Matthai 27:5 ah ‘amah le amah a hngawng in a awk that
aw’ a tiih Tirthlah 1:18 cun ‘a bah ih a thi’ a ti. Khuimi a dik
sawn?
Matthai cabu hi AD 37, Judea ah nganmi a siih a
ngantu cu Matthai (Levi tiih kawhmi), Alphaeus ih fa, James ih unau a siih Zisu
dungthluntu lakih pakhat a si. A nih cun fiangfel zetin a hmuhmi vekin “Judas in tangka sawmthum cu Biakinn sungah a
hlawnta ih a suak. A va feh ih amah
le amah a hngawng in a awk that aw” tin Matthai 27:5 ah a ngan.
Tirhthlah cabu hi Luke (sibawi) ih nganmi a siih AD
63 hrawngih a nganmi a si. Luke cu Zisu ih dungthlungtu/tirhthlah a si lo. Cumi
ruangah Luke ih simmi a dik lo tinak a si lo. Tirhthlah 1:18, Judas in thilsual a tuahmi manih a ngahmi
tangka in lo pakhat a lei ih cuih lo sungah a bah ih a thi; a pum a kuai ih a sungril hmuah a pawt ṭheh.
Ṭawnghram kan zoh asile Tirhthlah 1:18 hi Greek
in “preeneés genómenos” timi a hmang, asancu mirang in (falling headlong)
ti a siih a bah siloin a tla tinak a
si sawn.
Curuangah Luke cun a theihmi thu kha Matthai ih
nganlomi tiang kimcang deuh in a vun ngan tinak men a si. Judas in tangka
sawmthum cu Biakinn sungah hlawn tahratin a suah hnuah a mah le amah a hngawng
in a awk that aw ih cumi cu a rei tikah a awk that awknak thinkung a kiak tla
maw si ding, a taksa a ṭawih thlang ruangah tla maw si ding, hnuai ah a tla ih
a sungrilpawl an pawt, an kuai ṭheh cu a si bik ko ding. A umdan cu thilcangmi pakhat kha dik veve tho siin an
mai duhnak zawn te veve an nganih pakhatin kimcang deuh in a ngan tin ka
ruat.
0 comments:
Post a Comment