Lennak, Hlawhtlinnak le Duhdawtnak

Lennak, Hlawhtlinnak le Duhdawtnak

Nupinu pakhat cu innsung ihsin a suakih lengah putar khabehmul rang nei mi pathum an to kha a hmu. Asinan fiangten a thei hai lo.

Nu bik cun, “Ka lo thei hai lo nan nan ril a rawng ti cu ka thei. Kan inn ah ra uhla rawl tla rung ei hmen uh” a ti.

An nih in “Inn neitupa bik a um maw?” tin an sut. “Ai, umlo. Leng a suak” a ti. “Asi ahcun kan rung lut lo ding” an ti ve.

Zaan lam a kimih a pasal inn a ra thleng. Cutikah thu umdaanpawl cu a pasal hnenah a rak ruah. Cule a pasalin, “inn ka thlen zo thu va sim hai awla rawl ei tla run sawm cih aw” a ti.

Cuveten leng a suakih a va sawm sal hai. Asinan “kan nih cu inn pakhat ah kan lut tlang dah lo” an ti. “Ziangah maw?” tin theihcak zetin a sut sal. An lakih mi pakhatin a simfiang ih, “Hi ka rualpa ih hmin cu Lennak a si,” cule a rualpa pakhat deuh a kut a hi khih ih “a nih ih hmin cu Hlawhtlinnak a si, cule kei ka hmin cu Duhdawtnak a si” a ti. Curuangah na pasal thawn thu vun reltlang sal uhla kan pathum lakah zo ha nan inn ih rung luh ter nan duh bik” tin a sim.

Nunau nu cu innsung a lut salih a pasal hnenah an simter mipawl a vung sim. Asinan an fanu te in a umnak kiangte ihsin a rak ngai khiokhi. Cule cui thu a theih veten a nulepai hnenah a pet vurvo ih “Duhdawtnak hi kan sawm asile a ṭha bik ding ka zum. Cule kan innsang ah duhdawtnak a leng ding” a ti.

An fanu te ih thu cu a nu in a lungkim thu a pasal hnenah a sim. Cule a pasalin “cuti asile va suak awla Duhdawtnak kha kan mikhual dingah va sawm aw” a ti.

Leng a va suakih “Nan pathum lakah Duhdawtnak kho zo bik si? Ra sehla kan rak lo mikhual ding” a ti. Duhdawtnak cu a dingih innsung lut dingin a pawk, cule midang pahnih khalin a thlun cih ve.

Nunau nu cu a mang a bangih Lennak le Hlawhtlinnak, “Nan mai in sim vekin Duhdawtnak lawng si ka sawm, ziahsaw nan zatei nan rat tum?” a ti.

Cule an pathum in, “Lennak lole Hlawhtlinnak pakhat sangsang sawm awla cu a dang pahnih cu kan tang ko ding. Asinan Duhdawtnnak na sawm ruangah…a fehnak kip ah kan feh, kan thlun … ziangahtile Duhdawtnnak a umnak hmun ahcun Lennak le Hlawhtlinnak khal a um.

Hram: Inspired 21 ih Wealth, Success and Love