TEV Hnakih KJV Ţhatsawnnak 5

TEV Hnakih KJV Thatsawnnak 5

Jedidya Lal Lian Zual

Bible thuhla ah hin elawknak a phunphun a suak theu. Bible text leversion thuhla cipciar takih zingzawi ding cun subject tum takih  hman a tul ding ih cahmai 300 tlun lam daih a si ding. Asinan tui tumah cun
canngantui tithei tawk le dinghmun, siartui tuldan ih zirin cahmai pahinh khatih pawhtawi kan tum ding.

Hi thu ngan tikah mi pakhatkhat simaw, pawlkawm pakhatkhat simaw, kawhhran pakahtkhat simaw eltainak, simsiatnak le hlawnthlak duhnak lam si loin( cuvekzawng khalin zohman ruat lo sehla) Pathian thu conservative takih tannak lamah ngai sawn sehla. Cumi cu cangantui thinlung khal a si. Laimi, a hleicein Falammi cu malte kan si ruangah thu lakdan thiam loin kan hak sual pang theu. Curuangah hruaitu zahum deuh tla cu Book Review hman tuah ngam a si lo. An kawhhran le an uifim pawlin in keuthat pang ding ti tluk a si. Mirang le ramdang cu hun tanta sehla kan hmuanthlang Mizoram hmanah Presbyterian kawhhran veve khal thu cuhaw-in an elaw tuito theu. Cucu a thangso le fim pawlih mizia a si.


Cutivek thinlung kau le tluangtlam kan put thiam ding tikcu hngakphahin fimkhurten kekar phahin Pathin Thu ih Conservative Evangelical dinhmun in hihi ka rawn thawh ve a si. Pathian thu cu a nung ih huham ih khat a si. Sersiamtu a si ih nun petu khal a si. Curuangah cabu dang vek men ih tham ding a si lo. Thu thianghlim le zahum a si. Cuih thu cu King James Version hin a kilhim in a dinpi bikin a lang. Cuti ka ti theinak 5 te hun tarlang sehla....

  1. Text Thasawn (Superior Text) Kut ngan cabu hi tampi a um ih Greek le Latin lephei cun a thawng tel a um ngai. Asinan Textus Receptus (TR) hi rin tlakbikah Bible zumtupawl cun an pawm. Jerome in Latin vulgate a leh ihsin kawhhran san a pehpeh –Martin Luther in German tawngih a leh tiangin Receipt Text (Hlansawngawk mi casual) rori hi hman a si. Cu cu Wycliff  le William Tyndale pawl khalin an rawn hmang vivo ih Geneva Bible, KJV, NKJV tiang hman vivo a si. Judson ih Kawl ih a leh tik khalah hi thotho hi hman a si. Asinan Today English Version cu West Cott le Hort ih ngansawn mi text hman a si. Hi text hi United Bible Society in a pawm ruangah UBS text ti khalih kawh a si ih Evangelical pawl cun critical text an ti theu. Critical text ( Sawisel Ca) an tinak san cu a tlun ih ngansawngtu mi pahnih khi Liberal tuk thilmak tampi zumlotu le falahim hrin(virgin birth) tiang zumlotu an si ruangah a si. Tahthimnak pakhatte hun la sehla Isaiah 7:14 ih falahim a rai ding ti khal khai nuno note timi hman a si. I Kor 15:31 ih “I die daily” nitin ka thi ti ding hman khi “Nitinte thihnak ka tawng zikte theu” tiin an kawpi sawng a si. TR ah cun an tisual hinh khat cu a um ve ko ding nan uluk takih kawpi a si ruangah a let tampiin a thasawn hrimhrim.

  2. Theology Thasawn (Superior Theology) KJV theology ih athatsawnnak hi rel hman tul loin a lang cia. TEV hmun tampi ah thisen timi um loin hlawn a si. Cun hrekkhatah  thisen ti aiah thihnak tiih leh a si. Theology na zir cun THISEN le THIHNSK ih danglamnak cu na thei mai ding. Cun TEV ah cun remawksalnak (reconsilation) ti tawngkam khal hman a si lo. Cun thiamcoternak (justification) ti mi theology thupi tuk khal hman a si lo. TEV thasawn vekih reltupawl hin Theology zirnakah an hmang dah lo ti a siang. TEV ah cun Mirinum ti khal a um lo hokhaw. Rinsan tlak tiih hman a si. Mi rinum le rinsan tlak lawng hman Bible tlawngta hrangah cun zir tham a si. Hivek hi hmun thawngkhat leng lo khih ding a um.

