, maksak zetih Bible cimihter tumdanpawl, kum za tampi kutngan ih an pekawksangdanpawl, thiamnak sang deuhdeuh in rinhlelhnak le hmuhniamnak a run thlendanpawl, Pathian um zumlotupawl ih a elnakpawl hmuahhmuah pahtlang ih, cupawl sung ihsi a dam khawsuah theinak pawl, siatnak um riai loin a tletsuak thei le thuanthu ngannak ih thinlung khawih thei le phurnak nasazet petu a sinak hi a si.

Cabu suah zo mi zakhat ah pakhat hin kum sarih a daih ih, cabu thawngkhat ah zariat cu kum khat sungih hngilh an si. Asinan Bible larnak le mi ih thupiih an ruahnak cu a karhzai deuhdeuh.