Mi Hlawhtlingpawlih Hlawhsamnak

Mi Hlawhtlingpawlih Hlawhsamnak

Vawi tampi na nunnakah hlawhtlinnak tawng dingah tlaksiatnak le hlawhsamnak phunzakip na tawng ko ding. Ziangtikcan khalah tlaksiatnak ruangih na tluk tikah tho in feh sal ṭento aw.

Hlawhsamnak In Hlawhtlinnakah

MICHAEL JORDAN

Ka pumcawm ei-inn hawlnak ah vawi 9,000 hnakih tam tlaksiatnak ka tawng. Lehzuamnak (Games) ah vawi 300 zikte ka sung. Duhsaknak le rinsannak thawn nehnak co dingah caan ṭha ka ngah nan ka sung ṭheh. Ka tlasia, ka sung, ka sung betih ka sung sal lala. Curuangah Nehnak ka co - (Leitlun Basket Ball Lek thiam bik)

THOMAS EDISON

Vawi 10,000 tiang rori eletric meitleu ngahnak ding a rak zuam ve nan a rak hlawhsam – (Meitleu, light bulb tuahtu)

ABRAHAM LINCOLN

A kum 9 ah a nu in a thihsan, sumdawnnak ah nasaten a tla-se bet, a kum 26 ah a duhdawtmi a fala in a thih sanih thinlung kekkuai vansang mangbangih um, a nun lamtluan ah kum 5 hnakih tam tlawngkai/fimthiamnak zir can nei lo. A ṭhanglian, ramkhelthu a buaipi ve asinan nasaten vawi 12 rori a hlawhsam – (16th United States President)

FRANKLIN D. ROOSEVELT

A kum 39 ah polio nat ruangah a rak zeng - (United States President ah ṭum thum rori hril a si)

LUIZ INACIO DA SILVA

Miih kedam khawlhsak ding hman a hmuh lo cun rawl ei ding hman rak nei lo –– ( a vawi 35 nak Brazil President)

ZAKIR HUSSAIN

Kum 10 a kimah a pa a thi, kum 14 a kim ah a nu in a thih san lala – (a vawi 3 nak India President)

LIONEL MESSI

Bawhlung lehnak Training kai theinak dingah miih ṭuan paihlo lakphak dawrih hna rak ṭuan ṭheu – (Leitlun bawhlungsit thiam bik)

SHAH RUKH KHAN

Zuknung cang thiam si theinak ding hrang Rs. 20 hman rak nei dah lo, rualpi hnenih cawi ringring – (India lemcang thiam bik)

 ALBERT EINSTEIN

A nauhak te lai ihsin a nulepa in thinlung lam buainak neimi a si ding ti’n an ruat. Ca a thiam lo tuk lawmam ih a mah zirhtu a saya cun daitei um dingin a dil, hitin a sim, “Einstein, zianghman na si dah lo ding!” Swiss Polytechnic Institute ih luhnak ding camibuai (exam) a rung sung taktak – (Leitlun Scientist Hminthang bik)

MARILYN MONROE

Marilyn cu amah ah mipi hip theinak a um lo an ti ruangah 1947, 20^th Century-Fox (Hollywood film) ah a rak tel thei lo - (Leitlunih mimawi a timi lakih tui ni tiang hmin rel reh thei lo, US President John F. Kennedy tei unau hmanih rak ngiar reromi leitlun mimawi.)

LUDWIG VAN BEETHOVEN

Beethoven cu a music zirnak saya cun hitin a sim, “hlaphuah ding ahcun a nih cu ruahsan ding a um lo” – (Can a rei hnuah Beethoven cu hlaphuah thiam maktara, hminthang bikah a rung cang. A hla phuahmi ṭha bikpawl tla cu zianghman thei lo a hnaset lai canih a nganmipawl an si).

MAHATMA GANDHI

Ziangmi zohṭhimtlak ṭha deuh a um thei ding? Tlawngta zaran, Mahatma Gandhi cu kanan (matriculation exam) cu harsa zetin a awng. Dan (law) a zir ṭheh hnuah Bombay ah a taktakih va hmangsuak dingah a ti thei lo ruangah high school ah a langin zirhtu a ṭuan.

