Parents' Day

Parents’ day - Nu le Pa ni

Pathian thukham a (4) nak ah “Nu el Pa tla upat aw” ti in kan hmu. Thukham pahra sungah a hmaisa pathum cu Pathian thawn pehtlaih awmi thukham an si ih a neta pasarih cu milai thawn pehtlaih awmi thukham an si. Himi milai thawn pehtlaih thukham lakah “Nu le Pa upat ding” thukham hi a hmaisabik a si. A thupit zia a lang ter. Himi Thukham thawn peh aw in Nu le pa pawl a hleice ih upat peknak ni sunglawi
cantha cu NU le PA ni a si.

Kan nih kawlram ih um RC pawl cun tui nipi (29-72012) hi Nu le Pa pawl ih ni ti in a hleice in kan tuah ding a si. Cui can ah cun Nu le Pa pawl a hleice in upat peknak, laksawng peknak tivek kan nei ding a si.
Nu le Pa ih ni kan timi hi a taktak ahcun July thla 26 ni hi a si nain anaibik nipi (Zarhpi) ni ah thawn in kan tuahmi a si.

Ziang ruangah July 26?

Roman Martyrology an timi hlanlai ihsin an rak tuahmi Rome ih tuah le neihmi Martyr pawl hminsinnak cauk sungah himi July 26 cu St. Joachim le St. Anne tei nupa kha ngankhum a si. Cumi thlun ihsin Catholic pawl, Orthodox pawl leh Anglican pawl ih neihmi Biaknakdan nithla siarnak ah July 26 ni cu St. Joachim le St. Anne tei’ nupa hngilhlonak ni a si.

St. Joachim le St. Anne cu zo an si?

Hlanlai Christian san thuanthu kan zoh a si le tuih Bible kan timi Ca Thianghlim, tuvek ih cabu tampikom Cabu pakhat ih a rak um hlan ah, zumtu pawl biakkhawmnak an rak neih tik can ih an rak siar theumi cabu pawl an rak um. Cumi pawl lak in a hrek khat cu tu ih kan hman mi Bible Ca Thianghlim ah an rawn telh ih a hrek khat cu Bible cabu ah an tel lo. Hman sehla cui cabu pawl cu Christian thuanthu ih ca sunglawian si ringring. Cumi lakih cabu pakhat a si mi cu Proto-gospel of St. James an ti ih kumzabi a pahnihnak sungih nganmi a si. Jesu ih dungthluntu St. James ih ngan a si ti ah an puh. Cumi cauk sungah St. Joachim le St. Anne cu Fapa Pathian ih nu Mary hringtu nu le pa an si tiah a rel. St. Joachim
le St. Anne ih san thuanthu cu fumfe ih theih a um lo. Kan theih tawl cu an nupa in mi felfai le danthlun an si ih an kum upat tiang ah tefa an rak nei lo. An thlacamnak kha Pathian ih a rak ngai ruangah an tar
hnu ah fanute Mary an rawn nei ti a si.

San thuanthu hrek khat cu Jerusalem ah an rak um ih tuih St. Anne hmin nei Biakinn khi Mary an hrin nak hmun a si an ti. San thuanthu hrek khat lala cun Nazareth khua kiang, tu ih Sephhoris, an an rak um ih cutawkah Mary khal cu an hring ti a si. Khuiti khal va si sehla Mary cu David cithlah ti a si ruangah Joachim le Anne tei nupa cu David ih tefasin an si ti a fiang. Christian san thuanthu ah nupa rori ih “mi thianghlim” ti ih upatnak ngan hi an tam lo. Cun nikhatni ih upatnak neihmi – biaknak thu ih hminsinnak neihmi – hi an um ka thei lo. Hitivek ih Nu le Pa pawl ih ni ti ih kan neih ih Nu le Pa pawl, nu le pa ih dinhmun ih a ding tu pawl a hleice ih upatnak kan pek hi a tha, a mawi in a sunglawi ti in ka ruat a si.

by – Salai Dominic