Seed
Faith (Zumnak Thlaici) Vs Zumtu
Ting HLei Thang
Ting HLei Thang
Thuhmaihruai
Tulai kan Christian khawvel ih lar zet pakhat cu “Seed Faith” hi a si. Leitlun huap Christian hrekkhat khalin Seed Faith cu an hmang, an tuh rero vekin Evangelists Le Pastors hminthang taktak khalin an zirh rero. Cucu kan Chin Christian lak khalah nasaten hmun a run la ve. Hrekkhatin Evangelist hnenah, hrekkhatin Pastor hnenah Seed Faith (zumnak thlaici) cu kan tuh ṭheu. Asinan hi Cahran asilole cangantu cun Seed Faith a sual timi hnakin Seed Faith (zumnak thlaici) tuh ṭheutupawl hnenah “Seed Faith” timi ih umzia le Bible ih simdan malte a run tanglang ding.
Zo-in a rak thawk?
Seed Faith (zumnak thlaici) timi Cafang hi Bible sungah a um lo. A thuhla a rak thawhdan asilole a rak thawktu cu 1950 hrawngih tidamnak laksawng (healing gift) rak cotu tiih theihlarmi Oral Roberts ih zirhnak ihsin thawkmi a si.
Oral Roberts ih Thuhla Tawi
Oral Roberts cu Rev. le Mrs. Ellis M. Roberts tei’ fa pangatnak a si ih January 24, 1918 ah Ada, Oklahoma, United States ah a suak. Granville Oral Roberts cu American Methodist Pentecostal televangelist le a Christian charismatic a si. A mah cu Oral Roberts Evangelistic Association le Oral Roberts University timi dintu khal a si. December 15, 2009 ah Newport Beach, California, United states ah a thi. Amah cu American Indian Exposition pawlin “Indian of the Year” timi tla 1963 ah an rak hlan. Roberts cu Oklahoma Baptist University le Phillips University ah tlawng a kaiih cutawk ihsin fimthiamnak rak zirmi a si. 1947 ah healing evangelistic ministry ih luh a du ruangah a pastor sinak ihsin a cawl. 20 Century lai hrawngih leitlunpi ih tidamnak lamih evangelist (healing evangelist) hminthang bik cu William M. Branham le Oral Roberts an rak si. (THE HEALING AND LATTER RAIN MOVEMENT Richard Riss A survey of20th-Century revival movements in North America).
Latter-Rain cangvaihnak cu William Branham le Oral Roberts ih kaihhruainakin Canada ah an rak thawk. The “Healing Revival” cu 1947 ihsin 1957 tiang Oral Roberts, T.L. Osborn, Jack Coe, A.A. Allen, le O.L. Jaggers tepawlih kaihhruainakin run tuah peh vivo asi ticu Gordon Lindsay ih Voice of Healing magazine in a tarlang.
1947 ihsin Oral Roberts cu rawl-ulh thlacamnak nasaten a nei. 1949 ih The Voice of Healing magazine ih suahmi sungin Branham ih simmi cu “Roberts in khawsepawl le damlopawl hnenih thiltitheinak a neihmipawl hi a hmuhdahlomi Pathian ih hnaṭuan makbik a si” a ti. 1950 ihsin Roberts cu ram dang ah khual a tlawn phah bangin TV station in a thuhla an than ṭheu tikah a ‘healing ministry’ cu a thawk rero zo.
Oral Roberts ih simmi tampi lakah Branham thawi bangawmi pakhat a um. A ‘healing ministry ‘cu John the Baptist ih sinak thawi bangawin a sim. 1948 ih a tisualmi cu, Roberts ih simdan vekin “Pathian in ka thinlung ah kei cu John the Baptist si dingin i sim, ka caan ah lamzin ka sial ve ding…Khrih ih taksa ah damcahnak nasatak a thlen thei nak hrangah a si” (See David E. Harrell, Jr., Oral Roberts: An American Life (Bloomington: Indiana University Press, 1985) 87, 149, 447-48.)
