Chin Miphun Israel Miphun A Si Thei Maw

Chin miphun Israel miphun a si thei maw?

 Paul Bill

     Falam ZTC ah 18.11.2011 ni ah special talk neihnakih an thupibikmi cu Chin miphun hi Israel hnamhlo Manaseh ihhrin kan si thei le thei lo thu Dr. Law Ha Ling ih hoha nakin rel khawmnak an neih thu le kan si thei ti ih rel tluknak thu an neihmi parah kei khal ka theihmi le ka hmuhmi run lo hlawm ve sehla ti thu ka run hrolh aw ve duh asi. Thu dikmi deuh cu a siartu nan zate in nan ruat ve ko pei ih nan ruahnak parah nan thum aw cio pei tiah ka fawrhfial aw duh. Kei cun Chin miphun hi ahlomi miphun kan si dah lo, Ziangtik khalah Chin miphun a hlo dah lo. Tui ni tiangin Chin a si nak ihsin a tluangzetmi miphun kan si tyiah ka tangih ka tannak a san pawl tla cu hitin ansi.

Kan dunglam kum reipi ihsin kan U nau Mizo pawl hrekkhatin kan nih Chin miphun khalhi Israel miphun Manaseh cithlah a hlomi hnam pakhat kan si anti ih Israel miphun kan si antinak thu a phunphun simin Israel ram vaihding anrak tum nasa ih Israel miphun thawi bang awknak nunphung tiangin simfiangnak anrak neihtikah Israel miphun pawlin anrak pawmpi ih Israel ramah arak vaitu kan Unau Mizxo pawl tla anrak um tithu cu kan thei cio ding tiah ka zum.

     Cutiih Israel miphun pawlih Chin miphun tla kan cipi kan Unau ansi tiih apawmthei ngaingai ahcun thiltha pakhat asi. Israel ramih vaih tlacu a sualnak a um lo. Anram kan va thlenih arammi sitheinak le anmah thawi bangrepih ziang hmuahhmuah co theinak le neih theinak covo le canvo pawl tla bangrepih kan ngah thei ding ahcun atha ngaingaimi van neih thlakih ruat ding asi.

      Israel miphunin Chin miphun cu Unau suakkhat thisen khat roriih anruatih anpawm a sile harsatnak aphunphunah bawm aw ding kan si. A sinaan Israel ramih ava vaitu kan Unau Chin miphun ( Mizo )pawl ziangtlukin an harsa ticu nan thei cio ding. Tlunkir theih sisehla ratlunkir thluh an duh ticu theih cio asi.

       Leilungtlun minung hmuahhmuah hi Pathian ih sersiammi A dam le Eve ih cithlahnak ihsin arapungzaimi kan si. Pathian in Leilung tlun minung Tiliknakih asiatsuah thluh hnuah Leitlunah Noah tei innsungsang lawng annung damih Noah fapa Shem, Ham le Japhet tla ih cithlahmi ihsin Leitlunah minung apungzai salmi kan si( Genesis.7:22-24, 9:1,18). Cuih cithlah awkdaan tlacu kan Baibal cathianghlim in fiangzetin insim asi. Cumi pawl tlacu ahnuailam vekin asi.

1.      Shem ih cithlahmi pawl:

Shem ih fapa pawl.         : Elam, Asshur, Arpakshad, Lud, Ram, tla ansi ( Gen.10:21 ).

Shem ih cithlahmi hrinhnam pawl :   Shem, Elam, Asshur, Arpakshad, Shelah, Eber, Peleg, Jok Tan, Almodad, Sheleph, Hazarmaveth, Jerah, Hadoram, U zal, Diklah, Obal, Abimael, Sheba, Ophir, Havilah, Jobab, Lud, Aram, Uz, Hul, Gether, Meshech. pawl tla ansi(Gen.10:22-29; 11:10-32; 1Chroni.1:17-27 ).

                    

Shem ih cithlah phunhnam pawl hi Mesopotamia ramih arak um hmaisabiktu ansi. Shem ih fapa palinak cu Arpakshad a siih afapa cu Shelah asi. Shelah fapa Eber, Eber fapa Peleg, Peleg fapa Reu, Reu fapa Serug, Serug fapa Nahor, Nahor fapa Terah, Terah fapa Abraham, Haran le Nahor ansi( Gen.11:10-32 ).

      Abraham in fapa Isaac a nei. Isaac in fapaphir Esau le Jacob a nei. Jacob cu Mesopotamia ram Haran khua ih um Nahor ih fapa Laban hnenah aum. Jacob in Laban ih fanu Le ah le Rachel nupiah a nei. Jacob cu apu Laban hnen ihsin a tlaansuakih lamzin ah ariak. Ariahnak ah zanah mi pakhatin abuanih anehthei lo. Cutikah Jacob cu abuantuin ahminah Israel tiah athlengsak asi. Cuihsi thawkin Israel miphun anra suahnak asi. Cun Israel miphun pawl cu Abraham san ihsin vunzimtan miphun ansi. Voksa eilo miphun ansi.Jewish biaknak abetu ansi. Christian cu 0.4% lawng ansi. Cuti a siruangah kan nih vunzim tanlo le voksa aduhzetmi le Pathian nung Zisuh Khrih abetu Chin miphun hi Israel miphun tiah kan ti aw thei pei maw? Israel miphun pawl hi Shem ih cithlahmi ansi. Mirang pawl hi Japhet ih cithlahmi ansi. Chin miphun hi Ham ih cithlah miphun kan si.

