America cozah pi ih kaih a tum rero nan a kaih
theilomi leitlun Hacker hminthang pali lakah Kim Dotcom khal hi pakhat a si ve.
Kim cu leitlun Hacker thiambik le hminthangbikpawl kutzung khiah theih lakih
pakhat a si. Leitlun Social Network ah mipi in Kim an duh hleicenak pakhat cu a
Hackker fimthiamnak ruangah siloin a rinsanawk tuk le a uar-awk tuk ṭheumi hi a
si.
Hipa ih thuhla malten vun zoh bet sehla, a inn pi
sungah Kalauk zuklempawl hman tlemkhawpih kau zet an siih Mawṭaw cu amah Kim ih
duhmi pohpoh a si ko. Asinan mawṭaw a lei ding tikah pakhat tete siloin a bur,
a tawm pipin a lei ṭheu. mawṭaw ṭha le mankhung tawrleseng ih a neih men lawng
siloin a mawṭaw number pawl cu, ṭhimnakah: Kim.com tin a tuah. A mawṭaw dum
pakhat ih numbat tla cu Hacker tin a tuah. Pakhat cu Good and Bad ti si. Pakhat
cu God tin a ret ih pakhat cu Evil tivekin a mawṭaw numbat a ret celcel.
A nun a nuam thei zetih fala mawite pakhat cu nupi
ah a nei ih falerual tampi a nei men. Hitluk nunnuammi Kim ih nunlamtluanah
tlaksiatnak nasa tak le Hell-ram vek a ra thleng. A neihmi zaten a sungral
thluh. Hipawl hi Hillary ruangah a si tin a sim.
Hillary ih USA President a zuam laiah a Email
thawng-sawmthum lai a hloh ter hrimmi cu Kim in a phawrhsuak thluh ih a Twitter
ah a tar. Himi hi Hillary ih sunnak hrampi a si ti le a sual tuk lo ding.
An thuhla hi a thawk deuh ihsin kan zoh asile…
Kim cu 1974 ah Germany ramah a suak. A pa cu Germany
a siih a nu cu Holland a si. A hmin ngaingai cu Schmitz a sinan lehhnu ah a
hnamhmin Dotcom(.com) timi ah a thleng. A nauhak lai ihsin mifimthiam maktara
le talent nei zet a siih America vanzam lam, Peticon, CT Bank tivekpawl a rak
Heck rero zo. Asinan khami lai ah a zoh lawng a zoh menih zianghman a tuah lo.
Sumpai lam cu Phone Company pakhat a heck ih Phone number thawn password a lak
menih tuah man Dollar 200 lai a ngah ringring men.
Hivekin lang hngan zetih ih a heck ṭheu ruangah a
kum 20 ah thawng a rak tla dah. Himi thawng ih a suahhnu ah Computer bumawknak,
Data mi zingzawisaknak, le a dang nuncan ṭhatlo ruangah thawng a rak tla rero
dah. Thawnginn sung khalah Pehtlaihnak
lam Company upapawlin an pehtlaihnak a him theinak dingah tin Kim cu Hotu ah an
tuah. Lehhnu thawng ih a suah hnuah himi Company hnen ihsin ruahnak a ngah ih
Kimvestor timi Data kilhimnak Company pi a din. Miṭthep karah dik zetin milian
maktara ah a hung suak lala ih kum 30 a kim hlanah a sumpai neihmi hi Euro 2
billion lai a kim. Lehhnu ah Forbes hrilmi milian ah a rung lang banih a neihmi
cu Dollar 13 billion lai a si.
A kum 27 ah Insider Treading thawn Thailand ah a
tlan ih kaih a tuar hnu Germany ah an kuat sal. Asinan lehhnu ah Aa-mah-khan in
a suak lala. Tawkfang ah Germany ihsin Hongkon ah a feh ih Hongkong ah Company
pakhat a dinih a hnaṭuan a thawk sal lala.
2005 ah Megaupload (dropbox vek, mai data, zuk tivek
ret theihnak) Company pi a din sal ih a hmangtu minung a tingthawng tel an
kim. Thehlarnak an tuahtermi lawng
hmanin paisa tawrleseng a ngah. Thuthang media-pawl, titi lengvak le Hackker
hrekkhatpawlih simsuakmipawl ruangah a hnaṭuan cu a nasa sinsin.