1965 ah Oral Roberts cun “Oral Roberts University (ORU)” timi tlawng a din. “Ka rual duhtak Billy Graham in April 2, 1967 ah Oral Roberts University cu minung 18,000 hmaiah i awn sak” tin a sim. (Oral Roberts', Miracle of Seed Faith (Fleming H. Revell, 1970), p. 9.
Tu ahcun tlawngta 5,300 an siih leitlun huap tlawngtapawl kainak asi ih ram 120 ihsin tlawngkaitu an um. ORU cu Tulsa, Oklahoma ah 263 acres kau asi ih major building 23 ummi a si.
A cemnak lamah a thuhla tawi malte tarlang bet a si ding.
Seed-Faith Theology
Himi Seed-Faith Theolgoy timi hmangin Zumnak Thlaici timi hi a dik maw? Bible vek a si maw? Timi tampi in fiangter thei sehla ka beisei. Kan zoh pei uh!
Ṭhimnakah, 1985 ah Oral Roberts cun himi ṭawngfangpawl hi a thusimnakah a rak hmang, “thinbang (worry), ṭih (fear), stress (phurrit), problems (harsatnakpawl) le ruahsannak neilo (sense of hopelessness). 1985 kum cu a hnaṭuanpipawl hrang ahcun ṭihnung zetmi kum a si. Asinan Seed-faith (zumnak thlaici) nan tuhnakin a let zakhatin a lo run dingih “Setan ih huatnak kutih a lo dirhthlak tumnak khal a cawl ding” (STOP SATAN IN HIS HATE TO BRING YOU DOWN)
A dang thuṭhimnak, 1987 January ah, Oral le Richard Roberts in “emotional appeal” timi an hmang. Thu umdan cu Oral in March thla ah 8 million dollars kha a pek/tuh lo asile Oral ih nunak Pathian in a la ding.
Seed-Faith (Zumnak Thlaici) timi ngaingai cu ziang a si? Himi cu “mi pakhat hrangah Pathian hnen ihsin pakhat khat ngah dingah a peksuah hmaisa a ṭul, ṭawng dangin kan sim asile “Paisa” cucu “Seed-Faith” (Zumnak Thlaici) kan timi cu a si.
Oral Roberts ih simdanvek asile, “peknak thlaici cu zumnak thlaici a si” (The seed of giving is the seed of Faith). Cutin tlang kha ṭhawn a ṭul kan ti hlanah kan thlaici cu a keuh ding.
Ṭawng dangin kan sim asile, “Zumnak thlaici a keuh” (planting a seed of faith) timi cu “na paisa kha i pe awla cui thil cun na nunah hna a ṭuan thawk ding” tithawi bangaw a si.
Seed-Faith thuah Bible in Ziangtin a sim?
Seed-Faith theology ruahnak hicu a tlunih tarlangdan vek asile Bible vek cu a si lo deuh in a lang. Ziangahtile Bible ah “thlaici tuh a ṭul, cui thlaici cu a keuh a ṭul” timi a um lo. Asinan zumnak thlaici hmang uar zetpawlih lakmi Bible cangpawl malte kan zoh ta pei!
Matthai 13:31-32, “Zisu in tahṭhimnak dang pakhat a sim sal. “Vancung Uknak cu hi bangtuk a si. Mi pakhat in anṭam ci a lakih a lo sungah a vawrh. Cang 32, Thlaici hmuahhmuah lakah a fate bikmi thlaici a si. Asinan a kho ih a ṭhan tikah cun rawl kung lakah a tum bikmi a si. Thingkung bangtuk a si ih vatepawl tla an ra ih a hnge lakah bu an sak,” tiah a ti.
Himi Bible cang (context) kan zoh asile paisa thu khui hmanah a um lo. A context cun thlaici fatebik hman thinkungpi ih a can thei vekin Pathian Lalram a kauh sinsin theinak ding a sim duhmi a si. Hitawk Bible cangah Zisu in paisa thu a sim lo, Vancung Uknak thu sawn a sim timi kha hngilh hlah!
Galati 6:7, “….milai cun an tuhmi vek cakci in an khawm ding.”
