Shares & Companies

By: Zilthli Lal Nei Thluai

 2016 le teh kawlram ah ziangmi thiltharpawl a ra thleng pei?

Kawlram tla hi nuam teten kan tthangso rero ko.

# 1990 hrawngin coffeemix, dry noddle tivek kan in kan ei thawk.

# 1992 ah Chinese food, Thailand food tivek rawldawr nasa zetin onthar a siih, Beer dawr khal tampi an ongthar.

# 1993 hrawngin sungkua ttangrual in Bakery tivek dawr onthar a si.

# 1994 ah Five Stars Hotel le rawldawr kopin on thawk a si.

# 1995 ah City Mark le Super Market tivek a ra suakthar lala.

# 1997 ahcun kawlram rori ih suakmi thil cu super market le dawr dangdang khalah zuar thawk a si.

# 2000 ahcun Purified Drinking Water pawl kan hmang ttangkai zet thlang.

# 2006 ahcun Japan rawl Sushi a ra lut thawk.

# 2007 ahcun Korea food zuarnak dawr tamzet on bet rero a si.

# 2008 ahcun innsangnu lole minu pawl khal lengsuak ih hnattuan a si thlang ruangah, innlam ih rawlsuan tivek a mal vivo. Inn ih lenawk tivek hnakin coffee dawr, rawldawr tivek ah tongaw in thurel tlang tivek a si thlang.

# 2011 ahcun ramdang rawl pawl zuarnak dawr hi nasa zetin a karh vivo.

# 2012 ahcun Coca Cola le Pepsi pawl a ra lut. Cule sanman zetin sakmi Shopping Mall le Rawldar khal a thar on bet rero a si.

# 2013 _ 2015 sung ahcun Marry Brown, Lotteria, KFC, Pizza Hut tivek leitlun huapih hmin a neimi rawl pawl khal kawlram ah a um ttheh thlang.

Shares & Companies (1)

Shares timi cu ziang a si?

A tlangpi thuin Company pakhat an din zik tikah Shares an zuar ttheu. Company pakhat in Shares a zuar timi cu, Company cangvaihnak hrangih ttulmi sumpai kha mipi hnen ihsin a cawi tinak a si. Cumi company a dinsuaktheinak dingah kan paisa a tel ve ruangah, kan ni khal Company neitu ah kan cang ve.

Curuangah Shares tampi kan lei le Company ah kan thuneihnak a thuk ve dingih Shares malte lawng kan lei le kan thuneihtheinak khal a niam ve ding.

Tahtthimnak ah Coca Cola Company dintu hi Warren Buffett a si lo nan, Coca Cola Company ih Shares neitambiktu a si ruangah, tuisun ni ah Coca Cola Company ih Pa bik dinhmun a din theinak a si.

(Shares lei dah hrihlotu um pang le _ Shares lei ti cu, Bank ah va feh ih `Shares ka lei duh´ va ti mai a si ko. Cule cahnah pakhat parah Hmin, hnattuan, umnak Address pawl phih ttulmi a um. NRC copy pakhat kel tel ding a si.)

Kawlram cu Stock Exchange kan rak neih lo ruangah, Shares pawl hi Bank ah kan lei ttheu. Kawlram ahcun Shares hi a tlangpi thuin, hnahkhat ah Ks. 10,000 in an zuar thawk tlangpi. Shares hi a man a kai thei ve.

Company pakhat ih Director si thei dingcun, cumi Company ih Shares a malbik hnah 5,000 tel lei a ttul. Shares hi hmat-pung-tin neitu zo pohpoh ih lei theih a si. ( Foreign Participation thawn pehpar awin neta ka rak ngansal leh ding.)

Company pakhat ih Shares cu lei ding a um ringring lo. Ziangah tile Company cun paisa hman a ttul caan te lawngah Shares a zuar ve. Cutin Company lamtluang ten a fehsuak vivo theinak dingah kan paisa in cawi ruangah sumtthang cu in pek a ttul hrimhrim a si. Peh lai ding ............

Note : Himi thuhla pawl cu kawlram dinhmun ah tthumaw ih nganmi a si. Ka canganmi hi 100% a dik thluh ti cun ka ti ve lo. Ka ti palhnak zawn tla a um pang thei. Casiartu in theihfiang lomi a um khal a si le, zokhal thinlung thiang ten ruahnak pekawk, thusuhawk theih ringring a si.

