A Almi Coffee

Tlangval pa cun fala mawi zet cu puai hmunah a hmu. Fala nu cu mi mawi zet a siih mipa tampi a kiangah an herh aw cupco. Asinan tlangval pa cu midai te a siih zo hmanin tla an ngaihsak tuk lemlo. Puai a cem tikah tlangval pa cun falanu cu coffee inpi dingin a sawm. Fala nu cu a mang a bang zet, asinan a mawinak in 'aw' tin thuthiam a pek.

Coffee dawr mawi zet pakhat ah an to. Tlangval pa cun vun sim le a ngam laklawh silo umdan a thiam lo, a laklawh thluh. Fala nu cun i theithiam aw zangfahten ka tlung ding ti sehla tin a ruat rero. Cuveten tlangva pa cun cabuai hnultu cu a ko ih “Cite in pe thei kem zangfahten? Ka coffee sungah ka thlah duh”.

Kiangkappawl an mang a bang thluh, tlangval pa cu an zoh khiokhio. A ning a zak deuh, a hmaipawl tla a hung sen thluh thlang, asinan cite cu a coffee sungah a thlah ih a in. Fala nu cun thu duh zetin: “Ziangah hivekin na tuah” tin a sut.

Tlangval pa cun, “Ka nauhak laiah, kan nih cu tipi kiangih rak ummi kan si, tipi almi pawl khi ka rak duh zetih tipi al khi kan rak tep ṭheu. Cucu tui ka in mi coffee thawtnak vek ciah hi a si. Tu ahcun coffee al hi ka in ṭheu, ka in tinten ka nauhak lai ka mang ih kan inn tla ka ngai tuk, cutawk hmunih um ka nulepa tla ka ngai tuk” tin a sim.

A sim rero lai ah a mittli cu a biangno parah a rung luang zerzo ih fala nui thinlung a khawih zet.

Cuṭheh veten fala nu khalin a innsang a ngai thu, innsang thawi an hlat awk thu le a nauhak lai thupawl tla a sim thawk ve. Cutin titi a thaw ih thu nuam zet ah a cang, thuanthu maiw zet thawknak khal a si fawn.

Lehhnu ah an tawngaw sal. Fala nu cun a duhthusam valpa a tawng ngah, a nih cu thin ṭha, nunnem le mi ngaihsak zettu a si ti khal a hmu fiang vivo. Fala nu cun a nel vivo. A coffee al ruang khalah a lung a awi zet. Cui thuanthu cu mi tampi ih neihmi duhdawtnak thuanthu a si ve ko. Siangpahrang pa le siangpahrang nui’ duhdawtnak lamtluan mawi cu an hluan ko.

Cutin an tawnawk ih coffee an inn tinten fala nu cun tlangvalpa ih coffee ah cite (a al) a tuah sak ringring, ziangahtile a duhdawtmi ih duhmi coffee a thei ngah zo si.

Kum 40 a rei hnuah tlangval pa cu a thi. A fala cu ca a tan ta: “Ka duat, ka nun sungih thuphan ka sim nak parah in ngai thiam aw. Himi pakhat lawng hi ka rak lo bummi a si – Coffee almi kha. Hmaisabik kan tawnawk lai kha na mang lai ko ding, khami lai kha umdan ka lai thluh, ngaingai te cun a thlummi si ka duh, asinan a almi cite tin ka simih thleng sal ding le a har tuk ruangah si. Hmanseh, khakha kan biakawk thawtnak le thawknak a si ding ti ka rak ruat dah lo.

Vawi tampi cu thudik lo sim dingin ka zuam nan ka ngam thei ngaingai lo ihsi. Ziangahtile ziangkimah lo bum lo dingin thu ka rak lo tiam zo si. Tu ahcun kei cu ka thi zo ih na hnenih thudik sim khal ka ṭih nawn lo. A Almi Coffee kha ka duh lo lawlaw, a thaw lo tuk.

Asinan nang thawi kan tawnawk ihsin ka nunnak ah a almi coffee a um. Na hrangih ka tuahmi ziangkim ah ka sir aw lo. Ka kiang ih na um kha leitlun ka nun ih ka lungawi bik caan a si. Vawikhat te nungdam thei sal nungna na hnenih um hi ka hril bik thotho ding, a al zetmi coffee ka in sal ding hmanah”.

Fala nui’ mitthli fawr cun cahnah cu a ti ciar thluh.

Ni khat cu a rualpipawlin fala nu cu an sut: Coffee al mi kha ziang a bang?

“A Thlum Tuk” tin a let.

·        Duhdawtnak cu hngilh ding asilo ih ngaidam ding a si.

·        Zoh ding a si lo ih theihthiam ding a si

·        Theih ding a si lo ih ngai ding a si

·        Feh san ding a si lo ih KAIH HNGET ding!!!

Duhdawtnak cu hnihnakin a thawk, hnamawknak in a ṭhang vivo ih mitthli in a cem!

Source: Knowledgepublisher