Himi cang khalin a simduhmi (context) cu “Thlaraulam cituh ding” (cang 8) sawn a si. Asim duh cu “taksa khenbeh/crucify the flesh” (Galati 5:24-26) le Khrih hrangih nun le “kumkhaw nunnak khawm/reap everlasting life” (cang 8) sawn a si, “zo hnen khalih thil ṭha tuah” in (cang 10).
Himi Bible cangah “Na khawmmi paisa in hmuh aw” timi kan hmu lo.
A let Zakhat
A let zakhat kirsal ding timi hi WFM (Word of Faith Movement) pawlin “zangfahnak thuthangṭha kha“thlaici thuthangṭha” ah an her deuhmi a bang.
Himi ruahnak cu hitin a si. Pathian hnenah ziangkim na pekmi hi a let zakhatin a ra kir sal ding. Phundangin kan sim asile, fang 1 na pek asile Pathian in paisa 100 a lo pe sal ding. 100 na pek asile Pathian in 10000 a lo pe sal ding tvk a si.
WFM ih zirhtu Kenneth Copeland ih nupi Gloria Copeland cun hitin a simfiang…
$ 10 pe aw cule $ 1,000 na ngah ding; $ 1,000 pe aw cule $ 100,000 peksalin na um ding. Nan pek asile a pung ding ticu ka thei tuk, asinan a dum le a rang timi cu a let zakhat ziangtin a ra kir sal timi in lo hmuh ter ka duh. Inn pakhat pe awla inn zakhat asilole inn pakhatih man let zakhat na hmu ding. Vanzam pakhat pe awla vanzam zakhatih man let zakhat na hmu ding. Mawṭaw pakhat na pek ahcun na sansung daih mawṭaw zakhat na ngah ding. A Tawinak, Mark 10:30 cu thil ṭha zet a si ual…
A let Zakhat Bible ih simdan
Mark 10:29-30 hi himi WFM zirhtu le tulai zirhtu tampi ih an sirhsanmi Bible cang a si. Kan zoh pei!
Mark 10:29-30, “Zisu in, ‘A si thungai in ka lo sim: zokhal sisehla a inn siseh, a lo siseh, a unau siseh, a farnu siseh, a nu le a pa siseh, a fatepawl siseh, Keimah le Thuthangṭha ruangah a tlansantu cu, (cang 30) tui san hrimhrim ah hin tam sin a ngah ding. Inn siseh, lo siseh, unau siseh, farnu siseh, nu siseh, fate siseh, a let zakhat in a ngah ding; cuih tlunah hremnak khal a ngah ve ding. Cule a ra dingmi sanah kumkhaw nunnak a ngah ding a si.”
WFM zirhtu asilole zumnak thlaici zirhtu tampi in hi hitawkih cang 30 nak ih “Harsatnak” timi hi an lan/hrelh ringring.
Himi Bible cang ih simduhmi (context) theihnak dingah cang 28-30 kan zoh asile paisa thu le lennak thu a um lo. Zisu le Thuthangṭha ruangih ziangkim tuah ding a si. Zisu ih simduhmi ngaingai cu: Keimah le Thuthangṭha ruangih inn siseh, lo siseh, unau siseh, farnu siseh, nu siseh, fate siseh a feh santupawl cu zumtu insang thar, Pathian loram, zumtu unau thar, zumtu farnu thar le Thlarau lam fate “A LET Zakhat” in an ngah ding timi a sim duhnak a si sawn.
An thu simi an thlun ngaingai asile thuthangṭha an sim rero lai ah an mah in midang hnenah sumpai an pek ringring a ṭul cule a let za in an ngah ve sal ding.