Shares & Companies (2)

Shares Phunnih

Shares (႐ွယ္ယာ) hi Ordinary Shares (သာမန္ ႐ွယ္ယာ) le Percentage Preference Shares (ဦးစားေပး႐ွယ္ယာ) tin phunhnih in an tthen. Himi Shares phunnih ih danglamnak cu sumtthang kan ngah dan ahhin a si bik.

Ordinary Shares

Shares lei ciocio khalah Ordinary Shares leitu lawngin Company neitusinak kan co ban ding a si. `Ordinary Shares ka leiih Company neitusinak ka nei ve a si.´ tin Company hnattuantu pawl lakih rak ttherawk ciamco tum cu a ngah cuang lo. Ordinary Shares leitu cu Company neitu kan si ruangah Company a hnattuan a hlawhtling ih sumpai tampi a hlep thei a si ahcun, kan ni khalin sumtthang tampi kan ngah ding. Company a hnattuan a tluang lo pang a si ahcun, kan ni khalin kan rak tuarpi ve ding a si.

Curuangah Ordinary Shares leitu hrang ahcun sumtthang ziangzat kan ngah ding ti hi simcia theih a si lo. Company neitu tete Company in a hlawhtthat caan le kan rak hlawk pi ve kei, a hnattuan tluang loih a um pang khalle kan rak riahsiatpi ve a ttul a si. 

2015 ah sumtthang 20% lawng kan ngah nan, 2016 ah 40% kan ngah leh thut tla a si thei, simcia theih a si lo.

Percentage Preference Shares

Preference Shares leitupawl cu Company neitu sinak an co thei ve lo a si. An nih pawl cu Company in kumkhat ah 30% sumtthang ka pe ding a ti ahcun, Company a hnattuan a hlawk khalah siseh, hlawklo khalah siseh, 30% sumtthang pe dingih fix a tuah vek cekci in a pe ding a si. (Tlawng ka kainak ka sayapa cun kawlram in Preference Shares kan nei lo a ti.) Sumtthang cu kumkhat veikhat pek a si.

Shares hi ziangvek Company pawl lawngin an zuar thei tile, peh lai ding..............

Note: Thei hrihlo um pang le Bank ih paisa kan ret ruangih kan ngahmi cu interest (အတိုးေငြ) a si. Cule Shares kan lei ruangih kan ngahmi sumpung cu dividends (အျမတ္ေ၀စု)a si. Ngaingai ti ahcun Ordinary Shares leitupawl tla cu, Company ih profit an zemawmi a si tikah, sumtthang cu a si ciah lo nan, a let danding dang ka theih lo ruangah a si.

Shares & Companies (3)

Ziangvek Company pawlin Shares an zuar thei?

Company hi Private (ltd) le Public (plc) tin phunhnih in an tthen.

Private Company cun an Shares pawl hi mipi hnenah an zuar thei lo. Company sungih directors pawl hnen lawngah an zuar thei.

Public Company cun a Shares pawl hi mipi hnenah a zuar thei. Mipi ziangzat hnenah a zuar thei ti limit a um lo.

Private Company ahhin a malbik director mi pahnih tal an um a ttul ih, Public Company ahcun director mi pasarih tal an um a ttul. Cumi cu kawlram in kan neihmi dan a si ruangah, paisa ka nei ti tapoh in Company din theih a si lo. Company din duh hrangah, hril ding a ummi cu Cozah hnenah Loan (ေခ်းေငြ) kan la ding maw lole Shares kan zuar ding saw? ti hi a si.

Cozah hnenah Loan la duhtu cun aa-mah-khan nak hrangah, innhmun le inn a kopawmi a neih tengteng a ttul. Innhmun kauzet lole leiram hmun tampi ah nei khal sehla a ttha hnemlo. Cuvek thothoin hmun tampi ah innkhan nei khal sehla a tthahnem cuang lo. Innhmun le inn kopaw ih a neitu lawngin cozah hnenah loan lak sian a si.

