Hla Ropi “You Raise Me Up” Dunglam Thuanthu le A Suahdan

Hi hla hi minung pahnih ih phuahmi a siih a hlafang (lyrics) cu Brendan Graham nganmi a siih a thluk (melody) cu Rolf Lovland a si. 

R Loveland cu Irish-Norwegian mi a siih Secret Garden band rak dintu, hla phuahtu, producer, le keyboard tumtu kha a si. A hla hi minutes 5:04 saumi a siih March 26, 2002 ah tlangzarhnak an rak nei.

Hla Suahkehdan

A hlafang tuahtu Brendan Graham cu Irish ramih hlaphuah thiam le nunthuleng

nganthiam hminthang bik lakih pakhat a si.

Brendan Graham cu a cabu pahnihnak “Element of Fire” timi a nam thawk rero ih a cabu pathumnak “The Brightest Day, the Darkest Night” timi cabu a ngan phah rero.

Cui cabu a ngan rero laiah Norwegian hlaphuah thiam hminthang, Rolf Lovland in a rak phone. Rolf Loveland cu Secret Garden ban dintu, (Secret Garden band cu 1995 ih Eurovision Song Contest ih thiambik laksawng ngahtu kha an siih an albums million 3 lenglo zuarsuak thei ve an si). Rolf Loveland in Irish nunphung hlathluk thawi bangawmi “Silent Story” timi hlathluk mawi zet a neih thu a sim. Asinan awnmawi thawi a thluk tuahmi lawng a si tikah a cafang a nei lo. A hlafang rak bun sak dingin Rolf Loveland in Brendan Graham cu a dil. Cuizan cu kum 2000 ih Khristmas zaan kha a si.

Cui hlan te ah, Rolf Lovland ih rualpa in Brendan Graham ih cabu hmaisabik Nunthuleng (“A Varbik Pangpar” Whitest Flower) timi cu R. Loveland a rak pe.      Rolf in a siar tikah cui a nunthuleng cabu in a nun a fang suak thluh ruangah cui cabu ngantu le hlaphuah thiam Brendan Graham rori kha hlafang (lyric) a dilnak a si. Dublin khawpi ih an um laifang a siih an biakawk thluh veten ‘Silent Story’ awnmawi te ngai dingin a feh cih. A ngai tikah khai awnmawi thluk te in a nun a luah khat ve. Tikcu reilote ah a hla thulu (title) “You Raise Me Up” tin a bun ih a chorus te a phuah cih. Cui ni lala ah a cang dang tla a bet ih a ṭhehfel thluh.

Hlaphuah le Canganthiam Brendan Graham ih Nunthuleng Cabu Hmaisabik “A Varbikmi Pangpar (Whitest Flower) Dunglamthu Mallai Thlirnak…

September 13, 1845 ihsin 1849 tiang Ireland ramah pampi maktara a tlung. Hihi leitlun thuanthu ah pampi a tlun ruangih mithi tambik a pahnihnak a siih minung ting hra (1 million) lai rampi pam tlun ruangah an thi. Siarcawklo mitampi cu nunnak hawlin ram dangah an tlan. Hi pampi cu Aalu pampi (Potato Famine) ti khalin an ko. Aalu kha a sunglam ihsin amah te a hung siatih a hnah-pawl an ro, khami khan thinghnah dangpawl tla a suanih a ro ter a thi terih ram sungah ziang thlairah thlaihnah hman an nung thei nawnlo, cutiih pampi thok a si. Kum Zabi 19 sungah Europe ram pumpi ih pampi nasa bik khal a si. Britist PM Sir Robert Peel khalin US ihsin vainimpawl thlak dingin a sim, theitawk an ngaihtuah nan nikhat hnu nikhat mithi an um, a nung sun khal na besia le tuamhlawm ṭulin an um. Minung ting hra lenglo an thih hnuah minung tinghra lenglo in an rampi an suahsan tikah an rampi mipum khal a tla niam sinsin.

Hi tikcu ih pampi a natsat lai fangah nunau mihrat khawkheng Ellen O’Malley ih

lamtluan thu hi Brendan Graham ih rak nganmi cu a si. Pampi a tlun betah natsia in nunau, mipa, nauhak tiloin a tlak bet tikah  Ellen O’Malley ih pasal khal a thih phah. Ellen cun hmailam hrang ruatin a duh kuahkomi a fa le pathum cu, ngai duahdo cingin an unau thum ten a tansan ih lawng thawn Australia panin a feh. A mah a damlo betah a nauno nei thawn, a fa le a ngai le ruah-har  a cemawk thluh tikah a hrang ahcun hell fate a si bik mai. Hmanseh nunau huaisen le micak, mi rinum cu a fa lei hnenah him damten, a fa le runin, harsatnak ziangkim pahtlangin a ram ah himdan ten an um thei sal thu cu “The Whitest Flower” timi thulu thawn, Nunthuleng sau cabu, cahmai 500 umin kum hnih sung a ngan (2018 eidition ahcun cahmai 990 a um).

Lehhnu ah Rolf Lovland an suh sal tikah “himi thuanthu khan i ciahneh tuk rori a si ko” tin a let.  Rolf Lovland cu hlaphuantu hrekkhatin Irish nunphung hla-thluk na ruk tin an sawisel nan rukmi a si lo bangawknak malte an nei menmi si tin a sim. Hi hla an sahhmaisabiknak khal Rolf Lovland nui’ thih vuinak an tuah ṭumah a si hngehnge. Rolf cun, “You Raise Me Up ka ti cun Irish awnmawi ih hmual le laimuril cu ziang a si tin ka sut aw ṭheu” tin a sim. A sim betmi cu “Mi tampi in himi hla cu an mah bulpak duhnak le tumtahdan ih zirin an la ih an sak” tin a sim.

“You Raise Me Up” timi hla hi vawi 125 lenglo sahsal (covered) a siih Josh Groban ih cover thawn a hlawhtlingbik. 2004 ah American radio in vawi 500,000 lenglo a suah a phuanmi hla a si. 2005 hnu lam ahcun US lawng hmanah phundang (version dang) in 80 lenglo suah a si. ‘Gospel Music Award’ vawi li a ngah ih ‘song of the year’ thawn. 21 September 2006 ahcun, “You Raise Me Up” timi hla cu music website (musicnotes.com) ihsin copies 76,000 zuar suah hmaisabikmi hla a si.

 Source: Whitest Flower cabu, You Raise Me Up Wikipedia, Bredan Graham, Rolf Loveland Wikipedia, Internet, Wikipedia dang, le the great famine of Ireland.