Asinan rei a awh lo. 2012 ah America cozah in copy
tuah sualnak timi hmangin lo theihlo in an Website cu an phih ter (Tuluk ramah
Facebook hman a ngah nawn lo ti sehla cuvek deuh khi a si).
Cumi ruangah Kim cu a lung a awi thei hrimhrim lo.
American khalah ka um lo, tlawn khal ka tlawng dah lo. Himi ka Website in nan
nih cu ziang a lo ti saw … nan tuar ve leh ding tivek hrawngin a thin a na, a
tuar a na zet. America FBI in himi website an phit ter ruangah IT sungih
tlanglengmi minung tampi an thing a so ve. Cumi hnuin “anonymous” timi hmin
thawn Haccker phuaih khat cu zalen zetin sharing tuahnak caan ṭha hmangin
America thuṭhennak zung, awthlahnak (RIAA) tivek website-pawl an heck thawk.
Himi ihsin Kim cu Hongkong ihsin New Zealand ah a ṭhawn ih America parah a thinhrik a nung
ringring. Hivekin sualnak rak nei dahmi le thawng rak tla rero zomi a duhduh in
khual a tlawn thei cu paisa ruangah a si bik ko ding. New Zealand khalah daiten
a um lamlam lo. Ram thukhel lam luh a tum, Internet Party timi Internet
hmangtupawl umnak Internet ah Party a tuah. 2014 ah New Zealand hrilcuhnak ah a
tel nan a sung, hmun pakhat hman a ngah lo. Ram thukhel lamih ra lutmi Kim cu
ramthukhel hrekkhatin an zoh thei lo ih hipa cu hi ram ihsin kan dawi suak ding
an ti. Cutin 2015 ah cozah in America cozah hnen ihsin siannak a ngah hnuin a
inn, a mawṭaw, a nuamtawl lawngpi, a vanzam le a neihmi zaten cozah in an
laksak thluh. Himi tikcu ah inn kiang hmun pakhat ih rak relhtu Kim cu nasaten
a tha a nau fam teh!
Cumi ihsin hlan ih a rak huat ciami America Cozah le
FBI a huat cu a luar sinsin. America cozah ih siatnak, ṭhatlonak, le
sualnakpawl cu ka phawrhsuak thluh ding tin a ngiar thawk ve. Hek ka tawngih
thawng ka tla asinan ka suak sal thei. Zovek bulpak hman ka heck dah lo, daan
lo ih thil tuahmi khal ka nei lo, asinan tu ahcun hnaṭuan pakhat ka nei zo tin….
Tui kum USA hrilawknak cu nasaten a rak thlingthla
cia. Hillary le Trump cu a rak thlingthla ih a rak ti sualmi thil fate tiang a
hai suak. Hillary ih Email thu khalah, a rualpa Julian Assange (Wikileaks)
thawn kawmawin Hillary ih Email hlawnmi thawng sawmthum lenglo cu ngah ko in an
la suak thei. Hi lai fangih kaihkhih a tuartu Julian ih a bawm thei nawn lo hnu
khalah a mah ten a zuam.
Cozah pakhat pi khi a mah ten a zuam ngam. A mah
pakhat lawngin America hecker minung 4000 khal ṭihnak a nei lo. Hillary ih
Email pawl a laksak thluh thei ruangah FBI khalin Hillary cu nasaten a thuhla
an zingzawi tum ruangah Obama in Hillary hrang tampi a khamsak ko khah! Netabik
ahcun Donald Trump cu USA ih a vawi 45 nak President ih hriltlin a si ruangah,
White Evangelical-pawl hnenih lungawi thu a sim rero bangin Kim.com hnenkhalah
sim ve thotho sehla a sual lemlo ding.
Hminsin: NineNineSaNay ih ngahmi lehmi a siih thuhla
famkim sin thei duh hrangah,…
https://en.wikipedia.org/wiki/Julian_Assange
http://chuansong.me/n/1066018251002 pawlah
tla siar bet theih a si.
0 comments:
Post a Comment