Shares kan zuar duh si bang sehla, Company din hmaisat ta tengteng a ttul a si. Company hmanah Public company fekfek a ttul bet. Curuangah Company pakhat in Shares a zuar ti hnuhnu Public Company a si tinak a si mai. (Public Company si thei dingin daan tampi a um nan Shares leitu (share holders) pawl thawn direct in pehparawknak a neih lo ruangah ka ngan tello. Thei hrihlo ih thei duhtu a um pangle in sim thei ko.)

Shares vek deuhin Debentures (ေငြေခ်းစာခ်ဳပ္) khal Public Company cun a zuar thei bet a si. (Debenture thuhla cu neta ah ka simfiang sal ding.)

Shares le Debentures ih danglamnak cu, ngan peh lai ding .................

Note : Shares hi kawlpawl cu အစုတစ္စု ၊ ႏွစ္စု ...... tivek in an ko. Asinan a zate kom cun အေစာင္ အေရအတြက္ tin an ti lala. Shares hi laittong in ziangtin kan siar ti ka theihlo ruangah `hnahkhat, hnahhnih ..... ´tivekin ka hmang mai. Economic lamih hmanmi cafangpawl vun let ding hi ka laittong thiamnakin a daih lo ttheu. Curuangah keimahte ka phuahcawpmi a um hnuaihni, fianglonak zawn a um le in sutsal hram uh tiah....

Shares & Companies (4)

Debenture (ေငြေခ်းစာခ်ဳပ္)

Debenture khal Share vek thotho in lei a si ko. Debenture cu Preference Share thawn a bangaw deuh. Debenture kan lei ruangah Company neitu sinak kan co ban cuang lo ding. Cule,10% Debenture tivekin percentage kan hmu a si ahcun kumkhat ah sumtthang 10% a pe ding tinak a si. Company hna a ttuan tthat khalah siseh tthat lo khalah siseh, % fix a tuah vek cekci in sumtthang a pe ding a si.

Share le Debenture ih Danglamnak

Shares cu veikhat kan lei zo hnuhnu Company in in tlensal nawnlo ding. Asinan Debenture cu in tlensal ding. eg. 10 yrs Debenture tivek a si ahcun kumhra a kim le Company in kan leimi Debenture pawl kha in tlenthluh sal ding tinak a si. Asinan kan leinak man zat cekci cun a si lo ding.

Ziangah tile 2010 ih paisa 200 cun coffee khuatkhat a lei thei nan, 2020 ahcun paisa 200 in coffee khuatkhat a lei thei nawnlo tla a si thei. Khavek ih paisa man tlak dan (money inflection - ေငြေၾကးေဖာင္းပြမႈ ) pawl kha an ruat tel thluh ciamciam ko ding. 

Himi Debenture khal hi Public Company lawngih zuar theimi a si.

(Thei hrihlo hrangah __ Company din ding tikah Company ih hnattuan tum le tet dan ih zirin hmat-pung-ttin dan a phunphun in a um. Kan Company in ၿမိဳ႕နယ္ sungte lawngah hna kan ttuan duh a sile ျမဳိ့နယ္အဆင့္ ah, ျပည္နယ္ sung lawngih hnattuan kan duh le ျပည္နယ္ အဆင့္ ah, တိုင္းေဒသ tiang kan ttuan duh le တိုင္းနဲ႔ေဒသႀကီးအဆင့္, ႏိုင္ငံေတာ္ tiang kan ttuan duh a si le ဗဟိုအဆင္. ah tivek in hmat-pung-ttin dan phun tampi a um.

Tuihlan ahcun Company din hnuhnu central level in hmatpungttin cih a si mai. Asinan 2014 ihsin hmatpungttin dan thar kan hman thawkmi a si. Company din fekfek cuang lo khalin ramhuap piih hnattuan thei dan a um thotho. Partnership, family business tivek a phunphun....)

Sahres kan lei le Bank ih paisa kan ret ih danglamnak cu,Peh lai ding..............

Note: Kawlttong ka rawi deuh ih lai in a let dan ka thiamlo ruangah si. In theithiam hram uh.

Shares & Companies (5)

Shares lei le Bank ih paisa ret

Kan paisa hi Bank ih kan ret ahcun paisa kan ttul tiktik ah, olsam zetin kan va suah lohli thei. Cule kumtin bank in fix an neih vekin sumtthang kan ngah ringring bet fawn.