“Seed-Faith” Hmanguarzet Leitlun Thusimthiampawlih Nundan
Oral Roberts (Seed-Faith thawktu)
Oral Roberts cu ‘Brioni suits’ kawr/angki $ 500 ihsin $1000 man a hruh ringring. Buut (shoes) $ 100 man a hruh ih Tulsa ah inn $ 250,000 man ah a um. Diamond zunghruk a hrukih sui ih tuahmi faute/ngelbun a bun. Automobiles $ 25,000 man a hmangih thla 6 ah a thleng ringring. A fapa Richard ih tuahmi “the most prestigious and elite country club in Tulsa” (Cutawkih membership lawngah mi pakhat $ 18,000, thlatin $ 130 siah thawn) kiangkap ah $ 2 million cemin a feh/zam ṭheu. An pafa in ‘the ultra-posh Thunderbird Country Club in Rancho Mirage, California’ ah an feh ih sungtelsinak (membership) lawng hmanah mi pakhat $ 20,000 a si, tuahcun $ 25,000 a si. Cutawkah games pawl tla an lekih zohmawilo zetih an umnakpawl hin an sungkua hrangah milian (millionaires) insang si hman sehla nunnak hrangah ṭhenṭhekawknak a suah phah. A fanu le a makpa (a fanu ih pasal) thah an si laiah $ 10 million hrawng an tlanpi ti a si. (Evangelist R.L. Sumner's review of Give Me that Prime- time Religion by Jerry Sholes).
Paul le Jan Crouch
TBN Televangelists in Inn $5,000,000 Man Lei
LOS ANGELES TIMES, Nov. 4, 2001, page K15
Costa Mesa-based Trinity Broadcasting Network ih Televangelists JAN le PAUL CROUCH cun $ 5 million cemin tipi kapah inn an lei asi ti’n Orange County Realtors cun a sim.
Cui inn cu tipi kapah a siih tipi le khawpi pawl fiang zetih a langnak hmun a si.
Cui inn-pi ahcun ihnak khan 6, khawlhawknak khan 9, billiard lehnak khan, boruak hipnak (a climate-controlled win cellar), pawipengih fehnak karbak (a sweeping staircase) le Insung tlungih retmi mei-tleu mawi (crystal chandelier) pawl a um.
Cui innpi cu 9,500-square-foot kiangkap inn a si ih elevator, mawṭawn retnak 6, tennis court le tili mawi zet pawltla a um.
Hi inpi hi a phei lamah e-kah khat (acre) hnakih tam a siih Jan Crouch cun a uico hrangah hmun tum deuh a hngak rerolai tin a kiang naiih umtu cun a sim.
Trinity Broadcasting cu 1973 ih dinmi a siih air worldwide ah 768 TV station hnakih tam an nei zo. ( Los Angeles Times, Nov.4, 2011, page K15 thuthang ih rak nganmi ka leh sawngmi a si)
Creflo Dollar
The Atlanta Journal-Constitutio http://www.accessatlanta.com/
Rev. Creflo Dollar Jr. cun a tuahmi ah ningzahnak umloin biaknak hrangih an sahmi innpi ah a hmin a ti lang. Amah cu Rolls-Royce dum a mawng ṭheu ih Europe ram tlunin a mai bulpak vanzam thawn $5million cemin a zam ṭheu. Cule amah cu $1 million innpi ah a um. (Atlanta Journal ih nganmi lehcawp thotho a si).
Joel Osteen
Tulai santhar thusimthiam hminthang Joel Osteen ih inn man cu $ 1,265,500 a si. (http://north-valley.com/
Joel Osteen hi tulai leitlunih thusimthiam hminthang Pathian ih mihman ropi a si. A sermon tla ka ngai ringring, kan laimi tampi khalin nan ngai ding ka zum. Amah hi vaikai (universal salvation) pawmtu a si. Neihbangaw (homosexual) tla a do lo, cumi ruangah kan dung naite ah John McArthur nih tla a rak mawhthluk dah. Seed-Faith uarzettu lakih pakhat a si ve.
Joyce Meyer
From Fenton to fortune in the name of God
Carolyn TuftandBill Smith
©2003, St. Louis Post-Dispatch
11/15/2003
Joyce Meyer cun i liantertu cu Pathian a si tin a sim:
Ziangkim ka hnenih thlengmi cu Amai hnenin a si: $ 10 million man vanzam (corporate jet), a pasal ih mawṭawn man $107,000 (silver-gray Mercedes sedan), a inn $ 2 million le a fa le pali hrangih a dang inn $2 million. Thlawsuah tinkim hi Pathian kutcat kan parih thlengmi a si tin a sim.
