No. (1) High School, Falam

No. (1) High School, Falam

By: Salai ZC Laltinhrem 

Kum zakhat kim thei No. 1 High School, Falam hi Chin State ih hmaisabik High School a rak si. Thuanthu fehdan vek asile June, 1906 ihsin rak din thawkmi a siih 2006 ah kum zakhat a kim.

Falam Ih Tlawnginn Um Thawkdan:  Mirangpawl in Chinland hrekkhat an rak lak thluh zo vekin 1892 ah Falam Township hi an rak din. Falam an dinnak kum 14 rei hnuah 1906, June 1 ah Mission School timi an rak din thawk ih Khristian zumtu a simi Zirhtu U Kun Aa cu zirhtu a rak si. Cuih Mission School cu atu ih Cinmual vengih No. (3) Primary School hmun ah an rak din thawk. Hi Mission School ahhin Kawlca rak zir a si.

1911 ah hmaisabik kaipawl cu Mission School phun 6 an ttheh tikah KinDat ah phun 7 kai dingin an rak feh ttheu. 1913 cun Kawlca zirnak tlawng cu phun 7 tiang zir thei dingin an rak tthan sak.

High School A Rung Suah Keh Dan:  1935-36 cazirkum ihsin Falam ih Middle School cu Phun 9 tiang zir theinak tlawng si dingin an rak tthansak lala. Phunhra kai ding zohman an rak um hrih lo tinak. High School cu sim hlah, Middle School hmanin rak thawk hai sehla zohman kaibantu an um hrih lo, phunhrek in kai thawk a ttul tinak. Tlawngta an zirnak a san vivo vekin tlawnginn Middle le High School khal an run ngah vivo. Vei le khatah High School ngah a theih lo tinak.

Phun 9 awngpawl phun 10 kainak ding an rak nei hrih cuang lo. Phun 10 tiang kai theinak a rak um hrih lo. Phun 9 awngpawl cu phun 10 kai dingin Phyin Oo Lwin, Mandalay, Mawlamiang, Yangon le Pating tivek ah zawnzai zetin an rak feh ciamco.

Ralpi vei hnihnak ruangah 1942 ihsin 1944 tiang Falam tlawnginn pi cu khar tawp a rak si. Himi tiangih Chin State ih High School umsun a rak si lai. Ralpi ruangah Falam tlawng cu tawk le mawi a rak siat ih, ralpi veihnihnak a rung cem tikah hitawk hmun ah an rak kai thei lo ih Pathangkhan veng Phungki tlawngah June 1, 1945 ihsin tlawng an rak phuan sal. 1949 kum ah a hlan Tlawnginn hmun kel ah thing inn dawthnih an sakih 1950, June thla ihsin phun 10 tiang an rak phuan thawk.

Ka Ngannak San: A tlunlam ih thuanthu nung kan zoh tikah atu ih No. (1) High School, Falam hi 1906 ih rak dinmi a si lo, asinan, Primary tlawng um loin Middle tlawng a um thei lo, Primary le Middle fang suak ta loin High School a um thei lo timi cu kan feng thluh ka zum. Curuangah 2006 ah kum 100 kim lawmnak an rak tuahmi kha 1906 ihsin an siar thawkmi a si ti ka sim fiang duh. Hihi ngansan cu a si.

Fimthiamnak cu Rampi Dinnak Hrampi a si. Rampi in dinnak ding Fimthiamnak tthittha a neih lo asile cuih ram cu a cim rumro mai ding.

Fimthiamnak cu cabu ah a um vekin cabu tampi'n siar zuam sinsin uhsi.

Lungawi!