Aungsan In Chin A Hmuhdan

AUNGSAN in CHIN A HMUHDAN

Nothan Kap

Kawlram in zalennak a ngah tikah ziangvek Danhrampi (Constitution) kan hmang ding ti thu ah Phah-Sah-Pah-Lah, Anti-Fascist People's Freedom League (AFPFL) party cun nasaten an reltlang. An harsatnak bik cu Tlangparpawl ziangvek dinhmun in ret an si ding, ti thu ah a si. Hi thu ah Gen. Aung San cun AFPFL khawmpi ah thu a sim. A thusim mi zoh tikah Russia ram Socialist dan ih uktu Stalin ih hmuhdan a pawmpizet (lasawng) ti a lang (Aung San hi socialist a si tiin hmutu an tam).

Hmun: Jublee Hall, Yangon

Nithla: May 20, 1947

     "Hnampi (လူမ်ိဳးႀကီး) timi cu thuanthu ihsin ra ṭosuak, hngetkhoh zetih um, mah leṭawng, mah le ram, mah le sumdawnnak (စီးပြါးေရး) nei, hngetzet nunphung le dan nei, pumkhat sakhat tei um miphun a si."

     "Myanmar ram sungah Kawl le Shan lawng hnampi (လူမ်ိဳးႀကီး) tin kawh theih an si. Jinphaw (Kachin), Chin, Kaya, Kayin, pawl cu hnampi an si ban lo. Jinphawpawl cu sumdawnnak ruangah hnampi tiin kawh theih an si lo, Chin, Kaya le Kayin pawl cu ṭawng pakhat hmang an si lo ruangah hnampi ah ret theih an si lo."

Mahte ukawknak (Self-determination) thu ah Aung San cun hitin a sim: 

     "Hnampipawl cu mahte ukaw thei an siih pakhat le pakhat dinhmun bangaw thluh an si (Nations are sovereigns and all nations are equal). Hnampipawl cu an kawpaw a si khalle (Regional Autonomy) timi mai luahcin ram ah thuneih theinak an nei ih  a hranten umsal (kawpawknak ihsin suahsal theinak, secession right) khal an nei. Mahte thuneihnak (Self determination) timi cu phunhnam pakhat cun amai duhdan vekin a um thei ding tinak a si. Zalen ram neitu a si bangin zalen zetin amai thuin a nung thei. Phunhnam dang thawn, dinhmun bangaw in, an kawpaw thei. Cui a kawp mi phunhnam dang hnenin suahsal theinak khal a nei (The right to self-determination means that a nation can arrange its life according to its will. It has the right to arrange its life on the basis of autonomy. It has the right to enter federal relation with other nations. It has the right to complete secession (AFPFL Convention, p.8)"

TLANGKAWM:

Aung San cun,

(1) Tlangparmi lakah Shan lawng "hnampi(လူမ်ိဳးႀကီး)" an si, Chin cu "hnampi" an si ban lo tiin a hmu.

(2) Tlangparmi lakah Shan lawng "hnampi" an si bangin Kawl thawn dinhmun bangaw in rorel thei ah ret an siih Myanmar rampi ah anmai duh thuin an lut thei, an duh tik tikah an suaksal thei tiin Aung San cun a pawm (Hnampi ti tlak lo Kachin, Kayin le Chin tvk cun hnampi Shan le Kawl thawn dinhmun bangaw in an um a rem lo, tinak tluk a si).

3. Aungsan in Pinlung Thukam tuah hlanah Shanpawl hnenah, "Zalennak ngah tikah rampi president ah Shan ret a si ding, ralkap lubik ah Karen ret a si ding" tiin a rak sim cia bangin zalennak ngah hnu rampi President cu Saw Shwethaik (Shan) a siih, ralkap lubik cu Lt.Gen. Smith Dun (Karen) an rung si. 

HMINSIN:

(a) Aung San thih hnu ah 1947 Constitution cu run ngan thluh a siih Aung San duhdan in Tlangpar States pawl cun kum hra (10) kim hnuah (duh tik can ah si loin) rampi ihsin suaksal theinak (secession right) an nei tiin ngan a si(Constitution of Burma, 1947. Chapter X).Chin cu "hnampi" ah ret mi si lo, Chinram khal State si lo, Special Division lawng a rak si tikah rampi ihsin suahsal theinak "secession right" neitu lakah a rak tel ban ve lo (January 3, 1974 lawngah Chin State tiin "State" a ngah niarno!)   

      (b) Kum hra (10) kim kherkher ah suaksal theih an tinak san bik cu Cozah thar in kum nga hrang hnatuan ding (5 year plan) an tuah mi vei hnih a kimnak kum hra (10) tal ahcun rampi ihsin suak duh nawn lo tiangin Tlangparpawl lungkim koin hna kan ṭuan man ding tiin Aung San in a zum ruangah a si. Hi thu ah Aung San ih sim mi hi hminsin a tlakzet: "Kum hra (10) rei tiang annih pawlin in kawp hnuah kawp vivo duh ding tlakin kan ṭuan thei lo ahcun Kawlpawl kan laktlak lo ruangah a si ding."

Constitution ih ngan mi thlun in kum hra hnuah rampi ihsin Shanpawl suaksal an tum nan, an lutnak puan nem zarmi sangka cu thir sangkapi kharpit mi ah a rak cang tariai ih an suaksal thei nawn lo. Chinpawl cu suaksal ih ṭhat le ṭhat lo thu khal buaipi lem loin sepi ruah tuar an sim bangin cobarawh tuar in tuar cuahco pawl kan si hmang. Pu Thawng thin lingter ding zawng in, kum 10 sim lo kum 60 kawp hnu khalah sawm rero khal ih suak duh remrem lo, "ka fala nui pian siatnak khi ka lung i kuaitu bik a si" titu kan tam mahna! Hmelṭha zun hnakin hmelse zun ih uai hi a rak na sawn hmang!NTK