Joyce Meyer cun ka pasalih $ 107,000 man mawṭaw a tonak cu ‘khavek mawṭaw ka pasal in a duh” tin a sim. 1 John 2:15 cun, “Hi leilung le a sungih thilri hi tlaihsan hlah uh; hi leilung hi nan tlaihsan asile Pathian duhdawtnak nan nei lo a si” a ti.
Cuti asile Joyce Meyer in zung cabuai hrangih $30,000 man cabuai mawi a leimi teh? French nahzi $11,000 a leimi teh? Tili parih inn $500,000 man leiin cumi hrangih lawng $ 105,000 man a leimi teh? Na theithiam ko ding!
A insang le zungih a hmanmi le a leimi thilri manpawl tla lo ruahseh la na mang a bang men ding, an thuhla hi a tawinak tete lawngih lak a si.
Benny Hinn
Hinn ih promised healing center cu ziang a cang?
06/23/2002
By STEVE McGONIGLE/ The Dallas Morning News
Evangelist Benny Hinn cu a liamciami kum thum ah Lourdes ihsin Las Colinas ah himi thuthawn pehparmi ruahnak thupawl a sim. Pentecostal thusimtu pakhatin mipi hrang multimedia tour cu nei dingin siseh, faith healing ah mipi in Pathian an biak theinak dingin le cumi hrangih a ṭulmi paisa cemzat $30 million cu mipi hrangah tin a hlu . Cumi cu a rei hlan ih cangsuak ding vekin a mah thluntu in a sim.
Mr. Hinn ih “World Healing Center” cu sak ti ni a um lo. Cuihnu thla reilote i si khan khami thuhla (project) simrel a um nawn lo. Hinn ih cumi rawngbawlnak cu mipi hnenah ziangtluk sum kan nei ih ziangtluk a cem tivek simrel a um nawn lo. Kan dungkumah Los Angeles ih ‘Pacific Ocean south’ ah rawngbawltupawl umnak (parsonage) cu Mr. Hinn ih hohanakin $3 million cemin tuah a si. (2002 laiih The Dallas Morning News ih ngandan vekih lehmi a si)
Paula White
“Randy le Paula White cun kan lennak mipi hnenih lang ter hi a pawinak a um lo” tin an sim. Thusimthiam Randy le Paula White tla $2.2 million red-brick innpi an lei.
Cangantui' Ruahdan
A tlunih Seed-Faith uar zettupawl nundan zoh tikah nuamtawlin an um ti kan hmu. Thusim cu an thiam ngai. An sumlepai khi farah reithei mi harsa tla bawm sehla ziangtluk a manhla ding. Zisu cu nuam zetin Thinlamta a phur lo. Len a ṭha lo, rawngbawltu cu farah ding tinak a si hrimhrim lo. Rawngbawltu cun inn ṭha zet, mawi zet pakhat nei ko seh, mawṭaw tla nei ko seh, vanzam tla nei ko seh. Asinan ziangah inn pali nga, mawṭawn pa-ngaruk le vanzam tampi cu? Bible in leitlun thil ngaina tuk lo dingin in zirh. Curuangah keicun “Seed-Faith” timi cu Bible vek ti hnakin Sumdawnnak phun khat tin ka hmu sawn, dik khal a dik.
