Mithattu Ṭihnungum: Beidawnnak

Mithattu Ṭihnungum: Beidawnnak

Salai Lal Ram Lian

Mifimpawl in “Leitlun ih ral tumbik le tihnungbik cu beidawnnak hi a si” an ti. Ziangtlukih milian, mihminthang le mifim khal si sehla thinlung hnangamnak, diremnak le lungawinak a neih lo ih a beidawn ahcun nunman nei lo a si. Midang in kan tumtah mi, kan zuamnak pawl in hnaihnawk thei, asinan mah le mah siatsuahawknak tiang thlentu le mah le mah thahawknak tiang thlentu cu beidawnnak hi a si.

Leitlun ih mihminthang zetzet, milian zetzet pawl khal mahte-thataw theih ding tampi an um. Tt. Zaithiam Kurt Cobain (27), lemcang hminthang Marilyn Monroe, tvk. Leitlun ah mahte-thahawknak (suicide) hi minung thih tamnakbik lakah a tel ve. Ram `hangso USA, Europe, Japan, Korea, Singapore, tvk., ah mahte-thahawknak hi a karhin a tam zet.

Leitlun ah thinlung lam buainak neitu hi a malbik minung 4 ah 1 an um ti a si ih `hen 3 ih `hen 2 cu tuamhlawm loin an um bet. (Singapore ah minung 6 ah 1 in thinlung lam buainak an nei). Leitlun ah kum tinte’n thinlung buainak neitu 800,000 cu mahte an thataw ti a si fawn.

Oct 10, 2010 “Leitlun Thinlung Harhdamnak Ni” (World Mental Health Day) ah Leitlun Harhdamnak Pawlkawmpi (WHO) ih sim vek asile leitlun ah thinlung lam buainak (mental disorder) nei hi mil. 450 lenglo an um. Himi lakih a hrek tluk cu kum 14 an kim hlanah an nei thawk. Leitlun ah kum tinte’n minung ting 8 (800,000) cu mahte an thataw (suicide). Himi mahte thataw lakih a hrek hnakih tam cu kum 15-44 karlak an si. Thinlung buainak hi mahte-thahawknak cangtertubik pakhat a si. Singapore khalah ni tin deuhthaw mahte-thataw an um ringring ti a si. A hleicein Japan, Korea le Singapore ih mahte-thahawknak thuhla vun thlir hnik sehla.

Japan le Mahte-thahawknak:

Japan ram hi ram `hangso lak hmanah mahte-thataw tambiknak ram pakhat a si. Zemrualin kum tin minung 30,000 mahte an thataw ih kum tinte an karh vivo an ti fawn. 2009 kum hrek tiang hmanah 17,076 an um ih 2008 kum hrek hnakin 768 an karh, cumi lakah zatek 71% cu mipa an si. Leitlun pursumleilawn tlaksiatnak ruangah an karh sinsin zum a si ih mahte-thataw tambik kum an rak ti mi 2003 kum ih 34,427 hnakin 2009 ah an tamsawn ding ti’n an zum. Thatawtu lakah upa, mino, nauhak khal an tel. Kum 50-69 karlak thataw hi zatek 40% an si.

Palikpawl in 2008 ih Japan ram thataw lakah a hrek cu beidawnnak ruangah a si an ti. Beidawnnak hi sumpai tlaksiatnak, hlawhsamnak le innsang buainak ruangah a si deuh tlangpi tiin mithiampawl in an sim fawn. Mahte-thahawknak mal dingin Japan cozah khalin nasa takin a zuamin mipi a fawrh rero.

Japan ih awnmawimi mihminthang zet Kazuhiko Kato (kum 62) cu amahte a awk thahawk tikah mipi thinlung a hngawr zet, an mang a bang `heh. Kum 39 mi pakhat khal kum hrek lai hna`uan nei loih um, hna`uan dilnak interview ih vawi 50 lai a feh hnu khalih a hlawhsam tikah beidawngin sii a ei ciamco ih a thataw ve. Nauhak kum 11 mi thatawtu pakhat cu tlawng ih an zirhtu in mualpho zetih a kawk, a vuak ruangah ningzak tuar loin a thataw. Parliament sungtel hlun Hisayasu Nagata khal Jan 2009 ah inn sawng 10nk ihsin a dawp that. 2006 ah Lower House sungtel ihsin duaisuah a rak si. A dinhmun ngah sal dingin a zuam rero nan a hlawhsam. Parliament tohkham a hloh cu a hrangah ningzahnak rapthlak tak a rak si hmang. Cangan thiam hminthangbik pakhat a si mi Osamu Dazai khal 1948, kum 38 a si ah a ngaizawng thawn tidai sungah an rak dawp that. A cabu hminthang zet pakhat, a thahawk hlan thla 1 duhih a ngan `heh ta mi cu “No Longer Human” ti mi cabu a si.