ELVIS PRESLEY

Elvis Presley cu 1954 Grand Ole Opry ih hla a sak ṭheh hnuah, a hnaṭuan, mawṭaw thawi thilphurh cu fek deuh ih ṭuan dingah United States ih kum rei bik radio program ihsin an than.

RABINDRANATH TAGORE

Rabindranath Tagore cu amah te inn ih ca a zohnak ruangih cathiam a si. A kum 17 ah England ah tlawngkai dingin kuat asinan zirsuak lo le ṭhehsuak lo in a um.

BILL GATES

Bill Gates, Microsoft dintu le hotu, Harvard university a kai suak lo. Zumbanlo asimi cu software company (Microsoft ra cang cih dingmi) cu mi pakhat hnen ihsin software technology cu US $ 50 thawi leinak in a thawk.

STEVEN SPIELBERG

Steven Spielberg cu lailak tlawng a cawlh san. Mibanglo zirnak ih kir sal duhnakin a thinlung a neh ruangah thla hnihkhat te lawng tlawng a kai ih cutin tlawng a kai nawn lo lanta.

SOICHIRO HONDA

Soichiro Honda cu Leitlun Ralpi II hnu engineer hnaṭuan hrang hmaitawn thusuhnak (interview) tuah lai ah Toyota Motor Corporation thawn a kir. Cutin nauhak leng tuahtu a innhnen pa ih inn a zuar hlan sung cu hnaṭuan neilo in a um. Caan a rei deuh hnuah a Honda company cu a thawk. Leitlun motorcycle tuahnak ropibik ah a cang.

AMITABH BACHAN

Amitabh Bachchan cu nasatei film ih a luh hlanah India Radio zate thawi hnaṭuannak ih thuthantu (announcer) ngah dingin a zuam ve nan a aw in a tlin lo ti’n hnawl a rak si.

HARLAND DAVID COLONEL SENDER

A kum 5 ah a pa a thi. A kum 12 ah a nu in pasal dang a neih san. A kum 14 ah a pa-ei ih hmuhsuam le ti duhdahnak tuar thei nawn lawn a tlan suak. A kum 18 ah nupi a nei ve nan an nu cun a neih sunpawl a zuar sak ṭheh hnuah a tlan. A kum 20 ah Company ah hna a ṭuan ve nan a Boss pa thawn an to-aw ih hnaṭuan nei lawn a um. A kum 30 ah Sihni ṭuan a zirih hnaṭuan ra petu thawn thukam elawknak ruangah rei ṭuan man lawn a hna a suah san lala. A kum 31 ah Motor-car puaisa a ṭuan ve nan accident in thikzikte ih a khawnawk ruangah zianghman tuah thei lawn a um. A kum 40 ah nupi a nei sal nan fa 3 an neih hnuah an ṭhen aw sal lala. A kum 47 ah bawi hnenih hnaṭuan ding a dil ve nan a ngah lo. A kum 61 ah Fast Food rawldawr te a awng nan cozah thawn remawklonak a um ruangah phih sak a si.  A kum 66 ah Fast Food rawl dawrte cu a awng sal nan a kum 75 ah Stem thu ruangah hek a tawng lala.

A kum 83 – 88 ah cun KFC (Kentucky Fried Chicken) dawr a awngih (9.19.1890 -16.12.1980) ahcun KFC cu leitlun pumpi ih theih dawr hminthang le lar, leitlun ramtin khawpi dawr tumpipi sungah cun KFC umlonak um lo deuh thaw tiangin leitlunah hlawhtling le lar ah a rung cang.

Zir Dingmi: Hlawhtling dingah nang vawi ziat tlaksiatnak na tawng zo? Vawihnih khat tlaksiatnak ruangih vanse cuangih thei aw le dungsiptu cu ziangtluk man neilo saw a si? Hlawhtlinnak lamzin zawh suak ve dingah: tho aw, na bantha vun la ve sal aw. Na ring vun tung ṭenṭo aw, na kaiza thapawl vun khoh ter salin na taikhap vun khap aw. Na ral-phaw, li le thal la in ral hmaitawttu pacang ṭha vekin hnget zet le khoh zetin dingaw. Cutin hlawhtlinnak lamzin cu fehsuak hramaw!

Source: Calai Zun