Nangteh himi Cahram hi ziangtin na ruat? Seed-Faith (Zumnak Thlaici) teh ziangtin na hmu? Zumnak Thlaici teh na tuh dah maw? Zumnak Thlaici (Seed-Faith) rak tuh dahtu na sile ziangah zumnak thlaici na rak tuh timi pakhat te ka lo sut duh. Asancu Pathian hnenah pakhatkhat ngah ding beiseinak ruangah Zumnak Thlaici na rak tuh a si ko lo maw? Ziangah Zumnak Thlaici cu kan tuh? Rawl-ei ding harsat tuk kan phangih a si pang maw? Sinfen hruh ding neihlo kan phangih a si maw? Neih tam sin duh menah teh a si pang maw? Cuvek ruangih Zumnak Thlaici (Seed-Faith) tuhpawl hrangah:
Matthai 6:25-26 ,
“Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuanpawl thu ruat le dawnhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khalin taksa a ruangpi hi a thupi sawn lo maw? Cang 26, Van ih a zuangmi vate khi zohhnik uh; annih in THLAICI AN TUH LO, rawl khal an khawm lo ih cuam sung khalah an khawl lo. Asinain vancungih a ummi nan Pa in a cawm thluh a si. Vate hnakin tampi nan sunglawi sawn a si lo maw?
Neihtamsin duhmenih Zumnak Thlaici tuhpawl hrang ahcun Leitlun ah duhkhawpti a um cuang lo ding.
Matthai 6:25, “Nunak sawn hi rawl hnakin a thupi sawn lo maw? Hnipuan hnak khalin taksa ruangpi hi a thupi sawn lo maw”? Matthai 16:26, “Mi pakhat in leilung pumpuluk co khalsehla a nunnak a hloh ahcun ziang ṭhathnemnak so a um”?
Luke 8:11, “Hi tahṭhimnak ih tican cu hiti in a si: Thlaici cu Pathian ih Ṭawngkam a si”. (Betmi, Thlaici cu Paisa a si a ti lo)
Mark 4:13-20 tiangkhi siaraw. Thlaici vawrh tahṭhimnak simfiangnak a si. Khai Thlaici thukha sumpai thu a si hrimhrim lo ding. Cang 20 nakih “…rah an rah, a let sawmthum, let sawmruk le let zakhat tiangin an rah a si,” atimi khal Sumpai a si hrimhrim lo.
2 Peter 2:1, “Hlanlai Israel mi lakah profet diklo an rak um; cuvek thothoin a tu nanmah lak khalah zirhtu dik lo an lang ding. Mi siatsuah theitu le a dik lomi thurin an tuhlut dingih an mah a tlentu kan Bawipa hman an hnawng ding”.
Thukharnak
Simrel ding tam a um lai nan ca a sau zik deuh tikah cemnaklam kan pan mai ding. Ngaingai tei ti ahcun Seed-Faih hi ka do lo, asinan keimah ih tuah ding ahcun ṭulin ka thei lo. Amahlawngte sumpai thawi rawngbawlnak thawn kan rawi pang ding cu a phan um. Ṭhimnakah, kei hi Pathian hnaṭuantu pakhat ka si. Mi pakhat asilole kawhhran members sungin na rawngbawlnakah tel ka duh ti’n a theitawk, thawng sawmnga (50000 kyat) i ra pe a si ahcun cucu sumpai thawn Pathian hnaṭuan a si (seed-faith a si lo). “Fiangte in ka lo sim: ka dungthluntupawl lakih nautabik kha ka dungthluntu a si ruangih tidai khuat khat a petu cu ṭhatman a ngah tengteng ding,”(Matthai 10:42).
Ziangah Zumnak Thlaici (Seed-Faith) ṭul ka tilo ti asi ahcun Bible, Pathian thu in “Thlaici tuh a ṭul, cui’ Thlaici cu a keuh a ṭul” a timi ka hmu lo. Thuthlung hlun kan zoh asile ṭhen-hra ṭhen-khat cu Pathian pek ding tin in sim, a dik.
Amahlawngte Evangelist, Pastor lole mi pakhat (rawngbawltu or bible tlawngta) hnenah na Pathian hnaṭuannakah ka tel duh tin sumpai, thuamhnaw, ei ding, ti le rawl na pe a si ahcun ṭhatman cu na ngah hrimhrim ding (Matthai 10:42). Sumpai thawn Pathian hnaṭuan asilole mission hnaṭuan timi le Seed-Faith hi a danawk verver ruangah a siartu zaten kan theihthiam theinak dingah Pathian in thlawsuah in pe hramseh!
0 comments:
Post a Comment