Asinan Shares kan lei ahcun "paisa ka mamawh tuk ih ka lo leimi Shares pawl lo khirhsal ka duh." tiih va ti a ngah nawnlo. Shares veikhat kan lei zo hnuhnu khirhsal a ngah nawn lo. Asinan zuarsal cu a theih ringring. Shares kan lei ahcun Company neitu sinak kan co theiih Bank ahcun paisa ziangzat va ret khal sehla, kan ngah dingmi cu sumtthang lawng a si.

e.g YKKO Groups of Companies limited, 7 Stars Holdings Company Limited, Yoma Bank Limited, Lucky Man Co.,ltd ........ tivek in Company hmin ngandan a bangaw lo, kan hmuhmi a um cio ko ding.

"Groups of Companies" , "Holdings Company" le "limited" himi cafang pawl hin simduhmi tampi a neiih, a huap khal a huap kau zet fawn.

"Limited" timi cafang hi kawlttong cun ေပးရန္ရိွေသာ တာ၀န္မ်ားကိုကန္႔သတ္ေပးထားျခင္း tin a si. Shares kan leinak Company hi sungral thluh bang sehla, Company in leiba a neihmi pawl cu kan nih Shares leitu pawl in kan va kuanpi a ttul lo ding. Cun, Shares ka leimi paisa pawl khal in kuan theizat lawng in kuan ve ding. In kuan theilo bembem a si hmanah, rak lungawi loih um theinak kan nei ve lo. Cumi cu "limited" timi cafang ih simduhmi a si.

Company sungral thluhin hnattuan cawl a tum pang a si ahcun hmaisabik ah Loan a lakmi pawl a kuan ding. Cumi paisa hleimi in Debenture leitupawl a kuan ding. Cutluh in Preference Shares leitupawl a kuan ding. Cumi ttheh in Ordinary Shares leitupawl a kuan ding. Cumi cu kan ramin a neihmi daan a si.

Kan Shares zuarsal duh bang sehla, peh lai ding.................

Note: Share le Stock himi a bangawmi a si ko. Share hnahkhatte lawng a um le cu Share tiih kawh a siih, hnahkhat hnakih tam a umkhawm cun stock tiih kawh a si. Singular le plural kawhdan a si mai. Curuangah Share leitu khal `Share Holders´ lole `Stock Holders´ tiih kawh a si.

Shares & Companies (6)

Shares cu zuarsal a theih

Shares kan leiciami kha zuarsal kan duh tikah "zo saw Shares lei duh?" tin a leiduhtu ding hawl lole, mi va zawrh ciamco tivek cu a si lemlo. Kan leinak ah kan va ap sal dingih kan zuar duhthu kha kan va sim mai ding. Cumi tikah hnattuantu pawlin a lei duhtu hnenah an rak zuar mai ding. Asinan commission fee lawngte kan pek a ttul ve.

Company a hnattuan a tthat ah tlacun Shares man hi a kai cak thei zet. Shares an zuar pekte ah hnahkhat Ks.10,000 in an zuar nan, hnahkhat Ks.15,000 ah a kai a si ahcun, a mankai zat Ks.5,000 kha cu premium (အပိုေၾကး) tiih kawh a si.

Shares na lei laiah hnagkhat Ks.10,000 asinan na zuar duh caan ah hnahkhat Ks.20,000 a rak si a si ahcun, nangkhal in Ks.20,000 in na zuarsal ve ding a si. Cumi cu bik cu si Shares leitupawl in an hngah ttheumi cu!!! Shares kan lei le Comapny sinak ka co fawn, cule dividends khal kan ngah bet. Zuarsal kan duh a sile a miat tel dingin zuarsal a thei bet si!

Company pakhatin Shares a zuar pek hnahkhat Ks.10,000 ih a zuar laiah rak lei ngah loin, Shares man a kai hnu hnahkhat Ks.20,000 a si hnu lawngah na lei a si khalle dividends cu an zuarhmaisakbik (Nominal value _ မူရင္းေစ်းႏႈန္း) Ks.10,000 par thotho in an lo pe ding a si. Ziangah tile Company in cozah hnenah Ks.10,000 in ka zuar ding tin saa-chuk a rak chuk zo ruangah a si.