  3. Lehdan Thasawn( Superior Transilation Technology) Bible lehdan hi phun tampi a um.  A. Literal transilation= a tican vek ciah ih a sinak ciah leh. B. Dynamic Equivalent =A duhsan zulh ih leh. Hi hi thazet vekin a lang nan Bible lehnak hrang a tihnung tuk. C. Paraphrase = Simfiang phun ih leh. Hi hi Bible lehlindan ih dinhmun niambik a si.

           KJV lettupawl cun A nak khi an hmang ih TEV lettupawl cun B le C kawm an      hmang. KJV lettupawl cun cafang kip, grammar kip le a tican kip ah a san peng lo dingin an let nan TEV lettupawl cun an nuainam men theu. Thimnakah Tirhthlah     2 thu ih Miricle, sign and wonder ti mi hman khi hminsinnak le mangbangza an ti men. Thilmak, hminsinnak le mangbangza ti sehla akim ding nan. Cun Jesu             kawhnakih an hman Lord, Master, Sir, Teacher tipawl khal khi Bawipa le Sayapa           ti in cawkpawlh thluh a si. Leviticus lamih thil rawng phun 7 tivek khal phun li        lawngih leh a si.  An rak tuanbangnak cu zahum zet khal sehla Pathian Thu hi an    dekcawk deuh maw ti ding a sinak lai tampi a um.

  4. Lettu Thasawn( Superior Translator) Bible Version le text thu rel tikah Bible lettupawl nun hi zoh tel lo theih a si lo. TEV (UBS) text kawpi sawngtu West Cott and Hort tei nun zingzawi tikah Anglicak pastor, piangthar lo, liberal emem, Pathian thilti mak khal zum mumal lo an si. Asinan KJV lettupawl kan zoh tik( KJV cu William Tyndale leipawlih lehcia rem kan ti zo kha) Wycliff= thih ngam, William Tyndale= Bible leh ruangih Martar, Geneva ih kawhhran tuahthatupawl= Pathian thu ruangaih tiduhdah le hrem tuar raltlan an si. Cun KJV buaipitu mi 50 hrawng nunnak zoh tikah Puritan san tiangih Pathian hrangih serhhrangaw, nun thianghlim uar, rinnak ih kekartu le Bible Pathian thu buaipi le thih ngam an si. Curuangah a lettupawl ih nun hi a tanaw tuk lawlaw.

  5. Thuanthu Thasawn (Superior History) KJV le TEV cu an thuanthucio zoh tik khalah an tanaw tuk. KJV hmangtupawl hi Pathianmi deuh hlir an si ih TEV hmangtu leitlun huap mi hminthang thuahthu ah a lang an um lo. TR ihsin KJV ah a hmangtupawl cu Jerome, Augustine, Martin Luther, Calvin, George Whitefield, John Wesley, Baptist thusim hminthang Supergion, DL Moody, Jonathan Edward le mi tampi. Tu lai sanah Rev. Rick Warren in “Keimah cun KJV ka siar theu nan mipi hmaiah cun NIV khal ka siar. A san cu mino pawl hrangah theih a awl.” A rak ti dah. John McArthur, Ryrie, Paul Enns, Bob Jones, Warren Wersbe, Billy Graham le mi tampi.

Curuangah KJV lawng Pathian thu lole thawtkhum kan ti lo nan Version dang thawn cun khaikhin ci a si lo. Peter Ruckman vekin KJV hi advanced revelation(Original manuscript ih um lo KJV ah a kim ti zumnak) ti khalin kan pawm lo nan a cungnung sawn ti cu el rual a si lo.  Pathian thu hi palbet in zozo simaw kan cawisan pang cun Setan a lungawi tuk ding. Ziangah Bible ttha neih cu kan dodal ciamco ding?


------------------------------------