Pathian Thlawsuah Lungawinak

Zaan ka mangah vanram ka rak thleng, vancungmipawlin an kiangkap ih thil-ummi le umdanpawl in simih in hmuh rero. Kan vak vivo ih vancungmipawl tam hleice deuh ih an umnak an hnaṭuannak innsung kan thleng. Kei mah i hruaitu vancungmi pakhat cu a cawlih a hmaisabik vancungmipawl umnakah, “himi cu thilri ngahmi retnak a si, Pathian hnenah thlacamih an dilmi hmuahhmuah hinah a hung thleng thluh” i ti.

Kiangkap ka zoh bet salih vancungmipawl buai luih-lawn, leitlun hmun kip ihsin Pathian hnenih dilnak ca hmuahhmuah an ngan ciamco kha ka hmu. Cutawk lamah kan feh ih a pahnihnak khan kan thlen in vancungmi cun, “Himi cu thilri funnak le kuatnak hmun a si, zangfahnak le thlawsuah an dilmi hmuahhmuah a diltu minungpawl hnenih kuatnak le peknak hmun a si” i ti sal.

An buai nasa tuk ding a si hi an hnaṭuan cu tin ka sim. Ziangahtile hnaṭuantu vancungmipawl khan nasa tukin an ṭuan, thlawsuah diltu an tam tikah leilung ih cupawl vun pek rero a si fawn.

Netabikah a hla bik, innkhan cemnak lam, khan fate ngaingai kan thleng. Ka mangbang zetmi cu cunah cun vancungmi pakhat lawng a rak um, zianghman tuahmi a nei fawn lo. Cule i hruaitu vancungmi cun, “hitawk cu lungawithu umnak a si, ka rual vancungmi khin i rak sim dah, riahsiat hmel a pu lo sawm a nih cu” i ti.

“Ziangah hi nah cun hnaṭuan a um lo thei” tin ka sut.

Vancungmi cun “ka riahsia, minungpawl cu an dilmi thlawsuah an ngah cun lungawithu hun simsaltu cu an mal tuk lawmam” i ti.

“Pathian hnenah ziangtin saw lungawithu kan sim ding?” tin ka sut sal.

“Pathian, ka lungawi” tivial cu a si ko.

“Ziangvek thlawsuah an ngah asile lungawithu an sim ding” tin ka sut.

Nan vur-inn (refrigerator) ah rawl a um, hruh ding hnipuan nan nei, lu retnak lukham nan neih ih ihnak ding hmun nan neih ahcun leitlun minung, zatek 75% hnakih milian nan si. Bank ah paisa nan nei, nan paisabawm ah paisa a um, rawlsuannak bungbel nan neih ahcun leitlun milian 8% lakah nan tel. Nan umnak ah computer nan nei a si ahcun leitlun ih caan ṭha nei bik 1% lakih um nan si.

Natnak umlo ih zing nan tho a si ahcun tui ni ih thizopawl hnakih let tampin thlawsuah nan co. Ralram ih ṭihphannak na tong dah lo, harsat hremnak, le vansannak na nei li asi ahcun leitlun minung million 700 hnakin na cuangce, na van a ṭha. Harsatnak, kaihkhihnak, tiduhdahnak asilole thihṭihnak umlo tei thlacam na tel thei a si ahcun leitlun minung billion 3 hnakin Pathian thlawsuah na co hleice. Na nulepa an dam lai ih an neiaw lai a si ahcun nangmah vek cu an vang nasa, na lu na tungih na hni thei a si ahcun nang cu mihleice na siih ruahsannak neilo minung siarcawklo lakah na danglam.

Aw, asile tu-ah ziangtin? Ziangtin ka thawk ding?

Himi ca na siar thei lai ahcun nang cu thlawsuah phunhnih co tu na si, midangin thlawsuah maksak a dawng tiah an lo ruat, nang cu leitlun minung, hi ca a siar thluh theilotu 2 billion lenglo hnakin thlawsuah cohleicemi na si. Na thlawsuahpawl siar aw.

Source:Knowledgepublisher