Leitlun Ih Mi Lungawibik

Vei khat ah tlangak in a mah le mah a zoh aw ih a di a riam zet, asinan ni khat cu rampai pakhat a hmu ih hitin a ruat.

“Rampai cu a var mawi tuk ual, kei cu ka dum tuk, himi rampai te cu leitlun ih milungawibik a si tengteng ding” a ti.

Curuangah tlangak cun cui thu cu rampai hnenah a va simih rampai in, “kei tla Kilaw ka hmuh hlan ahcun lei tlunih mawibik le nuambik ah ka rak ruat aw, hmanseh Kilaw cu kei hnakin a mawi tuk si. Curuangah kei cun leitlun ih mi lungawibik cu Kilaw a si ka zum” a rak ti.

Tlangak cu Kilaw hnenah a feh salih cui thu cu a va sim lala.

Asinan Kilaw cun “kei tla U-tawng ka hmuh hlan ahcun ka rak lungawi tuk si, kei cu mawinak malte lawng ka nei, asinan U-tawng cu mawinak phunkim a nei” a rak ti lala.

Cuveten tlangak cu ramsa hmuanah U-tawng hmungah dingin a va feh. U-tawng cu mipi in an rak zoh vialvial, cumi cu tlangakin a va hmuh tikah a tha a nau a riah tla a sia.

“Aw…U-tawng, na va mawi tak-em, na mawinak zoh dingah nitin minung tampi an ra ringring, asinan kei tlangak ve thung cu minungpawlin in dawi ringring. Nang cu lei tlunih mi lungawibik na si rori ding ti ka lo zum” tin tlangak cun riahsia in a sim.

Tlangak ih ṭong cu U-tawngin a theih tikah riahsiatnak mithmai thawn hitin a let...

“Kei tla leitlun ih mawibik, lungawibik, le nuambikah ka rak ruat aw dah. Asinan ka mawinak ruangah hi ramsa hmuanah kharhkhum ka si, asinan thu ṭhatei ka ruah tikah tlangak lawng hi kharhkhum an silo ti ka thei fiang. Ka ruat ringring, kei hi tlangak rak si sehla leitlunih mi lungawibik ka si tuk ding” tin…

Zir ding: Kan nih khal pakhat le khat ṭul hnai loin midang thawn kan tahṭhim aw ih kan riah a si. Kan neihmi nunnak le thilri ih lungawi kan thiamlo bakah miih nun kha kan daw ciamco, midangpawl cu mawi cuang le nuam cuang dingah kan ruat ringring. Taktak ahcun kan rak bangaw thluh. Hivek ruahnak hin nun lungawinak a thlen lo ih bakah miih thinlung a siatsuah sawn ṭheu. Kan neih lomi beisei, midaw ih riahsiat hnak cun kan neihmi te ihsin lungawidan thiamtu kan si a thupi. Leitlunah kan thiamnak le sinakpawl cu a bangaw dah lo ding. Kan neihmi ihsin diriamnak ngah theitupawl sawn hi leitlunih mi lungawibik taktak cu an si. Leitlun ih mi lian bik timi taktak cu thilri le sumpai neitambikpawl an si lo, ṭulsammi nei malbikpawl an si sawn.

Ref: Akhaya