Kawlram cu Stock Exchange kan rak neih lo ruangah, Shares hi Bank ah kan lei ttheu. Company in le a Shares pawl zuarter dingah Bank zaten thawn joint lemloin, Bank hmanmi bul deuh a neih tikah ziangtik caanah Shares an zuar? Khuitawk Bank ih va lei ding a si? tivek hi rak theih thluh a ol lo zet. Shares lei tthang deuh rualpi neih lo betbet ah tla cun. Asinan tu cu Yangon Stock Exchange tla 9.12.2015 ah tluang ten onnak tuah zo a si ruangah Shares thawn hnattuan duhtu hrang ahcun lamzin a nuam vivo sinsin ding.

Yangon Stock Exchange cu peh lai ding ..............

Note: `stockholders´ le `stakeholders´ himi hi a cafang a bangaw deuhih keimah khalin a bangaw ah ka rak ruat dah. Stockholders timi cu Shares leitu zate kha an si. e.g Coca Cola Company ih Shares leitu zaten Coca Cola Company ih stockholders an si. Asinan stakeholders timi cu Coca Cola Company ih Shares khal lei cuang lo, Coca Cola Company ih suahmi Coca Cola a rak intu, dawr in a rak zuartu, Coca Cola Company ih hnattuantu tivek...... Coca Cola Company thawn a rak hnawihnihtu zate kha an si.

Shares & Companies (7)

Stock Exchange

Stock Exchange timi cu share leiduhtu mipi le Shares zuarduhtu Company olsam zetih kan dawrawk theinak dingih in tawlrelsaktu a si. Ramdang feh duhtu hrang Agent a um vek khi a si bik mai.

Yangon Stock Exchange 

YSX cu 9.12.2015 ah tluangten on suak a si zo. Asinan Shares pawl cu Feb, Mar 2016 lam lawngah a zuar thawk ding. Himi YSX onnak dingah Janpan in 49%(Tokyo Stock Exchange in 18.75% le Daiwa Institute of Research in 30.25%), Myanmar Economic Bank in 51% kyat zaten kom 32 billion tluk hrawng sumlu an phum.

Stock Exchange ah Shares zuar duhtu Company cun Stock Exchange in tahfung 17 a neihmi cu a tlin tengteng a ttul. A tlin lo ahcun a shares cu Stock Exchange ah a ret thei lo. Tuah Stock Exchange ah Shares zuar dingih lungkim pimi (Listed Public Company) company paruk a um.Cupawl cu 

(1)First Myanmar Investment (FMI) Company Limited
(2)First Private Bank limited
(3)Great Hor Kham Public Company Limited
(4) Myanmar Agribusiness Public Corporation (MAPCO) Limited
(5)Myanmar Citizen Bank Limited
(6) Myanmar Thilawa SEZ Holdings Public Limited (MTSH) pawl an si.

YSX cu himi Listed Company paruk thawn hnattuan a thawk ding nan neta ah a tahfung a tlingmi Company a um vivo ahcun, cu pawl thawn khal a ttuanglang vivo ding a si. Kawlram ah public company hi 200 lenglo a um.

Shares kan lei ding tikah, Stock Exchange ih shares zuar thei dingin Quality neimi Company a si pam tin ralttha hngal lo sehla a ttha. 

(1) Himi Company hi zoih hohami a si? 
(2) Himi company hin ziangvek hnabik ha a ttuan? 
(3) A hnattuanmi hi santiluan thawn a milaw maw?
Himi pathum kan thehfiang hnu lawngah Shares hi kan lei ding a si.

Leitlun ah Stock Exchange neilomi hi kawlram telin ram 9 lawng kan si. 
Stock Exchange on a si zo ruangah economic lamah ka tthanso vutvo ding ti cun rel ngam a si ciah cuanglo. 2010 ah La Oo Stock Exchange le 2011 Cambodia Stock Exchange khal an rak on nan an hlawhtling lo.

Shares & Companies (8)

Foreign Participation

Kawlram ah foreign direct investment hi mipi tampi cun an lungkim lo. Asinan mi tthenkhat lala cun foreign participation hi kan lungkim pi tengteng a ttul tin an ruat.