Korea le Mahte-thahawknak

Korea (Thlang) ram khalah mahte-thahawknak hi an buaipi zet. Mihminthang le milian lak tiangih an um hnuaihni tikah a hngawr na cuang. President hlun Roh Moo Hyun (eithupnak a nei tiih rinhlelh a si hnuah mahte a thatawtu) kha tu tiang mipi thinlung ah a cam lai. Nunau zuknung cangtu hminthang zet 2 – Lee Eun Joo le U Nee (Lee Hye Ryeon ti khalih theih mi) khal 2005 le Jan 2007 ah mahte an rak thataw zo. Korea ram ah tui hlan kum 10 hnakin mahte-thataw hi a letin an pung ti a si. 2008 ah mahte-thataw 12,858 an um. Tui hlan kum 4 sungih Korea ralkap thi lakah zatek 60% cu (ral lakih thi le midang thah tuar si loin) mahte-thataw an si. Mahte-thataw lakah sumpai tlaksiatnak, nupa thenawknak le leiba neih tam ruang, tvk., hi a tambik. Korea cozah in mahte-thataw dem dingin TV ihsin thehlarnak le zirhnak nasa takin a pe.

Singapore le Mahte-thahawknak

Singapore ah kum tin zemrualin minung 340 cu mahte an thataw. Ṭhen 10 ah `hen 7 cu thinlung lam buainak ruangah a si. Mahte-thataw hi lamzin eksiden ruangih thi hnakin an tamsawn ti a si.

Tlangval kum 18 mi Tiew Zhi Xiang cu March 1, 2009 zan`im ah Online bawhlungsit paisa thapnak ruangih leiba a neih ruangah beidawngin innsawng 13nk ihsin a dawp that. Bawhlungsit ih paisa a thapnak hi 2008 kum lai hrawng ihsin a thawk. A sung ih leiba a neih lohli tikah a nu in a leiba S$1000 (K. 700,000) cu a kuansak ih thapnak tuah nawn lo dingin a nu a kam. Asinan Jan 2009 ah a pa in a ihkhun ah bawhlung thapnak ca a hmu ih, nawmnak ih a tuah men mi a si thu le a tuah nawn lo ding thu, a pa cu a sim. Asinan, thla 3 hman a rei hlanah a lamzin kel cu a zawh sal thotho. Cuti’n a thlah thei lo le a leiba nei beidawngin a thahawknak a si. A fapa a thih tikah a pa Tiew Kim Choon cun, “Zianghman tuah thei mi kan nei nawn lo. A si vekih kan cohlan a `ul ko. Kan mang cu a bang zet. Ralrin peknak le zianghman a um cia fawn lo,” tiin riahse zetin a sim.

Singapore ah a hleicein paisa thapawknak hi an buaipi zet. Singapore ah hiti’n capoh thufim a um an ti. “Paisa thap hmang cu Tuluk miphun a si tengteng ding, Cun nupi thawi hmang cu Kala (Indian) miphun, mai’ fanu rori sualpitu cu Malay miphun a si ding” tiin. Tulukpawl paisa thapawknak ah an lar ih Kalapawl nupi thawi hmangah, Malay-pawl mai’ fanu sualpi hmangah an lar deuh a si hmang.

Tlangkawmnak

Leitlun ih minung nunnak siatsuahtu le mi thattu tampi lakah a rapthlakbik le `ihnungbik pakhat a si ve mi cu mahte-thahawknak hi a si. Milian taktak, mihminthang zetzet, milar maktara, mifim rura, tvk khal an tel. Himi mahte-thahawknak suaktertu hrambik cu thinlung BEIDAWNNAK hi a si. Curuangah BEIDAWNNAK hi mi thattu `ihnungum zet, minung ral tumbik lakih pakhat a si ve ti theih a si.

Rawn:  (1) The Straits Times: Jun 6, Oct 4, Nov 28, 2009 & Oct 6, 2010.

(2) Internet

Hsn: LCF Mekazin (Malaysia), 2010 ih suah zo mi a si.