        Ham ih fapa pawl:     Cush, Mizraim ( Egypt ), Lybia ( Put ), Canaan tla ansi (Gen.10:6 ).

        Ham ih cithlahmi phunhnam pawl :   Ham, Cush, Nizraim( Egypt ), Lybia( Put ), Canaan, Seba, Havilah, Sabtah, Raamah, Sheba, Dedan, Sabtecah, Nimrod, Ludite, Anamite, Lehabite, Naphtuhite, Pathrusites, Caslubites, Philistines, Caphtorites, Sidonites, Hittites, Sinites, Jebusites, Amorites, Girgashites, Hivites, Arkites, Arvadites, Zemarites, Hamathites pawl tla ansi (Gen.10:6-20 ; 1 Chroni.1:8-13 ).

Ham ih cithlahmi pawl hi ahmaisa bikah Egypt ram, India ram, Africa ram le Mongolia ram ah anrak um hmaisa bik asi. Ham ih cithlah asangsang in kan vun zohhnik pei. Ham ih fapa nautabik Canaan. Canaan fapa Sin, Hitti, Sidon, Heth, Jebus, Amor, Philistine, Girgash, Hivites, Arka, Arvad, Zemar, Hamath tla ansi.

Sin ih fapa Mongolia, Hopei, Shantung, Jehol, Shensi, Kansu, Wu wei, Lanchaw, Changwu tla ansi.

Mongolia fapa Leo, Lungshan, Cin, Yao, Tai, Yueh, Korea, Japan, Veitnam, Indians tla ansi.

      Mongolia fapa apathumnak Cin ih cithlahmi pawl, Mongolia fapa apathumnak Cin. Cin fapa Cinlung. Cinlung fapa Chin ( Chin shihuangti- Emperor ),Chin fapa Ting Chin. Ting Chin fapa Chindung. Chindung fapa Thet, Asho, Kukki, Naga, Metei, Bawm, Chakma pawl tla ansi.

Thet fapa Maolek, Maonyin, Yazogyo tla ansi.

Maolek fapa Mangsur. Mangsur fapa Zingthlo, Luahpui, Lersia, Ngaite tla ansi.

        Hitivek a siruangah Chin miphun hi Israel miphun kan sithei hrimhrim lo. Inthlahtu Noah ih fapa ihsin kan dang aw zo asi. Chin hi Israel miphun Manaseh cithlah kan si atitu pawl cithlah daan adawtdawtin inrun simthei hram dingah ka lo dil. Chin timi hmin kan kennak hi B.C.1050 ihsin athawekih tuikum 2011 ah kum 3062 ati zo asi.Kan nih Chin miphun hi Pathian nung abetu kan sivekin Bawi Zisuh in mithianghlim alawrtikah atelthluh dingmi kan si. Israel miphun cu harsatnak kum 7 sungah an lutlai dingmi a siruangahy kan nih Chin miphun hi kan tel lo ding. Israel miphun pawl bangih Zisuh Khrih azum lotu kan si lo. Zumnak khalin kan dang aw verver. Israel miphun Manaseh cvithlah ahlomi kan si hrimhrim lo. Zirtirnak sualah lutpanghlah aw. Israel miphun sina duh kuahko khal le na si thei hrimhrim lo. Chin miphun nasi. Rev. Dr. Hre Kio in Chin miphun kan si ko, Vancungram kan thlen tikkhalah Chin miphun kan si thotho ding tiah araksim dah asi.

Caburawnmipawl:

-          Bible Genesis 1:1-27, 7:1-24, 10:1-32, 11: 1:32, 29:1-30).

-          Sansiarnak pakhatnak.1:1-27, Luke.3:34-36).

-          Guide to Bible Data by Andrew E Hill.

-          Bible Geography by Rick Griffith.

-          Encyclopaedia Britanica by G.Donald Hudson.

-          Independent Sovereign Countries.

-          History of Greatwall.

-          China the Search for Social justice and Democracy.

-          Myanmah Socialist Party National Culture and Custom of Chin.

-          Laimi suahkehnak ca bu.

-          Hauhulhthlah Simhrin le Lai thuanthu.

-          Unau hmelpalh.

-          Chin miphun thuanthu.

-          Chin nunphung khawsakdaan thuanthu.

-          Zofate chanchin by Hualngo Litareture and Culture Association.

-          Thuanthu roling.