Kawlram tthangso ding ahcun ramsung ih ummi kan mah kawlrammi lawngih zuamnak cun a duhtawk lo pi. Foreign pawl hi kan ramah zalen zetin direct investment tuah thei dingin sangka kan onsak cu a ttul rori ko.

Kan ram zamrang teih a tthanso theinak ding ahcun kawlrammi le foreign hi kutkai aw ih hna kan ttuan rori a ttul. Asinan foreign pawl kan ramah direct investment zalen zetih tuahtheinak cozah in pe bang sehla, a tthatnak a tam rualrual in ttih a nunnak zawn khal a tam ve. A ttha thluh loih a se thluh cuang lo.

Kan ram 2015 election rak zoh thuptu company hi 200 kiangkap lai a um. Cule Asian Economic Community (AEC) tla rei lo teah a ra lut thlang ding. Foreign pawl cun 2015 election tluangten an hlawhtling a sile ziang kan tuah ding? An hlawhtling lo pang a si le ziang kan tuah ding? timi an thinlung ah thuruah ciami an nei ttheptthep.

Foreign pawl kan mah hrangah hlawknak a um ding ti an hmuhfiang tuk ruangah a sisi kawlram ih ra lut thei dingih an zuam reronak san cu! An hlawknak um lo ding cun kan nih Asian ram hmanih ram farahbik kawlram thawn ziangah saw kutkai awih hnattuan an tum rero ding?

Foreign pawl an ra lut cupco thlang ding! Ziangmi tumtahnak an nei? Ziangtivek ih cangvaih ha an tum ke? Ahleice in AEC tla rei lo te ah a ra lut thlang ding? Foreign pawl cu ziangtik vekin kan cangvai ding ti time table nei cia ttheptthep in an ra thleng ding hokhaw. Anmah pawl thawn hnattuan tlang dingin nangteh ziangvekin timlamnak na nei?

What is AEC? peh lai ding.......

Zilthli Lal Nei Thluai,

Shares & Companies (9)

Stock Exchange lole Stock Market thawn pehpar awih hmanmi cafangpawl hi, a cang ahcun theihthiam a har deuh ttheu. Curuangah ka thiamtawkin Stock Market thawn pehpar awih hman tam deuh cuangih ka ruahmipawl ka run tarlang. A rak hlawkpitu um pangah timi ruahsannak thawn.

Authorized Shares (ထုတ္ေရာင္းျပီးေသာ ရွယ္ယာ)

Company in cozah hnenah shares hnah 100,000 ka zuar ding tin sa-chuk rak chuk bang sehla, veikhat zuar ahcun a zaten zuar thluh hngal loin, hnah 10,000 lawng mipi hnenah ah a zuar lawk ding. Cu tiih mipi kut ih a thlengzomi shares cu “Authorized Shares” a si.

Bull Market
Shares man a kai ih Shares lei duhtu mipi an tam tinak a si.

Bear Market
Share man a tla ih share lei duhtu an mal. Share zuarsal duhtu an tam tinak a si.

Listed Company

Stock Exchange ah shares zuar dingin quality a neiih, Stock Exchange ih neihmi tahfung pawl a kim thluh ruangah Stock Exchange ah share zuar dingin lungkimpimi Company.

Private Company
Private company cun a shares pawl mipi hnenah a zuar thei lo.

Public Company 
Public Company lawngin mipi hnenah a shares pawl a zuar thei. Public ticu minung tampi in ta tinak a si. Curuangah Public Company cun ka hnattuan hi a hlawk lo ruangah tin a duhduh in a hnattuan a cawl thei mai lo. Stock holders pawlih lungkimnak a tel lawngah a cawl thei. Curuangah Company pakhat ah shares na lei hnuhnu Compay neitu na si. Curuangah right na nei. You have to know your right OK?

