Khohrik sungih Tidai

Kentucky hmailam ram, tlangpar ah lo tuah ih pumcawm awmi putar pakhat le a tupa te an rak um. Zingtinten a pu cu rawl einak cabuai ah Bible a siar ringring.

A tupa te cu a pu vek si a duh tukih a ti theitawkin zingtin Bible cu a siar ve ringring. Nikhat cu a tupa te in a sut, “Pupu nangmah vekin zingtin Bible siar ringring ka tum asinan ka theithiam thei lo, ka theihmi sawn cu ka siarmi thu khi Bible ka ret veten ka hngilh cih. Bible siarih nomnak le thawtnak hi ziang saw a si?”

A pu cu meiholpawl meipungih a thlak rero lai kha a cawl lawkih daitei a um hnuah, “Himi meihol retnak khohrik thawn tidai va khai hnik, cule ka hnenah rak keng aw” a ti. A tupa te cun a pu ih simdan vek ciah in a atuah. Asinan khohrik cu a hnuailam ong tampi um a si ruangah a pui hnen a thlen hlanah tidai cu a dok thluh. A pu cu a hni ih, malte rang deuh ih na tlan a ṭul a si kha” tin a sim hnuah vei khat va khai sal dingin a fial sal. Tui ṭum cu nasaten a tlan, a theitawk suah in a tlan nan a pui’ hnen a thlen hlanah tidai cu a dok cem thluh man thotho. A thawpi a suah hnuah a pui’ hnenah khohrik thawi tidai khai tivek thil cang thei a si lo a tiih tithawl/tipung sawn a lak.

A pu cun, “tipung thawi tikhai ka lo fial lo pi, khohrik thawi khai a sisi ka lo fial. Nasaten na zuam lo ih si ding” a ti, cuhnu ah leng a suakih a tupa tei tidai khai zoh dingin a feh. Tuiṭum cu a tupa te in hi thil cu a cang thei lo ti a thei nan ziangtluk ka tlancah ih ka zuam khalle a cang thei lo, tidai a cem thluh man ti kha a pu in a mit rorin hmuhseh ti rori a beisei. A tupa te cun khohrik cu tiva ah a hnimpil thluh ih zamrang zetin a lak vukvi ih a cak thei pittawp in a pui’ hnenah a tlanpi, asinan hlan vek thotho in tidai cu a pui’ hnen a thlen man hlanah a cem thluh thotho.

A thawpi a suah sal hnuah, “Pupu, zoh aw, thulolak thil mensi!” a ti.

A pu in, “Cucu thulolak menah maw na ruah? Na khohrik kha zoh hnik” a ti.

A tupa te cun khohrik cu ṭhaten a vun zoh salih hmaisabik a hman lai le tu ih danglamnak a hmu. Hmaisabik a hman laiih meihol retnak khohrik bal emem cu tu ahcun a rak fai thluh. “Ka fa, Bible thianghlim na siar tikah hivek ciah hokhaw a si. Na siarmi thu le hla cu a zaten na cing thluh cawk lo dingih na thei thluh cawk lo ding, hmanseh na siar asile nangmah ah danglamnak a um ding, na sunglam le lenglam tiangin danglamnak a um ding. Himi hi Pathian in kan nunih a hnaṭuandan a si.

Source: Knowledgepublisher