Share hnahkhat te lawng na lei a si khalle Company neitu na si thotho. Conference tuahmi tivek na kai thei ve. Cule an rorelmi na lungkim lo zawng a um a si khalle, lungkimlotheinak Right na nei. “Nang shares hnahkhat lawng lei maimai ziangha na rak ttong ve? Na lungkim lole na paisa kan lo pe kir dingih Company dangih shares va lei men aw.”tivek ih lo ti theinak an nei lo. Cuvek ih an lo ti pang a si ahcun cozah zunglam ah hek na duh ahcun cawh napiih kuanter an si hleiah, an Company tiang hman cawlter dingih daantat theih a si. Curuangah ziang kan tuah khalah ziangmi Right kan nei ti kan theihfiang ding a thupi tuk. Private Company cu a shares tla mipi hnen ih a zuarlo ruangah a duh tiktik caanah zalen zetin a hnatuan cawlh theinak a nei.

Joint Venture (JV)

JV ticu Company dangdang komaw in hna pakhat an ttuantlang tinak a si. E.g Wave Money timi cu Telenor le Yoma Bank in Joint Venture ih an dinmi a si. Kan ramah AEC tla a ra luh taktak cu JV timi cafang cu kan hmu leuhleuh thlang ding.

Bond (ေငြေခ်းစာခ်ဳပ္)
Bond hi kan ram ahcun a lar tuk lemlo. Bond cu Debenture vek phun khi a si. Company in kan paisa a hmansung cu sumtthang in pe ringring ding. Asinan Company a hnattuan tla a tluangih a mahte a todelhawk theicun Bond kan rak leimi kha in tlenkir sal thluh ding.

Ram hrekkhat ahcun fate an neih veten an nulepa in an fate hminin Bond an lei. Asinan cumi paisa cu kum 18 an kim hlan ahcun, an hman duh hman ah an suah thei lo. Asinan paisa an ttultuk ahcun Bond a leiduhtu hnenah an zuar thei. Zuarsal lo teih an um thei ahcun sumtthang hi compound interest (တိုးရင္းေပါင္္း) ih pek a si ruangah, kum 18 sung ahcun sumpai tampi ah a rak cang mai.

Shares & Companies (10)

Stocks lole Gold, Silver, Hong Seng etc… pawl thawn pehpar awin Investment kan tuah ding tikah a hmaisabik ahcun Bull Market maw Bear Market a si ti kan theih a ttul. Kawlram ahcun Shares le Gold lawng hi an Trade tlangpi.

Investment tuah ding tikah 30% hi Technical Analysis a thupi. ( Yangon Stock Exchange tla hnattuan tluang ten a pehzawm thei a si ahcun himi Technical Analysis pawl a run hmang ve ding. Himi pawl a zoh dan kan thiam a si ahcun, Technical Analysis hmangin Company pakhat ih History pawl kan thei thei dingih, a zuarmi shares pawl leitlak a si le si lo khal kan thei thei ding a si. Technical Analysis zoh dan ka thiammi sun tete pawl neta le nuam teten ka run ngan lai ding)

Cule 30% thotho in Fundamental hi a thupi. Fundamental ti cu News pawl khi a si mai. Stock Market ah investment tuah belbel in hnangam ten tan huahhi mai cu a remcang lo. Ziangmi thuthar ha um? Stock Market ah ziang a cang? Ziang Company ah ziangvek thil pawl a cang tivek pawl hi kan ngaihven ringring a ttul. Thuthang ca siar tam lole rualpi kom tam hi a thupi tukmi thil a si.

Sentiment hi 10% a thupi ve. Duhham tuk lo ding. Cun tirhfah tuk ding khal a si cuang lo. Paisa tam deuh hlep caan le lungawi tuk ih rualpi pawl khal rawl do ciamco, malte sun deuh pangle riahsia thinhar in zaan khal itthat thei lo tivek cu investment tuah ding ahcun a remcang lo. Kan thinlung hi uk thei dingih ka zuam a ttul.

Luck hi 20% tluk in a thupi. Luck cu neta deuh ah ka rak simfiang sal ding.
Cule Others hi 10% thupi ve. Thildang ti cu Phone, wifi, Computer etc… pawl an si mai. Tulai cu phone le internet san a si tikah phone signal um lo sehla, lole internet wifi tivek pawl tthate kan neih lo ahcun pakhat le pakhat kan pehtlai aw theilo kei kan buai nasa ding. Communication tthate in neitertu cu hi pawl hi an si bik mai lo sawm?